Norway ram biakinn muisam dawh lo bik

Norway cu Khrihfa ram an ti bantuk in biakinn hi khua cio nih an ngeih hna. Kum za in a rau cangmi biakinn zong an um bantuk in a thar an sak mi zong an um len ve.

Nikum 2019 ah biakinn thar Porsgrunn khua ah an sak. Chanthar mit in kan sak tiah biakinn satu hna nih cun an ti. Kum a dongh in Norway ram chung biakinn muisam a dawh lo bik timi an thim.

Kan hnu zarh ah khan thimnak an tuah. Thimfung thong sarih leng nih an thim i 972 in Østre Porsgrunn kirke cu muisam dawh lo bik a si tiah TA nih a ṭial.

IC show tilian harmi bawmhnak sing 19588 an hmuh

Hmanthlak: Popular

Iron Cross nih tilian ruang i harnak a tongmi hna caah tiah show pakhat cu August 21, 2015 National theatre Hall ah an tuah. Show tuah dingin tlangtlatu cu KBZ Brighter Future Myanmar Foundation a si. Zohman zong voidang tawn an hauhmi nakin a let in a fak ngaingai. Sing leng a kai. A ruang cu bawmhnak caah a si lai ti a si. IC Show tuahnak i ticket man an hmuhmi dihlak cu sing 800 a si.

A zoh mi hna lawng in siloin a chung he a leng he bawmhnak an rak pek cio. Puai zawh zong an i nuam i puai tuahtu zong an i lawm. Bawmhnak zong tam lakte an hmuh. An hmuhmi dih lak hi sing 19588 tiah thawngthanhtu hna nih puai a dih lai te ah an thanh. Bawmhnak an pek nakding hmun hna cu Sagaing ram le Chin ram hna an si lai.

IC Show zoh a duh ve mi hna nih ka hin zoh khawh a si. IC SHOW

Lay Phyu maw Ah Nge dah?

Kawlram chung music band ah cun Iron Cross hi minthangbik an si ko lai dah. Thla fatin show an tuah kho peng. Cu lawng siloin kum 20 tlinnak zong an tuah cang. Atu lio ah cun hawi tuah bal rih lo mi a thar pakhat an hun tuah. Cucu hlasatu pakhat hnu pakhat in LIVE 90 (One Man Show) timi show a si. Minute 90 chung pakhat lawng hlasak a si.

Lay Phyu LIVE 90

Kan hnu thla May ah khan hmasabik ah Lay Phyu nih a rak sak. Thla khat a hun rauh hnu June ah anau pa Ah Nge nih a hun sak ve. Hi hna pahnih hi zapi uarmi an si. Aho dah a aw ṭha deuh, aho dah a thiam deuh tiphun zong in an rak ceihphai ngai mi hna an si. A cheu nih Lay Phyu an uar deuh bantukin Ah Nge a uar deuh mi zong an um ve ṭhiam.

Anmin thannak kum 15 a rauh hnu Live 90 (One Man Show) timi an sak veve mi an hlasak zoh le aw ngaih a duhmi nan um sual ah a tang link ah rak kau khawh a si.

Lay Phyu

Ah Nge

Nang tah aho deuh dah na uarmi a si? Aho hi dah a thiam deuh le aw ṭha deuh tiah na ruahmi a si ve?

Hmaithla ah Myo Gyi zong a sa ve te lai. 

Sung Tin Par Solo Concert nih Kawl hlasa ralrin a pek hna

Sung Tin Par cu hlasa pakhat dirhmun in kum hleinga a tlin hnu ah Solo Concert cu 2015 April 25, Myanmar Event Park, Yangon ah a tuah. Zohman cu kyats 30,000, 10,000, 5,000 le dir buin zoh a duhmi hna caah alak in tuahpiak an si. Ringawn tumtu ah Dream Lover Band an si.



