Norway le Zuu

Voi khat cu muiṭawn suai thiam APK cartoonist ka rak ton. Minthang ti cu ca pakhat te in ka ṭial piak ve tiah ka cauk ka rak pek. A ka zoh i khoika mi dah na si a ka ti. Laimi ka si ka ti. Cu le cangka in a cafung cu zukzek zukzek tiah catlap cungah cun a hun rin thluahmah. Mitṭhep karte ah a lim i a ka pek. Ka lawm ka ti i a ka pekmi cu ka vun zoh. Ka hmuhmi cu mipa pakhat sawng ngai in zuu palang aa tlaih i «ka ri rih lo» a ti lio a si.

Norway ka phak ka kan umnak khua i a ummi Skien Baptistkirke kum 150 tlinnak puai caah hla kan rak cawng. Kan hnu ngai cang, mawṭaw ka mawngh lo caah taxi va hlan law rak ṭin chung an ka ti. Taxi hlannak ka va phak cu artlang in taxi cu mitampi nih an rak hngah ko. Taxi a phan chom in minung cu an kal duhnak ah a mawngh colh lengmang ko nain suimilam cheu tluk ka hngah hnu lawng ah taxi ka cit kho ve. Ziah mahtluk cun minung kan tam hnga tiah khua ka cuan, khua tampi a ka ruah ter. A ruang cu zarhte zan a si, rianṭuan dinh caan, thaizing rianṭuan awk um lo in hnupi tiang ih khawh a si caah a si. Ziah anmah le an mawṭaw an rak i mawngh ko hnga lo?

Vinmonopolet, Skien

21st Panglong le Lairam Dawh hla

Nihin ni ah Kawlrampi cu kahdaihnak le ram daihnak caah biaruah cuahmah lio a si. A rauh hlan ah 21^st Panglong timi biaruahnak zong ngeih a si cang lai. 21^st Panglong ti duhnak cu 1947 i mirang sin in luatnak hmuhnak dingah Chin, Kachin le Shan kha General Aung San nih luatnak hmunkhat ah laṭi ding in a rak sawm hna. Luatnak cu hmunkhat ah laṭi ding in lungtlinnak Panglong ah minsen an rak thut mi a si.

Sihmanhsehlaw luatnak kan hmuh hnu ah tlangcungmi hna nih duhdim nunnak kan rak hmu ti lo. A rauh hlan ah ral a tho colh ṭhan. Cucu ralkap nih caan ṭha la in uknak an rak lak. 2010 hnu lawng in democracy timi uknak ah an hun thlen. Sinain tlangcungmi caah zeipipa a si hlei rih lo.

Bia kaa khat nih vanni kuai

Salai Lian Biak Hu

Bia kaa khat nih vanni kuai ti cu bia ṭha kaa khat chimmi nih thluachuah vanni tampi a kuaih anti duhnak a si. Phungthluk, CACC, 2007.

Lai phungthluk CACC nih a khawmhsuat i an ṭialmi ah cun bia ṭha kaa khat nih thluachuah vanni hmuhnak a ṭhatnak lei lak in ṭialmi a si. Sihmanhsehlaw hi capar ah cun a ṭha he a chia he a va sawhkalh mi tu ṭial hnawh chan a si.

Nihin ah cun Laimi zong nih mah le sining tawk in ca ṭial cio a si cang. Thawngpang ca, Journal, makazin tibantuk chuah cio a si. Online ca ṭial ko a fawi i a tambik zong a si men lai. Cu tikah kan Laica le holh zong rel awk ṭha le ṭha lo, ngaih awk ṭha le ṭha lo ti in a lang thluahmah ve. Caṭial thiam deuh le cafang, holh rum deuh a ngeimi hna caṭial le holh cu rel le ngaih a nuam deuh suaumau. Sinain cheukhat sin ah cun ṭial duhmi le ṭialmi, chim duhmi le chimmi sullam aa dangmi tete zong an um. Cubantuk ṭhiamṭhiam in caṭial a thimmi hna nih cun a palh bantuk in ṭial hramhram a hmangmi zong an rak um ve. Sihmanhsehlaw atu lio Lai caṭial relmi ah cun cubantuk bal cu hmuh a har ngai, tam u cu ṭial palh bia tu an rak si deuh. Atang lei langhter mi pathum hi zohchun hmanh hna u sih.

