BAWINU

Zing Mang

Bawinu tiah kan auh.

Nangmah nak sang an tampi, sangchin.

Nangmah nak thiang an tampi, thiangchin.

Nangmah nak duhnung an tampi, duhnungchin.

Hmanhseh bawinu cu nang na si.

Zalamtlang naa chawh ah

ho nih an in hliah lo.

Ho nih na lungvar lukhimh an hmu lo, ho nih

an zoh lo na kal sin na kai sui sen puanpar,

a um lo puan.

Na hun chuah zawnah

tiva vialte ka pum chungah

an awn, darkhing nih

van cu an hninh i,

hla nih vawlei cu a zelh.

Nang le kei lawng,

nang le kei lawnglawng nih, ka dawt,

cucu kan ngaih.

---

Pablo Neruda, The Captain’s Verses, 1972.

Translated by Donald D. Walsh

Nungak Innhmai Zuri Pawl Sak Ding Hla

(a cheubang)

Salai Zing Mang

“Maria,

na min ka philh sual ding ka phaang,

zan harnak sin a chuak i

lianngannak ah

Khuazing a tluk kho bia fang khat

philh ding hlaphuahtu nih a phaan bang.

Na pum cu

ka zohkhenh lai, ka dawt lai

ral ah

a bul, hngartu um lo

a duhtu um lo

ralkap nih

a ngeihchun a ke khatlei a zohkhenh bang.”

(Mayakovsky)

+++

Ka ttang in a parmi

mei-alh

athar

a thar rimthaw hna he

ka ttang cu a hmui.

Ka ttang cungah

ziam, a zungzal

na par, na tharnak ding

na parter, na hmuiternak ding

na ci ca non a si ding

lei ah hin.

Khuasik chuah va nih an hmul an ithlen bang

ai fim

kan duhnak

an ivawrh

mihrut nih a hruh aa theih lo bang

amah le amah

um ah a dir pangpar bang

do a tla

zingniceu sin

siangngakchia tharte

a hmai ah

a chuak ninu a tlaan le

khuadawm an thlaam cu

neem tein a lin

pan tein a sen.

+++

Thinlung cu zu nih a khah kho lo, valrual hna.

Zan cu hla in liam seh, valrual hna.

Laaknak: Salai Zing Mang, Thlimnak, 2007 chungin

Kan Nunzia

DKTluang

( I )
"Mi lo ah
Zu le zawng,
An i seh," timi
Phungthluk te kha
Hun ruah thanah
Atu lio Laimi
Kan nun/umtu hi
A si ko lo ma?
"Vawlei cu aa thleng kho lo nain,
Minung lungput cu aa thleng kho."

( II )
"Hmurfung bia laa
Zaangfung thahnem"
Biachim nih thiam
Zei tuah fawn lo
Na chimmi bang
Hei tling/si sehlaw
Zaangfung thahnem
A si hnga mu?
"Chim lawng theih i;
A tuah theih lo hi sual phunkhat a si."

( III )
"Sanglai inn ah dir"
Na tuahmi thil
A theitu nang
Na ton lai thil
A hmutu Pathian
"Sanglai inn ah dir"
"Thil cu tuah sual khawh a si;
Nain tuah hraam lo cun tuah sual cu a har."

Pangpar

Salai Zing Mang

A rak i-aih tawnmi angki leng a sente
aThawng te innleng i a rak cheuhmi pear
ca a va piah tawn ai her i a lang tlang linak khabe zumte

kum tampi a rauh tikah cun
tampi an rak taang lo
cutin kum tampi a rauh tikah cun
tlawmte in lungne a tho ko.

Semmawng lio izah bu itlaihchannak cu
kum an liam par bang a rak ziam.

Caan ai leh sin par tthan ser dingah maw
a rim a rak taan
a ziamh lung riam lo ruangah dah
atu tiang a hmui, pangpar aw...

[2010 June 30]

Minmei sin cakuat

John Thang

Nang cu

Nika na phenh ah

Nitlang tomi nih an in mawhchiat,

Nikhua linmi nih an in thanthat,

Nain

Nang cu

Na kalning tein na kal pengko.

Nang cu

Naa sem lio kha

Ho nih theihpiak um lo,

Na tian zong kha

Ho nih zeirelpiak um fawn lo.

Nang cu

Thangthat na ton ah

Ho nih lawmhpi um lo,

Ngaihchiat na ton ah

Ho nih hnemh um hlei lo.

Ruahpi khi na mitthli si hnga maw?

A si ahcun

Kei cu

Inncungcih awng in a zutmi ruahti

Donhnak khengkur chiate si ko ning.