Tuesday, June 21, 2011

Ban Ki-moon a rian a peh

Ban Ki-moon, UN GS
Ram 192 fonh a simi bu United Nation ah Ban Ki-moon cu Secretary-General rian kum 5 apeh ṭhan lai. Tuchun (June 21, 2011) UN bupi meting ah atu bantuk in hnatlak cohlannak an ngei cang. A rianṭuan caan cu 1 January 2012 in 31 December 2016 tiang a si lai.

A rian pehthan dingah kan hnulei zarh khan Security Council nih a pariatnak UN hruaitu si dingin an hnatlakpi ṭhanmi a si. Chungtel a simi ram hna zong nih lunglawmte in hruaitu si dingah an cohlan ve.

Ban Ki-moon nih UN Secretary-General rian a ṭuan thawk kum cu January 2007 in a rak si. Atu hi a voi hnihnak a peh a si. UN Secretary-General rian a ṭuanmi lakah a pariatnak a si. Amah cu kum 67 a si cangmi South Korea mi a si.

Global Trends Report 2010

Sunday, June 19, 2011

Chris Medina/What Are Words

Chris Medina nih ngaknu pakhat a ngeih. A ngaknu cu ṭhit dingin Chris Medina nih cun a hal. Cutikah a ngaknu nih cun khuaruahhar lawmhnak he a rak cochlan ve. Sihmanhsehlaw vanchiat ah a ngaknu cu accident a tong ai. Cuhnu cun mi tlamtling lo mizeng ah aa chuah. A mit zong khua hmu lo, a kal zongah ṭhutdan nam chom in a si cang. Nun chan ngei lo tluk in an lung a rawk.

Sihmanhsehlaw a dawt a ngaknu cu kan umpi peng ko lai, na rak chimmi kha zeidah a si, dawtnak kan timi hi zeidah a si, na sinah ka um peng ko lai tiah hla in a hun sak. Cu a hla cu atu lio Norway ram ah zarh kuanak Top 1 ah hmunhma a lak lio a si tiah VG nih a thanh.

Thursday, June 16, 2011

2010-11 Lairam tanghra camipuai awng cazin


Kan hnulei June 4, 2011 ah khan Kawlram pumpi sianghleirun luhkhawhnak camipuai (tanghra camipuai) awng cazin a chuak. Nikum nakin tukum tanghra awng cazin a chia deuh ngai. Lairam in siangngakchia 8008 nih an phit i minung 1095 an awng. Zatuak in 13.67% a si. Nikum 2010 ah cun siangngakchia 8706 nih an phit i 1426 an awng. Zatuak in 16.38% a si.

Atu bantuk in siangngakchia a awngmi an tlawm chinmi hi a cheu nih cun kan hnu Kawlram pumpi party tling thimnak i theipar ruang zongah a si kho men tiah an ti. A hlei in Hakha le Thantlang ah cun Chin National Party (CNP) nih hmun hma an lak ngai. Cun Matupi zongah Union Solidarity and Development Party (USDP) nih an duhning in thil an hmu lo. Sihmanhsehlaw tanghra awng cazin a chuah cun Hakha, Thantlang le Matupi ah tlawnte lawng an awng ve.

Nikum ah cun Distinction sangbik ah 5D tiang a si nain tukum ahcun 4D tiang lawng an hmu. Cun a dang D an hmumi zong a tlawm ngai. Nikum ah 1D 83, 2D 7, 3D 10, 4D 1 le 5D 1 an si. Sihmanhsehlaw tukum ahcun 1D 52, 2D 7, 3D 1 le 4D 2 lawng nih an hmuh. Lairam chung in sianghleirun luhkhawhnak camipuai phi zat le awng zat hna cu a tanglei bantuk in a si.

No.
Khua
Phi
Aung
Zatuak
4D
3D
2D
1D
01.
Falam
834
204
24.46%
1
1
2
15
02.
Kanpatlat
241
58
24.07%


2
1
03.
Mindat
644
125
19.41%


2
10
04.
Tiddim
1040
201
19.33%



12
05.
Hakha
1637
219
13.38%
1

1
8
06.
Tonzang
329
34
10.33%



2
07.
Palatwa
1214
124
10.21%



2
08.
Matupi
1365
93
6.81%



2
09.
Thantlang
704
37
5.26%





Fonh
8008
1095
13.67%
2
1
7
52

Atang hmanthlak ah hin tling tein hmuh khawh a si.











KIA le Kawl Ralkap donak

Victor Biak Lian

Kumpi kum 14 chung tlangcungmi dothlengbu 18 tluk hna he daihnak kan ser tiah Kawl ralkap cozah SPDC nih vawleicung ah hmaihngal ngai i, a chim tawn mi “hriamnam le daihnak kan thlen” ti in an au tawnmi cu September 1, 2010 ni thawk in a rawk dih. A sullam cu uknak phungthar Constitution kan ser cang i, kan ram ah democracy phung bantukin thimnak kan tuah cang lai. Cu hnuah cozah thar kan ser khawh in democracy phunglam in kan i uk cang lai caah, cu kan phunglam nih ramchungah hriamtlai ralkap pakhat lawng um ding a ti. Cucaah, nan ralkap vialte hna hi, ramri zohkhenhtu ralkap “Border Guard Force” ah nan i thleng dih lai, cu thlen a duh lomi paoh cu phunglo ummi bu “Illegal Organization” ah ruah nan si lai an ti hna. Bu a hmedeuh tete a simi hna a tam deuh nih cun an dirhmun, an thazang zoh in zeidah kan i huah lai ti kha an zenh caah, an ti bantuk hna cun, ramri cawng ralkap ah a cang na, a cheukhat cu pyithusit “militia” ah aa thleng na an si. Sihmanhsehlaw, thazang a thawng deuh mi ralkap bu Kachin Independence Army, United Wa State Army le Shan State Army North, New Mon State Army pawl nih cun, an dal hna.

Tuesday, June 7, 2011

2010-11 tanghra camipuai awng cazin a chuak cang

BEHS 2, Sanchaung, Yangon
2010-2011 cacawn kum i sianghleirun luhnak (tanghra) camipuai awng cazin cu June 4, 2011 zarhte ni ah a chuak cang. Zapi hmuh ding in tar a si ko nain lam a ṭhat lo ruangah khua zeimawzat cu Myanmar Radio nih June 4, 2011 zing slm 8:00 in thawng an thanhpiak hna.

Myanmar Radio nih thawng a thanhmi hna cu Kachin cacheknak zung khua 9, Kayin cacheknak zung khua 3, Chin cacheknak zung khua 6, Rakhine cacheknak zung khua 4, Shan cacheknak zung khua 23, Tanintharyi cacheknak zung khua 4, Magway cacheknak zung khua 8, Sagaing cacheknak zung khua 3 le Yangon cacheknak zung khua 1 hna an si.

Lairam chung i Myanmar Radio in thawngthanhmi khua hna cu Kanpatlet, Matupi, Rezua, Lailenpi, Mindat le Paletwa i cacheknak zung hna an si.

"Atu bantukin zarhte ni ah awng cazin an thanh hi a um ka thei bal lo. A um zong a um kho ko men. Nain kum 30 chung cachimh rian ka ṭuan chungah ka thei bal lo," tiah kum 50 leng a si cangmi tanghra cachim pakhat nih a chim.

Kum fatin sianghleirun luhnak (tanghra) camipuai a phimi dihlak sing ruk tluk an si tawn i a awng mi zatuak in cun 30% tluk an si tawn tiah Weekly Eleven nih a ṭial.