Pu Henry Van Thio Laimi ca ka saduhthah

Pu Henry Van Thio Kawlrampi uknak ah vice president 2 ca an thim cu kan rak lawmh pi cio. Kan i lawmh tuk ah ṭhut zong ṭhu thiam lo, ih zong it thiam loin a kan tuah cio. Laimi tuanbia ah chim dai lo a si ko lai. A rianṭuannak zongah Pathian nih thluachuah ko seh. Pu Henry Van Thio cu vice president 2 rian khinh a si i Laimi ca zongah rian ka ṭuan ko lai a ti ahcun thil pakhat te hal ka duhmi a um.

Kawl uknak ah kum saupi kan um cang. Kan miphun, biaknak le ca zong hloh dih a kan timh kan rak ti. Sihmanhsehlaw nihin ah nawlngeihnak kan kut cungah zeimaw zat a um. Cutikah kan biaknak zalonnak kan hmuhnak ding, kan miphun biatak in ṭanpi i ṭhancho ter le kan ca zong sianginn ah tangli, tangriat in a chung lei tiang cawnnak tuah ding tibantuk hal ding ka tum lo.

Miphun caah kan tuahpiak seh ti ka duhmi cu hihi a si. Pu Henry Van Thio timi a min ah Pu Henry Van Ṭhio tiah “Ṭ” tang kan deh piak sehlaw ka va duh hringhran dah.

Salai Lian Biak Hu

Mipi thimmi dotla vice president Pu Henry Van Ṭhio

Kawlrampi president thimnak ah minung pathum an chuahpi hna. Cu lakah mipi nih thimmi vice president cu Pu Henry Van Ṭhio a si. Zeitin dah na chim khawh nan ti men lai, a talnglei ah zoh hmanh hna u sih.

Cozah thar ah president a ṭuan dingmi hna.
Hmanthlak: AP

Zeitin dah vice president an rak chuah cio ning a si timi zoh hmasa u sih.

Pa khatnak ah president ah thimmi pa U Htin Kyaw. U Htin Kyaw cu National League for Democracy (NLD) lutlai Daw Aung San Suu Kyi nih president ṭuan dingah kutdong sawh in thimmi a si. Cucu NLD pary nih an lung tlinpi. NLD pary lungtlin in thim i Daw Aung San Suu Kyi nih lungtlinpi mi a si lo.

Dr. Hmuh Thang + Dr. Lian H. Sakhong = Henry Van Ṭhio

Pu Henry Van Ṭhio cu Kawlram uknak ah vice president ca thimchung a si cang. Khuazei hmun a dir lai bal theih a si rih lo. Laimi tuanbia thar ṭialtu a si. Kan umnak in kan rak lawmhpi cio. Pathian nih a rianṭuannak ah thluachuah hram ko seh. 

Hmanthlak: gettyimages

A luancia 2010 thimnak ah Dr. Hmuh Thang nih, “President ṭuan ka duh caah party nganmi ah ka lut,” tiah a rak ti. Fianghlang tein bia a rak chim. Hibia nih tampi hmai a rak sa chung cia cang.

Nikum 2015 DVB Debate tuahnak ah Dr. Lian Hmung Sakhong nih kawlpawl cu fakngai in bia a chalh hna. Upa pakhat nih khatluk bia chimmi kha cu a fak hringhran ko. Laiholh in hei chim u sihlaw, “Nanmah Kawlchia, rimnam hna,” tiah hei ti sehlaw cubang cun an i fah sak lai dah.

Kawlpawl nih cun nan duhmi nan hmuh cang an ti khawh men. A ruang cu ṭangtiang naa timh lawng ah khup tiang na phan kho lai timi ruahnak an ngeih caah a si. Dr. Lian Hmung Sakhong bia leng a pet lo. Nawl ngeihnak a ngeimi president kan duh, a phungmen, covo cheuh chom in pekmi nawlngeihnak a ngei lomi vice president cu kan duh lo tiah a rak chimmi.

