Sunday, November 30, 2014

Kawlram Kong ah Norway Mi Ralrin An i Pe

Norway Siangpahrang Harald le Siangpahrangnu Sonja cu nihin zarhpini zanlei (30.11.2014) ah Kawlram an phan. Ninga chung caam ding an si. Kawlram ah khuasami Norway mi hna nih Siangpahrang nupa cu an rak don hna.

Siangpahrang nupa cu president Thein Sein le Nobel daihnak laksawng hmutu Aung San Suu Kyi he zong tonnak an ngei lai. Cun cacawn nihnih ni (02.12.2014) ah Siangpahrang Harald cu Yangon University i Convocation Hall ah democracy kong siangngakchia hna sinah chimnak zong a ngei lai. Ramkong rianuan mi a dangdang zong tonnak an ngei hna lai i Thura Shwe Mann he zong tong in biaruahnak an ngei lai.

Siangpahrang nupa an caam chungah Norway ramdang palai le chawlet palai nih umpi in an zulh ve hna lai. Kawlram ah Norway chawlet rianuan mi hna nih riannganpi bunh in uanding zong an thawk cuahmah cang. “Kawlram ah kum 13 cung cun rianuannak nawl an pek hna nain kannih cu kan phung kan kilven ko lai. Norway hrambunh in rianuan mi hna nih an rian ah ngakchia rianuan ter lo ding in kan kilven lai,” tiah chawlet palai Monica Mæland nih a chim.

Thaizing in cun Siangpahrang nupa nih Kawlram cozah sinah lennak an ngeih cang lai caah Norway mi nih chawleh rian le bawmhnak le daihnak sernak kong hi cawh sual lo ding in Norge Folkehjelp (Norway Mibawmtu Bu) nih ralrinnak bia an chim.

Ch: NRK, TV2

Saturday, November 15, 2014

Chin Idol maw Lai Idol

Salai Lian Biak Hu
 
Idol cu vawleicung hlasak zuamnak minthang phunkhat nih hmanmi min pakhat a si. Cucu tukum 2014 zong ah Laimi nih hman le tuah a si ve. Chin Idol maw Lai Idol timi tlangtar hmuh cang ka in a chuak khomi ruahnak maw Chin Idol ti hman maw a hman deuh Lai Idol timi a si kho men. Nain hi ca nih hin cu kong cu a ruahchan mi a si lo. Kum khat chung ah hramthawk in Laimi nih tuahmi Idol pahnih hi hei cuanh chunnak a si.
 
Chin Idol an tuah lai i Chin Association for Christian Communication (CACC) nih tlangtlakmi a si lai ti a si cangka bia-alnak a chuak colh. Biapi cu CACC nih Idol timi biafang an hman ruangah ti a si. Internet hmang mi Laimi nih cun hi kong a thei lo an um tuk lai lo. Idol tuah ding timi thawngpang theih cangka in an tuah tiang ceihphai ngai a si.

Friday, November 14, 2014

Thluak

  • Thluak nih thil hngalhnak 100 trillion a khon khawh.
  • Second caan kar ah thluak nih takpum thahri chung in theihnak 100 million leng a cohlan.
  • Nikhat ah thluak thahri 1000 a rawk. Cu a rawkmi cu a remh ṭhan kho ti lo i chingchiahnak a ngeihmi zong a kilveng kho ti lo.
  • Thluak nih fahnak a tuar lo. Siibawi nih thluak operation a tuah tikah mizaw nih fahnak a tuar lo.
  • Ngakchia a chuah ka thlaruk chung tiang cu a thluak let hnih in a ngan.

Thursday, November 13, 2014

Kawlram milurel 2014

Milurel cu kum hra ah voi khat rel tawn a si. Cubantuk cun Kawlram zong kum hra ah voi khat 1872 thawk in milu cu an rak rel tawn. Sihmanhsehlaw thil phunphun ruangah 1983 hnu in milurelnak an tuah kho ti lo. Ralkap pennak an hun thlen i demoracy hruainak kan zul ve lai an hun ti hnu 2014 ah milu relnak cu tuah ṭhan a si. Hmasabik rampumpi milurelnak an rak tuah cu 1638 ah a rak si.
 
Kawlram cu 30 March 2014 in 10 April 2014 tiang milurel cu thawk ṭhan a si. Cuti milu reltu ding ah sianginn cachim minung 100,000 nih ṭuanvo an lak. Kawlram chungah miphun 135 in ṭhen a si. A tlangpi cun Bamar, Chin, Karen, Kayah, Kachin, Mon, Rakhine le Shan tiah an ṭhen. Cu hna chung cun a dang in an hei ṭhen chin hna.