Sung Tin Par Solo Concert nih Kawl hlasa ralrin a pek hna

Sung Tin Par cu hlasa pakhat dirhmun in kum hleinga a tlin hnu ah Solo Concert cu 2015 April 25, Myanmar Event Park, Yangon ah a tuah. Zohman cu kyats 30,000, 10,000, 5,000 le dir buin zoh a duhmi hna caah alak in tuahpiak an si. Ringawn tumtu ah Dream Lover Band an si.



Hmanthlak: Sung Tin Facebook

Hawidang One Man Show, Solo Concert tibantuk an tuah ah cun hlasatu dangdang zong an sawm hna i anmah hla kha an sakpi hna. Sinain Sung Tin Par cu amah lawng bak nih fung 30 a sak. A zohmi hna nih dinh loin fung hra a sak hnu zongah a aw amah ning a simi cu khuaruahhar a si ko an ti cio. Cuti fung hra a sak hnu ah a thil a va thleng ta.

 

Kawlram nu hlasak thiam tiah uarbikmi Tin Zar Maw nih "Tha Khin" (Ka Bawi) timi hla caang hnihnak a sak lio ah a aw tlawmte a ther i ka lau pah tiah a ti. Sihmanhsehlaw cuti a aw a ther cu a hla kha lungzur tuk in a sak tikah a ṭahmang a chuak, a mitthli a sur caah a si. A hlasak a zohmi nih cun a mitthli aa hnawh lio zong nan rak hmuh lai. Cuti a um cu ka zaang zong a fak tiah Tin Zar Maw nih a ti. Lungzur ngai in a sakmi cu a zohtu zong nih an rak tuar pi cio. Hlasa L Seng Zi zong nih cu hla a sak lio cu ka mitthli ha mang dih tiah a ti ve.

Sung Tin Par nih atu bantuk Solo Concert a tuahmi cu Kawl hlasa Nu lawng siloin Pa pawl zong ralrinnak (challenge) a pek hna ti khawh a si. Anih cu studio lawng siloin concert tibantuk a leng zongah a aw aa thleng lo. A cheu hlasa cu hlasa (hlasak thiam, awṭha) timi min pek awk a tlak lomi an tam pi. Nihin i uar ngaimi hlasatu hna zong Live in an sakmi ngaih ah cun an aw aa dang ngai.

 

Kawlram hlasak thiam awṭha lakah Sung Tin Par cu hrelh awk ṭha lo pakhat a si ve. A luan cia 2006-2008 hrawng concert tuahmi ah Sung Tin Par aa tel lo ahcun a tlamtling lo tiah Kawl Journal kip zong nih rak timi pakhat a si. Kawlram ah cun copy tuah in zuarmi a tam tuk caah album chuah zong an ngamh tuk lo. Cubantuk lakah Sung Tin Par zong album pali tiang aa chuah ve.