Hmanthlak: Sung Tin Facebook

Hawidang One Man Show, Solo Concert tibantuk an tuah ah cun hlasatu dangdang zong an sawm hna i anmah hla kha an sakpi hna. Sinain Sung Tin Par cu amah lawng bak nih fung 30 a sak. A zohmi hna nih dinh loin fung hra a sak hnu zongah a aw amah ning a simi cu khuaruahhar a si ko an ti cio. Cuti fung hra a sak hnu ah a thil a va thleng ta.

 

Kawlram nu hlasak thiam tiah uarbikmi Tin Zar Maw nih "Tha Khin" (Ka Bawi) timi hla caang hnihnak a sak lio ah a aw tlawmte a ther i ka lau pah tiah a ti. Sihmanhsehlaw cuti a aw a ther cu a hla kha lungzur tuk in a sak tikah a ṭahmang a chuak, a mitthli a sur caah a si. A hlasak a zohmi nih cun a mitthli aa hnawh lio zong nan rak hmuh lai. Cuti a um cu ka zaang zong a fak tiah Tin Zar Maw nih a ti. Lungzur ngai in a sakmi cu a zohtu zong nih an rak tuar pi cio. Hlasa L Seng Zi zong nih cu hla a sak lio cu ka mitthli ha mang dih tiah a ti ve.

WWE civui zawh hna u sih

 

Wrestling cu TV channel in a thlahmi hna nih LIVE thlah timi hi a tlawm ngai. An thlah zong ah zeimaw caan tete ah an thlah. Cu zong ah cun suimilam 3 chung thlah timi hi a fawi lo ngaimi pakhat a si fawn. Sihmanhsehlaw WWE nih cun zarhtin in Monday Night Raw tiah suimilam 3 lengmang an thlah khawh. Wrestlemania 31 tu cu zanlei suimilam 17:00 in Kick Off suimilam 2 chung le Wrestlemania 31 suimilam 4 chung thlah ding timhtuahnak an ngei.

 

Micheu nih wrestling te hna zoh huam cu a taktak hmanh a si lo mi tiah an ti. A hman ngai taktak, nain a taktak sisehlaw atu bantuk in zoh duh ngaimi a si theng hnga lo. Zeicaah tiah zarh fatin aa pai peng mi aho dah a ṭhawng deuh ti zoh lengmang ding cu ka zoh cia ti ding phun a si tikah zoh zuam ding phun a si ti lo. Nain ning le cang tein tuanbia an ser tikah zoh duhnak tam deuh a ngeih ter.

Grammy Award “Stay With Me” copy si ma?

Grammy 2015 ah Award a hmumi hla “Stay With Me” cu hlathar siloin a hlun a si. Kum 2014 April ah a rak chuak i tlawmpal a rauh ah hla ngaitu pawl nih Tom Petty le the Heartbreakers 1989 i an hla “I Won’t Back Down” he aa lo an ti colh. Cuticun October ah an bia zong ceih a rak si. Kaphnih ṭuanvo ngeitu zong an auh hna i hla cu an ngaih ter hna. Sihmanhsehlaw 2015 January zarh dongh lawng ah biafiang a chim.

 

Sam Smith nih “Stay With Me” hla cu Tom Petty le the Heartbreakers zong a phantu ah a telh chih ve hna. Cu hna nih cun hlaphan man 12.5% an hmuh ve lai. Cuticun “Stay With Me” hla cu hlaphantu min ah Smith, Petty, Lynne le Jimmy Napes an si tiah the American Society of Composers, Authors and Publishers (ASCAP) nih a pom piak hna. Cucaah hi hla cu hlathar siloin a hlun a si.

Kawlram Academy 2014

Kawlram ah Academy laksawng 2013 cu December 27, 2014, Myanmar Event Park Hall, Yangon ah an pek. Laksawng a hmumi cu minung paruk an si. Cu hna cu Director Wyne, Actor Pyay Ti Oo, Actress Wut Hmone Shwe Yee, Supporting Actor Min Oo, Supporting Actress Khine Thin Kyi le Music Piano Tin Win Hlaing hna lawng an si.