YTP season 2 le strategy

Eain Mat Sone Yar Yat Tat Pan Season 2 cu tuzarh February 13 ah final an i zuam cang lai. Top 3 an i zuamnak ah vote in Thi Thi Soe cu hmakhat te ah final a kai. David Lai le Hazel bal anmah pahnih lawng an i zuam ṭhan.

David Lai le Hazel zuamnak ah cun Judge biakhiahnak lawng in final kai ding a si. David Lai cu Judge le a zohtu pawl nih an uar ngaingai mi a si. David Lai cu a hlasak a ṭha ngai ko nain hla a philh mi a um pah caah Final kai ding ah Hazel nih a tei ai. Sihmanhsehlaw David Lai zong final a kai ve ṭhiamṭhaim. Hihi a ruang tampi a um kho.

Hmanthlak: Channel 7 FB

Zeiruang ah dah David Lai hi Grand Final a kai ve timi hi hlasak a thiam ruang le judge te nih an duh ca lawng ah a rak si lai lo. Zeitih tiah cun David Lai hi aa zuam chung ah Top 1 a hmu tawn mi a si. Top 3 an i zuamnak zong ah khan David Lai cu an uar ngai ko nain Thi Thi Soe nih vote 49,000 leng a hmuh. David Lai nih 43,000 leng a hmuh ve nain Hazel cu 15,000 tluk lawng a hmuh.

Mah le rian cio

A luan ciami kum khat ah khan facebook ah kum li ngakchia nih 911 a chawnhnak kong youtube in ka rak hmuh. Ka lung a ka suk tuk i ka hin tlawmte ka rak ṭial ve.

Hi kong ah a phunphun in an chim cio. Ngakchia hi nu a si, si lo, hi thil hi a tak a si, si lo, tibantuk a phunphun an chim cio. Ka zong hin phundang in kan hun chim ve lai. Hi kong hi kum sarih leng a rau cang mi a si. An rak i chawnh ning tlawmte a tanglei ah ka van langhter.

Operator: 911 emergencies in a si.

Ngakchia: Aw, bawmh ka herh.

Operator: Zeidah cang?

Ngakchia: Ka kanaan.

Operator: Na kaa ma?

Ngakchia: Si lo, kanaan a si. Ka tuah hrim hau. Na ka bawm lai ma?

Operator: Siseh. Khoi ka dah na um?

Ngakchia: Si lo, fawn in ka chim ko.

Operator: Aa! A si kho lo. Mi bawmtu ka van thlah hna lai.

Ngakchia: Aw.

Operator: Bawmh na herhmi kanaan cu zeibantuk dah a si?

Hakha mincimh le a hnu zul

Hakha mincimh cu ngaih a chia, mitthli he lung a ping. Zei khua hmanh aa ruat kho lo. Ka umnak `ih a nung tuk cang, innpa ka bawm u ti zong ah an rak si cio. "Vawlei he ka naih cang, khoika dah ka ruak suan a si te lai," timi bia ko nih lung a hnoter chinchin.

Pehtlaihnak lam vialte a rawh dih tikah thli cung lawng in kan i pehtlai kho cang. Khuachung um khualeng an chuah khawh ti lo bantuk in khualeng um zong khuachung an lut kho ti lo. Nitin eidin ding kong ah van a sang. Thilman a kai colh. Cawk awk zong a har. Cu lakah thilfir zong an chuak ve. A thil tlau mi zong nih an ngeih leh lo cu ta tiah a ngaithiam kho tu zong an rak um ve.

