Chin Idol maw Lai Idol

Salai Lian Biak Hu

 

Idol cu vawleicung hlasak zuamnak minthang phunkhat nih hmanmi min pakhat a si. Cucu tukum 2014 zong ah Laimi nih hman le tuah a si ve. Chin Idol maw Lai Idol timi tlangtar hmuh cang ka in a chuak khomi ruahnak maw Chin Idol ti hman maw a hman deuh Lai Idol timi a si kho men. Nain hi ca nih hin cu kong cu a ruahchan mi a si lo. Kum khat chung ah hramthawk in Laimi nih tuahmi Idol pahnih hi hei cuanh chunnak a si.

 

Chin Idol an tuah lai i Chin Association for Christian Communication (CACC) nih tlangtlakmi a si lai ti a si cangka bia-alnak a chuak colh. Biapi cu CACC nih Idol timi biafang an hman ruangah ti a si. Internet hmang mi Laimi nih cun hi kong a thei lo an um tuk lai lo. Idol tuah ding timi thawngpang theih cangka in an tuah tiang ceihphai ngai a si.

 

Sihmanhsehlaw Chin Idol cu nithum chungah an lim colh. Minung 30 leng an i zuam kho. Sinain cu Idol zuamnak a tlangpi in zoh ahcun Idol zuamnak a langhnak a um lo ti khawh a si. Zeicaah tiah cun hmasa bikah Idol zuamnak a si bantuk in “Idol” timi logo zong a um lo. A min lawng kha Idol ti an hman menmen a si. An tuah ningcang zong Idol zuamnak a lawmhnak a lang tuk lo. Biakhiaktu (hmakpetu) zong hi Idol ah cun minung pathum li lawng an si deuh nain Chin Idol cu minung pakua an si tiah thawng theih a si.

 

Chin Idol zuamnak, Hakha
Hmanthlak laknak: Chinland Today

CACC nih Idol a thimmi zong hi zeitluk in dah hlasak thiam ding in an bawmh i an sersiam timi zongah bawmhnak a um lo ti khawh ding in a um. A ruang cu nithum chungah hlasa thiamlak in cawnpiak cu a fawi lomi a si, atu bantuk caan ah cun. Cun Idol zuamnak cu caan sau la in zuamnak sermi phunkhat a si. Cun Idol a zuam mi hna cu chim lo pakhatnak, pahnihnak le pathumnak a hmumi hna hmanh kha anmah le anmah an i thei, kom manh bal lai lo. Cu nih a chuah ter khawhmi cu ka ngah awk a si ko nain, a ngah awk a si ko nain, a thiam deuh ko nain timi biasiphainak zong hi ruahlo leng in a chuak kho. Cun Idol a si mi ca zongah laksawng an pekmi lawng kha maw a si hnga hmailei ruahchannak an pek khawhmi a um hnga maw?

 

Hakha a ṭhangcho ve ko ti a langhnak pakhat cu Chin Idol zuamnak hmun ah a kal kho ve lo mi nih anmah le inn cio in Hakha le Thantlang ah cun TV channel in an rak zoh khawh ve mi hi a si. Nain ramdang bantuk azohtu nih thimfung thlaknak tuahtu cu kan rak i harh ngai rih ko lai dah.

 

Chim duhmi cu Chin Idol zuamnak cu CACC nih hlasak zuamnak a tuah tawnmi kha Idol min hmang in zuamnak a tuah ti men khi a si. Nain rak i al lengmang mi Idol phun kha cu a si lem rua lo. An rak i al lengmang mi hmanh kha al phu a si hngamaw timi ruah awk a um ngai. Idol zuamnak hmanh kha tluk lawng a si rih ko ahcun X factor, The Voice ti phun khi cu ruah ngam dawh kan si rih rua lai lo.

 

Lai Idol zong tukum ah khuathlang lei ummi Lairam Media Group (LMG) nih an rak tuah ve. Annih cu Idol zuamnak lawng siloin Laiholh cawnnak zong an kemh chih. A tlangpi in zoh ah cun a pahnih in an tlinh ti khawh a si. Hlasak zuamnak i a telmi hna zong hlasak an rak thiam mi le an aw ṭhatnak zong Idol an i zuam hnu in tampi an i chap lai ti khawh a si. Anmah a zuammi cu chim lo hlasak a zuam ve ko i Lai Idol a zoh ve mi nih cun hlasak lei ah tampi an i chap lai dah.

 

Lai Idol zuamnak, Lawngtlai
Hmanthlak laknak: Lawmsangzuala Chinzah (FB)

Lai Idol zoh ka ah cun zeidah an chim ti hmanh micheu khat cu a fiang lomi kan rak um lai dah. Midang cu um rih hna seh caan tlaitu hmanh nih bia ka hal hna sehlaw ka fiang lo kho men. Sinain a donghnak zan hun zoh ah cun thlahnih kar ah an rak thiam taktak khi a si. Caan tlaitu zong hi faphir si hna seh law cu ko cu an lo.

 

Lai Idol zuamnak cu hla lawng siloin holh zong biapi an rak chiah bantuk in Laiholh thiam lo ruangah awtha, hlasak thiam a tel kho lomi tampi an um timi an biachimnak in theih khawh a si. Nain a zuammi cu minung 50 leng kai an si tikah an za tuk ṭhiamṭhiam ko.

 

Mah le cantawk cio ah cun Lai Idol tuahmi cu tlamtling ngai ti khawh a si. Nain muidawh soikhat phor tiah biadangpi chim ko ninglaw mitam u cu kenret te an ngei cio. Cucu zeidah si tiah an kaa a lawng bal lo. Umhar ngeih lo dawh an si.

 

Pu A. Ceu Hlun nih kan hnu lei ah Laihla a hlamnak kong ca a ṭial. Lai Idol hi rak zoh ve sehlaw zeimawzat a lung a hnemh men lai. Lai Idol zuamnak hmun ah pei Laihla an um ko hi ti awk in a um. Amah bal chanthar hlaṭha tampi zong upa hna lungthin ah lut kho ve sehlaw mino hna caah lung a si ngai ve hnga.

 

Laiholh caan tawite ah thiam duh ahcun Hakha lei ah panh, Laiholh biaṭha, holhthuk pawl fawite in char duh ahcun rilhcia mi a umnak khuathlang lei ah panh ding timi ka lung ah a chuak. Idol a tuahtu, Idol a si mi hna le a zuammi hna Pathian nih ṭhangcho ding in thluahchuah chin ko hna seh.