Sunday, August 23, 2015

IC show tilian harmi bawmhnak sing 19588 an hmuh

Hmanthlak: Popular
Iron Cross nih tilian ruang i harnak a tongmi hna caah tiah show pakhat cu August 21, 2015 National theatre Hall ah an tuah. Show tuah dingin tlangtlatu cu KBZ Brighter Future Myanmar Foundation a si. Zohman zong voidang tawn an hauhmi nakin a let in a fak ngaingai. Sing leng a kai. A ruang cu bawmhnak caah a si lai ti a si. IC Show tuahnak i ticket man an hmuhmi dihlak cu sing 800 a si.

A zoh mi hna lawng in siloin a chung he a leng he bawmhnak an rak pek cio. Puai zawh zong an i nuam i puai tuahtu zong an i lawm. Bawmhnak zong tam lakte an hmuh. An hmuhmi dih lak hi sing 19588 tiah thawngthanhtu hna nih puai a dih lai te ah an thanh. Bawmhnak an pek nakding hmun hna cu Sagaing ram le Chin ram hna an si lai.

IC Show zoh a duh ve mi hna nih ka hin zoh khawh a si. IC SHOW

Friday, August 21, 2015

Hakha mincimh le a hnu zul

Hakha mincimh cu ngaih a chia, mitthli he lung a ping. Zei khua hmanh aa ruat kho lo. Ka umnak `ih a nung tuk cang, innpa ka bawm u ti zong ah an rak si cio. "Vawlei he ka naih cang, khoika dah ka ruak suan a si te lai," timi bia ko nih lung a hnoter chinchin.

Pehtlaihnak lam vialte a rawh dih tikah thli cung lawng in kan i pehtlai kho cang. Khuachung um khualeng an chuah khawh ti lo bantuk in khualeng um zong khuachung an lut kho ti lo. Nitin eidin ding kong ah van a sang. Thilman a kai colh. Cawk awk zong a har. Cu lakah thilfir zong an chuak ve. A thil tlau mi zong nih an ngeih leh lo cu ta tiah a ngaithiam kho tu zong an rak um ve.

Upat pek awk tlak
Vawlei ramkip a culmi Hakha Mincimh hmanthlak.
Khuadang in a rami nih Hakha ka phan ti fianternak ah
hika hin hman an va i thla ta tawn.
Hmanthlak: Bik Lian
Hakha khua thilcang a phunphun cu Bik Lian (Chan Bik Lian) facebook hmang in nifatin (July 27, 2015 thawk in) thawng a kan thanh khawh cu upat awk tlak ngaingai a si. Hmanthlak le video in a kan hmuh ter khawh caah a hmun um tlukte in tuarpi khawh a si. Media lei rian`uan mi zong an um len ko nain hi lio caan ramdang um caah cun amah tluk in thawng a zamh mi an tlawm. Hakha thawngpang theih duh ah cun Bik Lian facebook kha hei zoh u ti tiang a si. Global chan ah a cang cuahmah mi LIVE in zoh duh cio a si. Hakha khua in hitluk thawng a zamh khawh cu thawngzamh min put in laksawng hmanh pek phu a si.

Tuesday, July 14, 2015

Adblock Plus hmangin hmunthur phiak hna u sih.

Computer hmang in website a kau mi hna nih kan kau lomi tete amah duh in an rak i kau lengmang tawn heo. Culakah pakhat a tel vemi cu thawngzamhnak web tete an si. Cu pawl hmang in tangka hmuhnak ah a hmangmi zong tampi um a si.

Sihmanhsehlaw zei maw caan ah cun cubantuk tete cu hna an hnok tawn. Kan duh naloin kan hmeh sual tikah computer tonghtham zia a thiam ve lomi caah a rawh zong a rawk phah, siloah a taap. Anti virus khamnak zong ngeih lo ahcun a khoih virh dih manh ko.

Cubantuk ralrinnak caah thawngzamh khamnak pakhat hi hman ahcun a ning ngai. Cun website kan kau tik zongah a thianghlim deuh i zoh zong a nuam deuh ngaite. A hlei in google chrome a hmangmi caah cun a ha ngai.

Hika ah hin a link cu ka chiah. A min ah Adblock Plus ti a si. Na hmanmi IE, Chrome, Safari tibantuk kha i thim law download tuahpiak in install tuah colh ko. Nihin tiang ka hmanmi Chrome le Safari ah a tluang ngai. Cun website kan kaumi zong a thianghlim ngai te. 

Thursday, June 25, 2015

Lay Phyu maw Ah Nge dah?