Upat pek awk tlak

Vawlei ramkip a culmi Hakha Mincimh hmanthlak.
Khuadang in a rami nih Hakha ka phan ti fianternak ah
hika hin hman an va i thla ta tawn.
Hmanthlak: Bik Lian

Hakha khua thilcang a phunphun cu Bik Lian (Chan Bik Lian) facebook hmang in nifatin (July 27, 2015 thawk in) thawng a kan thanh khawh cu upat awk tlak ngaingai a si. Hmanthlak le video in a kan hmuh ter khawh caah a hmun um tlukte in tuarpi khawh a si. Media lei rian`uan mi zong an um len ko nain hi lio caan ramdang um caah cun amah tluk in thawng a zamh mi an tlawm. Hakha thawngpang theih duh ah cun Bik Lian facebook kha hei zoh u ti tiang a si. Global chan ah a cang cuahmah mi LIVE in zoh duh cio a si. Hakha khua in hitluk thawng a zamh khawh cu thawngzamh min put in laksawng hmanh pek phu a si.

Ka Ruat Tawn

Salai Lian Biak Hu
20.02.2015

 

Lai miphun cu ramthumnak ah ralzaam dir hmun in kan pem ngaingai hna. Ram thumnak a phanmi hna caah chim bikmi bia pakhat cu Lai miphun kan tlau te lai maw tlau lai lo ti a si ve. Mi tampi ruahnak ah chanthumnak hrawng ah cun kan holh hi mitam u nih cun an thiam te bal lai lo ti a si. Atu lio a thang cuahmah mi mino ngakchia nih cun anmah le umnak ram holh deuh in an i chawn cang fawn hna. Cuti a si ah kan holh, kan ca, kan nunphung hi an tlau taktak te hnga maw ramthumnak a ummi hna caah hin?

 

Hi kong hi chim ceih ngai cang mi a si ko caah kanmah le umnak kong tu hi langhter ka duh. Nihin ni Norway ram Laimi khua sa mi hna hi milu in 2000 kan tling deuh lai lo dah tiah ka ruah. Norway ram a phan ve lo mi hna caah a fawinak bik in tahchunnak lak awk a tha bik cu Lairam a si tiah ka ti. Fing le tlang, lung le bo lawngte an si ve. Lairam cu lam a that lo caah chaklei thlanglei tlawnkai a har ngai bantuk in Norway zong Laimi umnak chaklei thlanglei tlawnkai a har ngaingai. NCCF timi (Norway Chin Christian Federation) biaknak kan i funnak zong ah hin chaklei khuasa mi he kan i fawn kho rih lo. Chaklei khuasa cu Norway mi zong mi tlawm te lawng an si ve.

Laimi tam u sin hmuh khawh mi cauk pathum

Mifim hna nih fimnak cu cauk ah a um an ti. Laimi zong cu bia cu kan theih ve i kan sin in hmuh khawh bikmi cauk pathum a um ve. Ka chawhnak le ka lennak ah cauk a ngeimi hna sin ah cun pathum chungah pakhat cu a um peng. Carel deuh le ca he a pehtlai deuh mi sin ah cun a pathum ning in hmuh khawh zong a si. Sihmanhsehlaw nihin ni ah cun a cauk in a um lo hmanh ah zeiti maw pakhatkhat in cun an i chiah ṭhiamṭhiam. Cauk pathum an min hna cu a tanglei bantuk in an si.

 

Baibal

Baibal hi holh phunphun in an chuah cio. Laimi zong nih holh tam ngai in leh a si ve cang. A min kan hman ning le kan pek mi zong a dang cio nain a tlangpi in Baibal ti a si. Biana ah King james Version, New International Version, Lai Baibal Thiang tibantuk an si hna. Thawngṭhachimtu cheukhat nih cun Baibal cherhchan in bia an chim tikah cu ka version nih cun cutin a ti i Lai Baibal Thiang nih cun cutin a ti tibantuk a chimmi zong an um. Chim duhmi cu Baibal cauk nih anmah le min an ngei cio. Baibal a rel deuh le holh tam deuh a rel kho sin ah cun uk tam deuh zong hmuh khawh a si.

