Ka Ruat Tawn

Salai Lian Biak Hu
20.02.2015

 

Lai miphun cu ramthumnak ah ralzaam dir hmun in kan pem ngaingai hna. Ram thumnak a phanmi hna caah chim bikmi bia pakhat cu Lai miphun kan tlau te lai maw tlau lai lo ti a si ve. Mi tampi ruahnak ah chanthumnak hrawng ah cun kan holh hi mitam u nih cun an thiam te bal lai lo ti a si. Atu lio a thang cuahmah mi mino ngakchia nih cun anmah le umnak ram holh deuh in an i chawn cang fawn hna. Cuti a si ah kan holh, kan ca, kan nunphung hi an tlau taktak te hnga maw ramthumnak a ummi hna caah hin?

 

Hi kong hi chim ceih ngai cang mi a si ko caah kanmah le umnak kong tu hi langhter ka duh. Nihin ni Norway ram Laimi khua sa mi hna hi milu in 2000 kan tling deuh lai lo dah tiah ka ruah. Norway ram a phan ve lo mi hna caah a fawinak bik in tahchunnak lak awk a tha bik cu Lairam a si tiah ka ti. Fing le tlang, lung le bo lawngte an si ve. Lairam cu lam a that lo caah chaklei thlanglei tlawnkai a har ngai bantuk in Norway zong Laimi umnak chaklei thlanglei tlawnkai a har ngaingai. NCCF timi (Norway Chin Christian Federation) biaknak kan i funnak zong ah hin chaklei khuasa mi he kan i fawn kho rih lo. Chaklei khuasa cu Norway mi zong mi tlawm te lawng an si ve.

 

Laimi le biaknak a then kho lo an ti bang kan phaknak paoh ah Khrihfabu kan ngei cio hna. Norway sin a pummi zong kan um thiam. Laimi nih dirhmi Khrihfabu hi hleiriat hrawng kan si cang. Cu kan biaknak nih cun miphun kan sinak hi a kan fimhlawm bik lai ti ruahnak an ngei cio. Norway mi sin kan i pumh tikah an holh hi zaran nih cun kan fiang ti lo. Micheu thawngtha chimtu cu kan chimmi an thei lo tiah ca in an tial i pumh dih ah an kan phawt than. Kanmah te in kan i pumh ah cun mahle holh in duhtawk zalong tuk in kan i pum kho. Cucu zapi nih duh dihmi a si fawn.

 

Sihmanhsehlaw ngakchia kan fale hna cu holh phun hnih hmang in Sunday Church School chimh an si. Khuakhat ah mi tam deuh umnak le tonnak tam deuh a ngei kho mi hna sin ah cun Lai holh lawng bak in a chim kho zong an um ve ko. Sihmanhsehlaw anmah lawng um caan ah cun Norway holh hi mitam u nih an hman thiamthiam. Lai holh duhtawk hman ding ah ngakchia an si lawng siloin an thiam lo caah Norway holh in hrilhfiah lengmang zong a hau i cawnpiaktu caah a har ko.

 

Mino cheukhat Norway ram i a thangmi hna cu Norway holh an hmang ve thiam. Lairam ah kum hleinga tiang hrawng a rak um bal cang mi caah cun an duhmi holh an i thim khawh. Sinain khat lei kap in a poi ngai mi thil pakhat a um than. Cucu mah le holh thiam hna seh timi kha kan lung in kan i seh chih tikah mah le pengtlang holh kha biatak in a karh than. Cu nih cun zapi hmanmi holh kha chuah ter a harh tikah Norway holh nih hmunhma a lak ngai ve than.

 

Biaknak nih hin a kan funtom bik. Biaknak he pehtlai in tuahmi thil a tam u paoh a tlam tling ti khawh si. Norway ram thawngtha chim a phan mi zong an um lengmang ve. Norway cu Lairam he a lo kan ti cang bantuk le mi kan tlawm tikah khua dangdang cio i fawnh in Khrihfabu dirh a si. Biaknak ah kan i fun ngai ko nain bu i then zong a rak um ve tikah Khrihfabu pakhat ah hin mitampi kan um lo. Mi tam deuh umnak ah le bu a tam deuh ve. Pumh caan dah ti lo cun tonnak ngeih timi a har ngai. Riantuannak ram a si ve bantuk in lenkai zong a fawi lo.

 

Kanmah holh le kan sining tein Pathian kan thanhthat kan ti lio ah cheukhat cawnpiaktu nih cun Lai laam le Lai thil cu khuachia thil ti a si. Cawnpiaktu bia cu zumh a si tikah Lai thil an i hruk ti lo. Laam a herh caan le Miphun ni kan tuah tik i a laam tawn mi zong nih an laam duh ti lo. Chiat serhnak kan cung ah a tlung lai ti an phang cang.

 

Norway ram cu hramhram in nawl pek khawh a si lo tikah mah le duhmi cio tuah a si. Rian i fial zong ah mah le ngamh tlak aa thei ngaimi dah lo cu chuah sual zong kan fawi ngai cang. Cubantuk ram i atu lio hmanh ah kan holh, thuam le laam kan hman khawh lo ah hmailei ah cun zeidah kan lawh te hnga? Kum hleiriat a tling i inndang a chuak zong kan um cang. Nihin nule pa cheukhat kan dirhmun ah cun kan logarithm zong a kuai rih i kan vawlei pi zong hi sianginn lawng ah a pum i inn ah cun a per rih fawn.