Kan Biaknak nih kan miphun a kilveng ngai hnga ma?

Salai Lian Biak Hu

Norway ram chung ah a tlangpi in Bu pahnih um ti ko u sih. Cu hna cu Norway Chin Christian Federation (NCCF) le Chin Community in Norway (CCN) an si. A dangdang zong an um ko nain hi pahnih hi ka van char. Laimi cu Khrihfa tam u kan si bantuk in kan phaknak hmun paoh ah Khrihfabu kan ngei kho hna. Cu nih cun a kan funtom khawh bik lawng siloin rian zong a ṭuan kho bik khan a si. Vawlei lei i hruainak (CCN) nih cun rianṭuan ding a ngeih ve ko nain biaknak he cuaithlai ah cun chim ngam ding hmanh a si lo.

 

CCN a dirnak zong hi a kum a sau cang. A tluk chel le a dir chel deuh lawng a si. A cheu cu a thei lo hmanh an um kho men. A cheu nih cun a herh lo a ti zong an um kho rih. Cubantuk cun a cheu nih cun zaangba ngai le thluakfak ngai in rian a rak ṭuan zong an rak um ve. Nain cubantuk cu theihpi an si lem lo. CCN a rianṭuannak hrim hmuh a har ngaingai caah a si. Cu nih a langhter mi cu thazaang kan pe lo ti khawh a si.

NCCF tu cu Khrihfabu kip fonh a si i zeimawzat cu rian a ṭuan. NCCF ngai nih cun zeihmanh a ṭuan ṭung lo, thazaang zong an pek ṭung lo ti a si lai nain NCCF chungtel a si mi hna rianṭuannak zoh ah hmunhma tamtuk a lak. Riantam tukte a ṭuan. Khrihfabu kip an rianṭuannak kha a leng in cuanh ahcun NCCF he an i pehtlai cio hna. Cu nih a fianter ngai mi cu Biaknak nih a kan funtom i a kan hruai khawh bik khawh a si.

 

Cuti a si ah biaknak nih hin tah kan miphun hi a kilveng ngai hnga ma timi biahalnak hi nihin ni ah cun ruah kan hau cang ko rua. Khrihfabu rak dirh ka cio lio ah cun a tlangpi Pathian ramkauhnak, miphun kilvennak tibantuk kha an rak i tel cio lai dah. Kan fa le hna zong miphun dang sin an tlau lonak ding tibantuk khua rak khan cio a si ṭheo ko lai. Sihmanhsehlaw nihin ni kan umtu zoh ah kan rak i timhmi bantuk in rian kan ṭuan maw, kan zul maw, zeidah kan tuah?

 

Kannih Khrihfabu cu miphun kilvennak tibantuk kan ngei lo a timi nan um sual maw? Cubantuk nan um sual ahcun hi bialhalnak hi van ruat ve u law ka duh. Zeiruang ah dah Khrihfabu kan dirh theng? Kanmah te lawng um in Khrihfabu kan dirhmi hi zeidah a si? Norway holh kan thiam lo caah kanmah te pumhnak kan i ser timi bialehnak a si sual hnga ma? Nihin ni ah Norway holh kan thiam lo nain kan fa le kan tu le chan ah cun an thiam ko lai i nihin ni kan Khrihfabu sullam ngei a si ngaingai hnga ma? Khi tikah cun Norway he fonh in pumh zong ah a poi lo tinak ma a si kun hnga?

 

Khrihfabu nih a kan funtom bik bantuk in Khrihfabu nih kan miphun kilven zong hi rian khat ah a chiah ahcun kan miphun tlau lonak ding ah lam ṭha ngai a si hnga. CCN hmanh ṭhaṭhi rian a ṭuan khawh lo lio ah kan biaknak lei zong in miphun kilvennak a thlau chinmi a lo.

 

Rogaland Chin National Day tuahnak ah Laithil sunsak ding kong pakhat nih a chim an ti. A herh ah ka ruat lo. Sihmanhsehlaw kan si ning zoh tikah kan luan tuk cang timi a langh ter. A chimmi zoh tikah i sum khawh tilo ruang i a chuak mi a si ti a fiang. Cu i a phi chuak cu kan tlau ko lai lo ma timi biahalnak a chuah ter. Cun zeiruang ah dah hibantuk biahalnak hi a chuah tiah cun kan biaknak in a ra ti khawh a si fawn.

 

Cawnpiaktu cheu khat nih Lai thil cu khuachia thil, Lai laam cu khuachia laam tibantuk cawnpiaknak a um tikah Lai thil zong i hruk ti lo, Lai laam zong laam ti lo ah cun miphun pakhat kan sinak a tlau ko lo ma? Holh kan ti tikah kan fa kan tu le chan ah cun Norway holh an thiam cang ko lai i Laiholh tu cawnpiak hau an si lai. An thiam lo tikah an caah a poi nak zeidah a um hnga? A poi lo ah cun kan holh zong a tlau chih lai i miphun kan sinak zeidah kan langhter ti lai? Hla chinchin cu Norway ah Lai hla an sak ka thei rih lo. (A sa mi zong an rak um ko lai.) Ram kan ngei kan ti lai ma, kan tu le chan ah khi ka khi kan ram ti cu chim lo nihin ni kan fa le hmanh a thei lo an um kho si. Cuti a si ah miphun pakhat kan sinak zeidah kan langhter khawhmi um ti hnga?

 

Miphun a tlau zongah kan thlarau vanram a phak ah cun a za ko kan ti lai ma? Cubantuk ruahnak a um ahcun Khrihfabu kan dirhmi hna hi zeidah an si kun hnga? A um cia Norway mi Khrihfabu sin ah kan i fonh ko lo? Khrih thawngṭha kan karhter lai kan ti lai ma? Holh theih lo pumhnak ah aho dah rak i pum in thlarau thazaang a lak ve hnga? Cubantuk cu um rih seh kanmah le kanmah i zoh tuah hna u sih. Zeicaah dah Khrihfabu kan i ṭhen? Khrihfabu chung lila ah tah remnak, daihnak a um taktak ma? Norway mi nih zeitin an kan hmuh? Zeitin dah Khrih thawngṭha cu kan karh ter lai?

 

Pathian nih a kan dawt tuk. Miphun kip sin ah a thawngṭha karhter a kan fial. Miphun kilven a kan fial. Nihin kan kal ning kan kal rih ko ah cun kan biaknak nih hin kan miphun hi a kilvang ngai te hnga ma?

Theihawk: Norway khuasa mi zoh in ṭialmi a si.