Hakha College kan hmuh ning ka cuanh ve ning

Salai Lian Biak Hu

 

Kawlram chungah University/College a ngei lo mi cu Chin ram lawng kan si kan ti. Zeiruang ah dah kan ngeih ve lo timi biahalnak hnu lei zoh ah Kawl cozah nih uico savo cuh in an kan cuh ter caah a si a ti zong an um. Cuticun a si theng lai lo. Duh thimnak an kan pek i kanmah tu nih uico savo cuh in kan rak i cuh tu a si deuh men lai dah.

 

College pek kan rak si i Hakha nih Hakha, Falam nih Falam le Tedim nih Tedim ti a si caah Khaikam ah chiah a rak si ti a si. Sihmanhsehlaw Tedim nih ca an chuahmi pakhat ah cun Chin ram ah college pakhat kan ngei, cucu Tedim ram chungah a ummi Khaikam College a si an rak ti. Chin ram vawlei cu a nem tuk i a min a fawi tuk anti caah Khaikam vawlei cu a tolh rua, Kawl rawn vawilei ah a cang. Caan zeimawzat ah cun Kalay College in Kalay University ah a cang i Chin ram chungah a um ti lo. Chin ram ah college kan ngei ti lo.

Kan Biaknak nih kan miphun a kilveng ngai hnga ma?

Salai Lian Biak Hu

Norway ram chung ah a tlangpi in Bu pahnih um ti ko u sih. Cu hna cu Norway Chin Christian Federation (NCCF) le Chin Community in Norway (CCN) an si. A dangdang zong an um ko nain hi pahnih hi ka van char. Laimi cu Khrihfa tam u kan si bantuk in kan phaknak hmun paoh ah Khrihfabu kan ngei kho hna. Cu nih cun a kan funtom khawh bik lawng siloin rian zong a ṭuan kho bik khan a si. Vawlei lei i hruainak (CCN) nih cun rianṭuan ding a ngeih ve ko nain biaknak he cuaithlai ah cun chim ngam ding hmanh a si lo.

 

CCN a dirnak zong hi a kum a sau cang. A tluk chel le a dir chel deuh lawng a si. A cheu cu a thei lo hmanh an um kho men. A cheu nih cun a herh lo a ti zong an um kho rih. Cubantuk cun a cheu nih cun zaangba ngai le thluakfak ngai in rian a rak ṭuan zong an rak um ve. Nain cubantuk cu theihpi an si lem lo. CCN a rianṭuannak hrim hmuh a har ngaingai caah a si. Cu nih a langhter mi cu thazaang kan pe lo ti khawh a si.

Chin Idol maw Lai Idol

Salai Lian Biak Hu

 

Idol cu vawleicung hlasak zuamnak minthang phunkhat nih hmanmi min pakhat a si. Cucu tukum 2014 zong ah Laimi nih hman le tuah a si ve. Chin Idol maw Lai Idol timi tlangtar hmuh cang ka in a chuak khomi ruahnak maw Chin Idol ti hman maw a hman deuh Lai Idol timi a si kho men. Nain hi ca nih hin cu kong cu a ruahchan mi a si lo. Kum khat chung ah hramthawk in Laimi nih tuahmi Idol pahnih hi hei cuanh chunnak a si.

 

Chin Idol an tuah lai i Chin Association for Christian Communication (CACC) nih tlangtlakmi a si lai ti a si cangka bia-alnak a chuak colh. Biapi cu CACC nih Idol timi biafang an hman ruangah ti a si. Internet hmang mi Laimi nih cun hi kong a thei lo an um tuk lai lo. Idol tuah ding timi thawngpang theih cangka in an tuah tiang ceihphai ngai a si.

Global Chin Literature and Media Forum

Salai Lian Biak Hu

April 29, 2012

 

Senri mekazin ah ca van ṭial vete an ka ti. Mekazin ka rel ti lonak hi kum nga leng a si cang. Zeibantuk ca dah an ṭial i atu lio ah zeibantuk tlangtar dah an kalpi cuahmah ti ka thei lo. Sihmanhsehlaw ka lungchuak pakhat a um. Cucu Laimi nih kan ngeihmi media pawl hmunkhat um khawhnak hi a si. Hi kong he pehtlai in mi nih an ṭial cangmi a si le silo zong ka thei lo. Nain hika ah a thar in keinih ka rak ṭial ṭhan ve.