Kawlram chung music band ah cun Iron Cross hi minthangbik an si ko lai dah. Thla fatin show an tuah kho peng. Cu lawng siloin kum 20 tlinnak zong an tuah cang. Atu lio ah cun hawi tuah bal rih lo mi a thar pakhat an hun tuah. Cucu hlasatu pakhat hnu pakhat in LIVE 90 (One Man Show) timi show a si. Minute 90 chung pakhat lawng hlasak a si.

Lay Phyu LIVE 90

Kan hnu thla May ah khan hmasabik ah Lay Phyu nih a rak sak. Thla khat a hun rauh hnu June ah anau pa Ah Nge nih a hun sak ve. Hi hna pahnih hi zapi uarmi an si. Aho dah a aw ha deuh, aho dah a thiam deuh tiphun zong in an rak ceihphai ngai mi hna an si. A cheu nih Lay Phyu an uar deuh bantukin Ah Nge a uar deuh mi zong an um ve hiam.

Anmin thannak kum 15 a rauh hnu Live 90 (One Man Show) timi an sak veve mi an hlasak zoh le aw ngaih a duhmi nan um sual ah a tang link ah rak kau khawh a si.


Nang tah aho deuh dah na uarmi a si? Aho hi dah a thiam deuh le aw ha deuh tiah na ruahmi a si ve?

Hmaithla ah Myo Gyi zong a sa ve te lai. 

Monday, June 22, 2015

KG hi zeidah a si?

Thangthang: NCCF (Norway Chin Christian Federation) a voi thumnak Sunday Church School civui cu kan i nuam bak ve hna hi mu.
Sangsang: Upa le ngakchia kan i zat hna hih ta. Ngakchia civui a si nain upa zong tuah ve khawh kan si ko hen hi.
Sungsung: Hmaikum cu ngakchia anmah lawng an um lio ah upate zong pakhatkhat tuahpi nan hau tinak a si cu.
Pa Bik: Kan fa le hi an men lo! Hamar kan fa le laam hoi hna kha cu Korea vanhai lo kan si ko.
Thaku: KG zong an i tel kha mu, an thiam bak khah!
Pa Lian: Kan bia lak ah, KG hi zeidah a si? Primary, Junior le Youth timi cu a fiang ngai ko nain...
Pengpeng: KG ma na theih lo?
Pa Lian: Aww, zei kan ti lai...
Pengpeng: KG timi cu, ngakchiabik phu an si caah, kilogram tinak a si ko hen cu!

Sunday, May 31, 2015

Ka Ruat Tawn

Salai Lian Biak Hu
20.02.2015
 
Lai miphun cu ramthumnak ah ralzaam dir hmun in kan pem ngaingai hna. Ram thumnak a phanmi hna caah chim bikmi bia pakhat cu Lai miphun kan tlau te lai maw tlau lai lo ti a si ve. Mi tampi ruahnak ah chanthumnak hrawng ah cun kan holh hi mitam u nih cun an thiam te bal lai lo ti a si. Atu lio a thang cuahmah mi mino ngakchia nih cun anmah le umnak ram holh deuh in an i chawn cang fawn hna. Cuti a si ah kan holh, kan ca, kan nunphung hi an tlau taktak te hnga maw ramthumnak a ummi hna caah hin?
 
Hi kong hi chim ceih ngai cang mi a si ko caah kanmah le umnak kong tu hi langhter ka duh. Nihin ni Norway ram Laimi khua sa mi hna hi milu in 2000 kan tling deuh lai lo dah tiah ka ruah. Norway ram a phan ve lo mi hna caah a fawinak bik in tahchunnak lak awk a tha bik cu Lairam a si tiah ka ti. Fing le tlang, lung le bo lawngte an si ve. Lairam cu lam a that lo caah chaklei thlanglei tlawnkai a har ngai bantuk in Norway zong Laimi umnak chaklei thlanglei tlawnkai a har ngaingai. NCCF timi (Norway Chin Christian Federation) biaknak kan i funnak zong ah hin chaklei khuasa mi he kan i fawn kho rih lo. Chaklei khuasa cu Norway mi zong mi tlawm te lawng an si ve.

Tuesday, April 28, 2015

Sung Tin Par Solo Concert nih Kawl hlasa ralrin a pek hna

Sung Tin Par cu hlasa pakhat dirhmun in kum hleinga a tlin hnu ah Solo Concert cu 2015 April 25, Myanmar Event Park, Yangon ah a tuah. Zohman cu kyats 30,000, 10,000, 5,000 le dir buin zoh a duhmi hna caah alak in tuahpiak an si. Ringawn tumtu ah Dream Lover Band an si.