Zalonnak nan timi cu hi maw a si tiah a zoh ko hna.
Hmanthlak: BBC Burmese

 

Tukum 2014 tuahmi 2013 ca Academy laksawng cu Kawlram Film phu tawlrelnak in cozah tel lo a voikhatnak an hun pek ṭhan mi a si. Sihmanhsehlaw kum dang bantuk in lung diriam ti a um hlei lo.

 

Mi cheu khat ruahnak ah cun Director Wyne cu voikhat hmanh Academy a hmu balmi a si lo. Hmuh awk ah a zohtu nih an i ruahchan lengmang nain a hmu bal lo. Tukum cu Kawlram Film phu nawlngeihnak hmasabik an pek kum a si. Atu tan i a hmuh lo cun hmailei i a chim hnga dingmi bia ṭih ah pe hna seh law a dawh. Cun Supporting Actor Min Oo le Actress Khine Thin Kyi zong hi a thiammi an si. Nain Academy an hmu bal lo. Peknak nawl an ngeih lio ah pe ve hna sehlaw cu ko cu a zohtu mit ah a um.

Kawlram Kong ah Norway Mi Ralrin An i Pe

Norway Siangpahrang Harald le Siangpahrangnu Sonja cu nihin zarhpini zanlei (30.11.2014) ah Kawlram an phan. Ninga chung caam ding an si. Kawlram ah khuasami Norway mi hna nih Siangpahrang nupa cu an rak don hna.

Siangpahrang nupa cu president Thein Sein le Nobel daihnak laksawng hmutu Aung San Suu Kyi he zong tonnak an ngei lai. Cun cacawn nihnih ni (02.12.2014) ah Siangpahrang Harald cu Yangon University i Convocation Hall ah democracy kong siangngakchia hna sinah chimnak zong a ngei lai. Ramkong rianṭuan mi a dangdang zong tonnak an ngei hna lai i Thura Shwe Mann he zong tong in biaruahnak an ngei lai.

Siangpahrang nupa an caam chungah Norway ramdang palai le chawlet palai nih umpi in an zulh ve hna lai. Kawlram ah Norway chawlet rianṭuan mi hna nih riannganpi bunh in ṭuanding zong an thawk cuahmah cang. “Kawlram ah kum 13 cung cun rianṭuannak nawl an pek hna nain kannih cu kan phung kan kilven ko lai. Norway hrambunh in rianṭuan mi hna nih an rian ah ngakchia rianṭuan ter lo ding in kan kilven lai,” tiah chawlet palai Monica Mæland nih a chim.

Thaizing in cun Siangpahrang nupa nih Kawlram cozah sinah lennak an ngeih cang lai caah Norway mi nih chawleh rian le bawmhnak le daihnak sernak kong hi cawh sual lo ding in Norge Folkehjelp (Norway Mibawmtu Bu) nih ralrinnak bia an chim.

Ch: NRK, TV2

Kyat 10000 tlap an chuah lai

A Hmailei

Central Bank of Myanmar in kyat thonghra (Kyat 10000) tlap cu June 15, 2012 ah an chuah lai. Tangka cu cozah bank an hun tik le chaw letthal pawl bank an hun tikah zapi sin phawtzamh a si te lai.

A Hnulei

Atu tan an chuah dingmi kyat thonghra hi Kawlram ah man sangbik a si lai. Tangka tlap man sangdeuh an hun chuah tikah tangka man ngei lomi a si sual nakhnga lo cozah nih biatak te in `uanvo kan lak lai ti zong Central Bank of Myanmar i haotu chang U Aye Taw nih a chim.

Champion cu Chelsea ta a si

UEFA Champion 2012, Chelsea

UEFA Champion 2012 cu Bayern certual, May 19 ah Chelsea nih a lak cang ko. Final cu FC Bayern Munchen vs Chelsea FC an chuih i kawl khat veve in puai a dih. Minute 30 caan an chap hna. Cu lio ah Bayern lei in penalty an hmuh nain Arjen Robben (10) nih a kawl lo caah cuticun puai a dih. A donghnak a phi pe ding ah penalty an chuih ter hna. Minung pa nga veve in an chuihter hna i Chelsea nih 4:3 in teinak cu an hmuh.