 

Laimi hi ca lei ah kan hung ṭhangcho deuh chin lengmang. Laica in chuahmi ca tete zong a hung tam deuh chin thluahmah. Cauk in a chuakmi bal hi biaknak lei ca deuh an tam nain nai hrawng in a dangdang tete zong an um pah ve cang. A hlei in hmuh khawhmi cu cazual tete hi an si. A cheu cu online cung rel khawh ding zong in an kan zuampiak tikah catlap in kan hmuh lo zong ah online in rak rel khawh an si ve. Mekazin zong hi thim hau ding phun in a tam pah ve cang. An chuahmi paoh cawk ah cun thilṭha cu a si ve ṭhaimṭhiam ko.

 

A cheu cu catlap zong in chuah lo, online cung lawng ah ṭialmi ca tete zong an um. Biana ah webside, blogger, Facebook, mailgroups tibantuk hmang in ca phunphun ṭial zong a si. Online cung zong in Pathian thangṭhat pumhnak zong tuah a si. Moderator le pumhhruaitu zong ngeih an si. Facebook le mailgroups tu ah cun editor an um lo caah tampi kan chim lai lo. Cubantuk hmun tampi ah Laica cu hman an si ve hna.

Ruatṭhan Hmanh!

Salai Lian Biak Hu

 

“Nan dam maw, nan dam maw? Hawikom dawtmi vialte hna…”

 

xxx

Zion Baptist Church, Hakha
Sunday Church School saya/ma cheukhat

 

Kan thlacam caanhmannak cu cuvial si sehlaw atu cu thlakhat voikhat, zarhkhatnak cawn nihnih zan i kan tuah tawnmi meeting cu kan thawk colh ko hna lai tiah chairman nih a von thawk colh. Kum khat chungah kan rian ngan bik tiah kan ruahmi pawl cu kan dih ngawt ko cang. Atu cu December thla i Sweet December hngah le Ngakchia Christmas vah lawnglawng a tang ko cang. A biapi mi cu... Um rih tiah, Maung Cap nih a von ti i, vah cu an bawh bu in maw an vah lai ngakchia pawl cu? hahahhaa… tiah kan dihlak in kan ni dih hna. Ka bia a dih rih lo cu tiah chairman nih a von ti i a bia cu a hun peh than. Kan dih cia mi biapi bik in kan i chiahmi pawl cu Ngakchia inncung kai, sangkip ngakchia inn kip lennak, ngakchia ramleng chuahpinak tibantuk rian har deuh i kan i chiahmi cu kan dih ngawt ko cang hna. Sangkip ngakchia len kha Ko Sui te cu an dih cang ko rua, kan sang lei ah a ra i tiah Maung Cap nih a hun ti. Zawte nih a nih cu tlangbo lei kan thiah nain a ti i, Zawte ziah nang zong atu kha Cherry ah kan in hmu lo bang, sanghnih hrawng ah na vak rua kan sang rat loin tiah Ko Sui nih a hun ti ve. Kawi Mon nih ka dua Maung Cap, kan sang cu na kan hloh bak ko, kan in hngah lengmang i na ra ti lo. Nangmah rat lai ko pei kan i ngaih cu tiah kan fa le nih an ka ti len. Kan dih lai zan lawng ah na ra i kan i lawm thiamthiam ko a hun ti. Chairman nih ka dua le kan dih ko cang i a tlamtling ko, khoi ka lei nan kal cio ti cu, "Nan chaw umnak ah na lung zong a um ve lai," ti pei si cu.

Zeitin dah Europe ram ah Laica kan kilven lai

Senri phu le mekazin reltu tonnak

Froland, Norway

29.06.2013

Zeitin dah Europe ram ah Laica kan kilven lai

Salai Lian Biak Hu

Zumhnak cu tuahsernak ah lang seh!