Hmanthlak: Sung Tin Facebook
Hawidang One Man Show, Solo Concert tibantuk an tuah ah cun hlasatu dangdang zong an sawm hna i anmah hla kha an sakpi hna. Sinain Sung Tin Par cu amah lawng bak nih fung 30 a sak. A zohmi hna nih dinh loin fung hra a sak hnu zongah a aw amah ning a simi cu khuaruahhar a si ko an ti cio. Cuti fung hra a sak hnu ah a thil a va thleng ta.
 
Kawlram nu hlasak thiam tiah uarbikmi Tin Zar Maw nih "Tha Khin" (Ka Bawi) timi hla caang hnihnak a sak lio ah a aw tlawmte a ther i ka lau pah tiah a ti. Sihmanhsehlaw cuti a aw a ther cu a hla kha lungzur tuk in a sak tikah a ahmang a chuak, a mitthli a sur caah a si. A hlasak a zohmi nih cun a mitthli aa hnawh lio zong nan rak hmuh lai. Cuti a um cu ka zaang zong a fak tiah Tin Zar Maw nih a ti. Lungzur ngai in a sakmi cu a zohtu zong nih an rak tuar pi cio. Hlasa L Seng Zi zong nih cu hla a sak lio cu ka mitthli ha mang dih tiah a ti ve.

Sunday, April 5, 2015

Laimi tam u sin hmuh khawh mi cauk pathum

Mifim hna nih fimnak cu cauk ah a um an ti. Laimi zong cu bia cu kan theih ve i kan sin in hmuh khawh bikmi cauk pathum a um ve. Ka chawhnak le ka lennak ah cauk a ngeimi hna sin ah cun pathum chungah pakhat cu a um peng. Carel deuh le ca he a pehtlai deuh mi sin ah cun a pathum ning in hmuh khawh zong a si. Sihmanhsehlaw nihin ni ah cun a cauk in a um lo hmanh ah zeiti maw pakhatkhat in cun an i chiah hiamhiam. Cauk pathum an min hna cu a tanglei bantuk in an si.
 
Baibal
Baibal hi holh phunphun in an chuah cio. Laimi zong nih holh tam ngai in leh a si ve cang. A min kan hman ning le kan pek mi zong a dang cio nain a tlangpi in Baibal ti a si. Biana ah King james Version, New International Version, Lai Baibal Thiang tibantuk an si hna. Thawnghachimtu cheukhat nih cun Baibal cherhchan in bia an chim tikah cu ka version nih cun cutin a ti i Lai Baibal Thiang nih cun cutin a ti tibantuk a chimmi zong an um. Chim duhmi cu Baibal cauk nih anmah le min an ngei cio. Baibal a rel deuh le holh tam deuh a rel kho sin ah cun uk tam deuh zong hmuh khawh a si.

Saturday, March 28, 2015

WWE civui zawh hna u sih

 
Wrestling cu TV channel in a thlahmi hna nih LIVE thlah timi hi a tlawm ngai. An thlah zong ah zeimaw caan tete ah an thlah. Cu zong ah cun suimilam 3 chung thlah timi hi a fawi lo ngaimi pakhat a si fawn. Sihmanhsehlaw WWE nih cun zarhtin in Monday Night Raw tiah suimilam 3 lengmang an thlah khawh. Wrestlemania 31 tu cu zanlei suimilam 17:00 in Kick Off suimilam 2 chung le Wrestlemania 31 suimilam 4 chung thlah ding timhtuahnak an ngei.
 
Micheu nih wrestling te hna zoh huam cu a taktak hmanh a si lo mi tiah an ti. A hman ngai taktak, nain a taktak sisehlaw atu bantuk in zoh duh ngaimi a si theng hnga lo. Zeicaah tiah zarh fatin aa pai peng mi aho dah a ṭhawng deuh ti zoh lengmang ding cu ka zoh cia ti ding phun a si tikah zoh zuam ding phun a si ti lo. Nain ning le cang tein tuanbia an ser tikah zoh duhnak tam deuh a ngeih ter.

Saturday, March 14, 2015

Media + Politic = Music

Kum 2015 cu ram uknak kong ah thimnak tuah kum a si. Kawlram lawng ah thimnak siloin UK zong ah thimnak an tuah kum a si ve. Atu lio tein i ernak an ngei cuahmah cang. Kan ram lawngah dai zuar in an um rih ko rua.
 
Ramdang ah cun nan ka thim ah cun cutin kha tin kan kal lai, hihi kan tuah lai i hihi kan hrial lai. Atu lio hruaitu an kal ning hi cutin a si, kan ram caah cun cutin a si, kha tin a si tiah anmah lei ṭang ding in an i zuam. Kan ram tu ah cun an chunmang lawng kha cutin kha tin an ti i a taktak a phak tikah an cung i a tlami rian le ton chom in tuan hna sehlaw cu ko an lo.
 
