Laimi tam u sin hmuh khawh mi cauk pathum

Mifim hna nih fimnak cu cauk ah a um an ti. Laimi zong cu bia cu kan theih ve i kan sin in hmuh khawh bikmi cauk pathum a um ve. Ka chawhnak le ka lennak ah cauk a ngeimi hna sin ah cun pathum chungah pakhat cu a um peng. Carel deuh le ca he a pehtlai deuh mi sin ah cun a pathum ning in hmuh khawh zong a si. Sihmanhsehlaw nihin ni ah cun a cauk in a um lo hmanh ah zeiti maw pakhatkhat in cun an i chiah ṭhiamṭhiam. Cauk pathum an min hna cu a tanglei bantuk in an si.

 

Baibal

Baibal hi holh phunphun in an chuah cio. Laimi zong nih holh tam ngai in leh a si ve cang. A min kan hman ning le kan pek mi zong a dang cio nain a tlangpi in Baibal ti a si. Biana ah King james Version, New International Version, Lai Baibal Thiang tibantuk an si hna. Thawngṭhachimtu cheukhat nih cun Baibal cherhchan in bia an chim tikah cu ka version nih cun cutin a ti i Lai Baibal Thiang nih cun cutin a ti tibantuk a chimmi zong an um. Chim duhmi cu Baibal cauk nih anmah le min an ngei cio. Baibal a rel deuh le holh tam deuh a rel kho sin ah cun uk tam deuh zong hmuh khawh a si.

 

Dictionary

Dictionary zong cu holh phunphun in tuah a si i Laiholh zong in a chuakmi a tam pah ve cang. A hlan ah cun English-Myanmar Dictionary le English-English Dictionary deuh an rak si. Laimi nih kan hmanmi tambik ah English-Chin Dictionary deuh an si. Atu ah cun English-Myanmar-Chin zong a um cang. Sianginn sangdeuh a kai mi sin ah cun a phun tam deuh zong hmuh khawh an si fawn. Kawlram thang caah cun Oxford Advanced Learner’s Dictionary deuh hi a hmangmi an tam.

 

Khrihfa Hla Bu

Khrihfa Hla Bu zong hi Laimi he a ṭhen kho bak ve lo mi a si. Anih bal hi a dang cauk pawl he an i lawmh lo nak pakhat a um. Cucu zeidang siloin kanmah Chinmi lawng nih kan hman mi a si. A hlan ah cun Hakha holh in rak tuah mi a si. Chin Baptist Convention (A hlan ZBC) nih holh dang zong in i let sehlaw hman siseh an rak ti. Cuticun an rak chuah tikah ZBC hla a timi zong an tam pi. Sinain cauk nih min an ngeih cio bantuk in ZBC hla cauk tiah minpek a si lo. Hla cauk min ah "Khrihfa Hla Bu" tiah min pek a si. Hi zong hi inn kip ah hmuh khawh ding phun in a um ve mi a si. Chungkhar tam deuh sin hoi hna ah cun uk tam deuh zong hmuh khawh a si. Carel le hla a zuam deuh inn hoi hna ah cun a phun tling deuh zong in hmuh khawh a si nain cubantuk minung bal cu hmuh an har ngai.

 

Nangtah zeibantuk cauk dah Laimi inn na lennak kip ah a tlangpi in na hmuhmi an si ve?