Atu tan UEFA Champions League 2012 final kai kho ding in semi final ah an rak chuihṭi mi hna cu Barcelona 2-3 Chelsea le Bayern 3:3 Real Madrid an si. Bayern puai ah cun an i tluk caah penalty an chuih i 3:1 in Bayern nih teinak an rak hmuh.

Kum 2011 Champion Barcelona cu semi final in champion hrai pi cu an kal tak diam. Sihmanhsehlaw kawl tambik laksawng cu Messi nih kawl 14 in a hmuh ṭhiam.

MNL Ah Chin United FC Ludor Bik

Myanmar National League 2012 a voi khatnak (First Round) chuihmi cu an dih cang. Atu lio i pakhatnak a hmumi cu KBZ FC hmak 28 in a si. Chin United FC tu cu hmak 3 in hnubik ah an um. An chuih dingmi dihlak hi puai 13 a si. MNL ah a chuimi phu 14 an si.

Chin United FC an chuih ning cu puai 12 chuih mi ah 9 an sung i puai 3 an i tluk. Kawl in hmak an hmuhmi cu 7 a si i an mah lei kawlmi cu 31 a si.

Chin United FC cu tukum 2012 ah MNL ah a lut thar mi le 2011 ah rak dirhmi FC a si. A ngeitu cu Dr. James Lian Sai a si.

Kawlram Um Mirang Vanlawng Tuah 20 Hlai An Timh

Ralpi 2nak lio i Kawlram ah an rak phumtak mi
Mirang raltuknak vanlawng Spitfire phun

Vawlei ralpi 2 nak lio i Mirang nih vawlei tangah an rak phum tak mi raltuknak vanlawng Spitfire tuah 20 cu Kawlram cozah he bawm in hlai ṭhan ding hnatlaknak an ngei tiah Mirang bawi pawl nih an chim.

1945 ah Japan ralkap cu Kawlram ah an rak luh tikah Mirang cu an rak tli dih. Cu lio ah Mirang ralkap raltuknak vanlawng Spitfire ser rih lo kuang in chiahmi tuah 20 cu Japan nih an rak sawksam dih sual lai asiloah an hman sual lai ti phan ruangah vawlei tangah an rak phum.

2012 vawleicung sianghleirun ṭha bik 10

Yangon University Convocation Hall

Sianghleirun ṭhabik a thim lengmang mi Times Higher Education nih tukum zong a thar in a hun thim ṭhan cang. Ram 149 in mifimthiam 17554 nih siangngakchia hna sin in an kherhhlaimi a si. Vawleicung sianghleirun ṭhabik cu US le UK deuh in an si. Sihmanhsehlaw a ṭhabik 10 lakah Asia in Japan cu pariatnak ah a tel kho ve.

Nikum i Asia lei sianghleirun pawl zong an ṭhangcho deuh ngai hna. National University of Singapore cu 27nak in 23 nak ah a hung kai ve. Cun Tsinghua University cu 35 nakin 30 nak ah a rak kai i University of Hongkong cu 42 nakin 39 nak ah a rak kai ve.

Rammi Sinak Card A Thar Thlen An Timh

Kawlrammi sinak card hmat-pung-tin cu a hlan bantuk  si ti loin ramdang bantuk Smart Card in thlen ding ah timhtuahnak an ngei. Cubantuk hman khawh ding ah design cu Myanmar Info Tech ah an suaisam cuahmah lio a si. An dih cun immigration zunglei ah ap in tuah a si te lai tiah tuanvo ngei pakhat nih a chim.

Smart Card kan hman ahcun minung kan pum chung in aa thleng kho lo mi le kut neh te pawl an i tel lai i van chek le cangka in card ngeitu min, kum, umnak, a pa min le zeibantuk thi a ngeih timi pawl theih khawh colh an si lai ti a si. A hlan bantuk in a rawh fawimi a si lai lo, cun a deu zong ser khawh a si lai lo tiah tuanvo ngei pakhat nih a chim.