Ram ṭhangcho hna media an biapit ning zoh ah an chim bantuk a si taktak ko ti khawh a si. Cucu zeidah a si tiah media cu a biapi bik palinak an timi hi a si. Thimnak an tuah tikah party pawl an kong chimtu lawng siloin media hrim nih a rengh in a rengh tik hna ah rammi hna caah mi zei dah thimfung ka thlak lai timi an i fiang ngaingai. Kan ram tu ah cun USDP thimfung a thlami le NLD thimfung a pe lo mi cu heiti tiang lawng ah kan i za rih ko rua.

Wednesday, March 11, 2015

Grammy Award “Stay With Me” copy si ma?

Grammy 2015 ah Award a hmumi hla “Stay With Me” cu hlathar siloin a hlun a si. Kum 2014 April ah a rak chuak i tlawmpal a rauh ah hla ngaitu pawl nih Tom Petty le the Heartbreakers 1989 i an hla “I Won’t Back Down” he aa lo an ti colh. Cuticun October ah an bia zong ceih a rak si. Kaphnih ṭuanvo ngeitu zong an auh hna i hla cu an ngaih ter hna. Sihmanhsehlaw 2015 January zarh dongh lawng ah biafiang a chim.
 
Sam Smith nih “Stay With Me” hla cu Tom Petty le the Heartbreakers zong a phantu ah a telh chih ve hna. Cu hna nih cun hlaphan man 12.5% an hmuh ve lai. Cuticun “Stay With Me” hla cu hlaphantu min ah Smith, Petty, Lynne le Jimmy Napes an si tiah the American Society of Composers, Authors and Publishers (ASCAP) nih a pom piak hna. Cucaah hi hla cu hlathar siloin a hlun a si.

Tuesday, March 3, 2015

Hakha College kan hmuh ning ka cuanh ve ning

Salai Lian Biak Hu
 
Kawlram chungah University/College a ngei lo mi cu Chin ram lawng kan si kan ti. Zeiruang ah dah kan ngeih ve lo timi biahalnak hnu lei zoh ah Kawl cozah nih uico savo cuh in an kan cuh ter caah a si a ti zong an um. Cuticun a si theng lai lo. Duh thimnak an kan pek i kanmah tu nih uico savo cuh in kan rak i cuh tu a si deuh men lai dah.
 
College pek kan rak si i Hakha nih Hakha, Falam nih Falam le Tedim nih Tedim ti a si caah Khaikam ah chiah a rak si ti a si. Sihmanhsehlaw Tedim nih ca an chuahmi pakhat ah cun Chin ram ah college pakhat kan ngei, cucu Tedim ram chungah a ummi Khaikam College a si an rak ti. Chin ram vawlei cu a nem tuk i a min a fawi tuk anti caah Khaikam vawlei cu a tolh rua, Kawl rawn vawilei ah a cang. Caan zeimawzat ah cun Kalay College in Kalay University ah a cang i Chin ram chungah a um ti lo. Chin ram ah college kan ngei ti lo.

Sunday, March 1, 2015

Kan Biaknak nih kan miphun a kilveng ngai hnga ma?

Salai Lian Biak Hu

Norway ram chung ah a tlangpi in Bu pahnih um ti ko u sih. Cu hna cu Norway Chin Christian Federation (NCCF) le Chin Community in Norway (CCN) an si. A dangdang zong an um ko nain hi pahnih hi ka van char. Laimi cu Khrihfa tam u kan si bantuk in kan phaknak hmun paoh ah Khrihfabu kan ngei kho hna. Cu nih cun a kan funtom khawh bik lawng siloin rian zong a ṭuan kho bik khan a si. Vawlei lei i hruainak (CCN) nih cun rianṭuan ding a ngeih ve ko nain biaknak he cuaithlai ah cun chim ngam ding hmanh a si lo.
 
CCN a dirnak zong hi a kum a sau cang. A tluk chel le a dir chel deuh lawng a si. A cheu cu a thei lo hmanh an um kho men. A cheu nih cun a herh lo a ti zong an um kho rih. Cubantuk cun a cheu nih cun zaangba ngai le thluakfak ngai in rian a rak ṭuan zong an rak um ve. Nain cubantuk cu theihpi an si lem lo. CCN a rianṭuannak hrim hmuh a har ngaingai caah a si. Cu nih a langhter mi cu thazaang kan pe lo ti khawh a si.