Tuahsernak a tel lomi zumhnak cu a thimi a si. Jeim 2: 17

Hi biafang hi Baibal cawnpiaknak lawng ah kan hman ṭheo tawn. Nihin ni ah cun Baibal lawng si loin hmun zakip ah hman khawh i zuam ve hna u sih. A ṭha ti kan theih i kan zumh komi cu tuahsernak in langhter khawh i zuam cio hna u sih.

Europe ram chungah hin Laica lei cun kan chambau ngai ko rua. Media lei zong in cawlcanghnak a um theng lo. Hlasa zong kan ngei pah ko rua hna kan ti nain hla a chuah taktak mi hi kan tlawm ngai fawn. Zapi nih zulh awk tlak tiangtiang in hmai a kal mi zong an um fawn lo. Mah le umnak hmun cio hrawg in rak au khuan ve sawh phun lawngte kan si ko rih.

CBCUSA YC online biaphawngden

Salai Lian Biak Hu

 

CBCUSA YC cu online in video ka rak zoh ve. Nan thil tuah a tha, nan i nuam.  Online in a rak zoh vemi pawl zong kan i lung si theo lai dah.

CBCUSA YC kong ah tlawmte tial ka duh nain counseling le media kong cawnpiaknak ka zoh lio ah cun ka let than. Ka tial lai lo tiah ka ti. Sinain cu kong a ngai i a thei fiang vemi nih cun an ka theih thiam ko lai tiah ka tial than.

 

Cawnpiak tu an tam bang cawnmi kong zong a tam ve. Minung bal ram lenglei ruah ning nakin nan tlawm deuhmi ko a lo. Khan khat ah minung 30 hrawng, khan hra nan si i 300 hrawng si dawh a lo. Nain cawnnak ah um thiam loin riantuanmi he 300 leng si dawh nan si, 400 cu tlin dawh nan si rua lo. Leng lei theihnak ah CBCUSA cu Khrihfabu 50 leng funtomnak a si ti a si. Khrihfa bu pakhat ah minung 10 cio rak i thawh hna sehlaw 500 tal cu an si lai ti khi a lo ngai nain.

Chin National Day tuah a herh maw?

Salai Lian Biak Hu

 

Zeiruang ah dah CND kan tuah? A herh maw herh lo? Tuah lo zong ah zeidah a poi? Biahalnak hi mah le duh ning in tuah khawh a si cio ko. A fawinak in chim ah cun Norway ram ah CND kan tuah lo zong ah a poi lo ti a fawi te.

 

Laimi cu phun a ngeimi kan si. Kan phun kan rak i theih lo liote hmanh ah khan UNHCR nih ram thumnak kal ding in timhtuah a si tikah Norway ram kal ding cu a hnu bik ah na chungkhar min (Family name) tiah hal a rak si. Kan nih lio ah cun holhlet nih a buaithlak tiah khua an rak khan i Family name cu na phunmi tiah rak hal kan si. Cu tikah kanmah le kan phunmin cu rak chim cio a si. Cucu UNHCR kong ah hei si sehlaw.

Ruahchannak A Dong

Salai Lian Biak Hu

Khua pakhat cu rilinih a kulh mi a si caah an vawlei ngeihmi a bi ngai. Cinthlaknak vawlei hmunhma zong an ngei lo ti si. Innhmun bak lawng an ngei kho. Cu caah rili khat lei ral ah rawl hi an va phiar tawn. Cun mithawngtha le mirum mingei deuh cu rili ral ah sianginn zong an va kai. An khua ah tang li ting lawng cawnnak a um. Catang sang kai a duhmi cu rili ral ah an va kai tawn ti a si.

Khuami hna nih varal kalnak ah an hmanmi cu tilawng le tinbaw deuh an si. Cu zong cu zapi nih ngeihmi a si lo tikah zaran cu kal kho lo in an um. Mi nih an umnak ah an rak zuarmi tu caw in khua an sa ve hna ti si. Cuti an har cu khuami hna nih an ruah tikah rili ah hin hlei i donh sehlaw a tha tiah khua an khan ti si. Cu hlei donh ding cu an khua i ummi company pakhat kha tuanvo kan lakpiak tiah an ti, ti a si.