Sii lei cawnnak kumkhat an karh chap

Siibawi si ding in cawnnak a la mi siangngakchia hna caah rian he pehtlai in kum khat kai chihmi sii lei fimcawnnak cu kum ruk in kum sarih ah an karhpiak hna. A ruang cu sii lei he pehtlai in tonghtham tam deuh ding, theihngalhnak tam deuh ding le sii lei fimcawnnak an duhdeuh nakhnga caah a si tiah rian ngei pakhat nih a chim. Kawlrampi ning in sii lei fimcawnnak i kum khat ca siangngakchia lak tawnmi 2400 in 1200 tiang zong an ṭhumh chap fawn.

Sii lei cawnnak ding ah pa 60% le nu 40% tiang rak ṭhen tawnmi cu a khatte in pek an si cang lai. Cun hmak cazin a thleidang ngai mi zong kan ṭhumhpiak deuh hna lai ti a si.

Kawlrampi chungah siilei cawnnak sianghleirun hmun li a um. Yangon ah hmun hnih, Mandalay le Magway ah hmunkhat veve tiah chiahpiak an si. Laimi tampi sii lei an cawn biknak hmun cu Magway ah a si.

(A hlan ah cun sii lei cawnnak hi kum sarih a rak si ko nain 1999-2000 cacawn kum hrawng khan sianghleirun cacawn kum vialte kum khat cio ṭhumh dih a rak si ruangah sii lei cawnnak zong kumkhat ṭhumh a rak si ve.)

Ch: Venus News

Union Day ah Daw Aung San Suu Kyi biachimmi

Pathein khua i Daw Aung San Suu Kyi bia

NLD le mino tonnak i Daw Aung San Suu Kyi bia

Kum 2010 ca Academy hmu dingah ruahmi Thet Mon Myint

Kumtin Academy laksawng an pek tawnmi cu tukum zong 2010 ca cu thaizing February 7, 2012 Naypyitaw ah pek a si ṭhan cang lai. Academy pekding mi film a dihlak ah 14 lawng a si. Cu chung cun Thet Mon Myint zong a tel ve. Academy laksawng cu minung thimchung um lo in film a thlami chung in pek a si. Academy laksawng peknak puai ah media lei in MRTV 4 nih hmunhma lak dih an i tim.

Kum 2010 ca i Academy laksawng hmu ding in an ruah bikmi hna cu Pyi Ti Oo le Thet Mon Myint an si. Kawlram fidi minthang tampi zong aho dah 2010 ah Academy laksawng a hmu lai tiah na ruah tiah an hal tik hna zongah anmah pahnih hi ruahbikmi an si.

Kum 2010 Academy laksawng hmu ding ah ruahmi Thet Mon Myint cu film 14 chungin film 6 ah a tel. Thet Mon Myint cu a tu lio Kawlrampi fidi ah cun minthang bik pakhat a si. 2006-07 lio TV kyawngia zongah Thet Mon Myint nih hmunhma a rak lak dih tiah the Weekly Eleven Journal nih a rak ṭial. Culio ah cun Htet Htet Moe Oo nak in TV kyawngia ah a let in a min a rak thang deuh. Tukum Academy laksawng zong Thet Mon Myint nih a hmuh lai tiah ruah cio a si.

Cubantuk in hlasa lei zongah minthang pakhat a simi Sung Tin Par cu 2006-07 hrawng Show ah siseh, Tape, CD, VCD, DVD an chuahmi kip ah siseh R Zarni he an i tel lo cun cite tello meh bantuk a si tiah journal kip ah an rak ṭial. Sihmanhsehlaw Yangon City FM nih hlasa minthang laksawng an rak pek hna ah cun R Zarni nih a rak hmuh nain Sung Tin Par cu thimmi chung lawng ah a rak i tel.

SIM card Ks. 5000 man a si kho lo cozah lei nih an chim