Hakha mincimh le a hnu zul

Hakha mincimh cu ngaih a chia, mitthli he lung a ping. Zei khua hmanh aa ruat kho lo. Ka umnak `ih a nung tuk cang, innpa ka bawm u ti zong ah an rak si cio. "Vawlei he ka naih cang, khoika dah ka ruak suan a si te lai," timi bia ko nih lung a hnoter chinchin.

Pehtlaihnak lam vialte a rawh dih tikah thli cung lawng in kan i pehtlai kho cang. Khuachung um khualeng an chuah khawh ti lo bantuk in khualeng um zong khuachung an lut kho ti lo. Nitin eidin ding kong ah van a sang. Thilman a kai colh. Cawk awk zong a har. Cu lakah thilfir zong an chuak ve. A thil tlau mi zong nih an ngeih leh lo cu ta tiah a ngaithiam kho tu zong an rak um ve.

Upat pek awk tlak

Vawlei ramkip a culmi Hakha Mincimh hmanthlak.
Khuadang in a rami nih Hakha ka phan ti fianternak ah
hika hin hman an va i thla ta tawn.
Hmanthlak: Bik Lian

Hakha khua thilcang a phunphun cu Bik Lian (Chan Bik Lian) facebook hmang in nifatin (July 27, 2015 thawk in) thawng a kan thanh khawh cu upat awk tlak ngaingai a si. Hmanthlak le video in a kan hmuh ter khawh caah a hmun um tlukte in tuarpi khawh a si. Media lei rian`uan mi zong an um len ko nain hi lio caan ramdang um caah cun amah tluk in thawng a zamh mi an tlawm. Hakha thawngpang theih duh ah cun Bik Lian facebook kha hei zoh u ti tiang a si. Global chan ah a cang cuahmah mi LIVE in zoh duh cio a si. Hakha khua in hitluk thawng a zamh khawh cu thawngzamh min put in laksawng hmanh pek phu a si.

Bawmhnak

Thawngpang chia cu lei a cul tikah zawnruahnak lungthin a ngei mi pawl nih zuan hnawh colh cio a si. Ramchung Kawlram dihlak theih in min a ngeimi cu Wai Lu Kyaw le Bu min in cun KBZ an si lai dah. Hakha phanh duh le thil kuat duh ahcun KBZ bochan deuh in lam kal a hau. Hibantuk bawmhchanhnak ruangah anmah lei Kawlmi karlak ah biasiphainak zong a um len. Cun hmun kip in Chinmi hna zong nih bawmhnak an pek bantukin bawmhnak a kawl mi zong um a si.

Biaknak le vawlei

Hakha mincimh thawng a than cangka in biaknak lei zong in bia a chuak colh ve. Pathian dantatnak, kan sual tuk cang caah tibantuk bia phunphun a chuak. (Certual i thla an cam zong kha hi bia he i pehtlai sehlaw a dawh.) Hi thil kong ah biaknak he pehtlaihnak a um lo, kokek thil sining nih a ngeih mi a si ko a ti zong um a si ve `hiam. Hi thil nih van mi le lei mi tiah fak tuk in a kan `hen sual lai ti zong phan a um ngai.

Chinram khualipi `hial a timtu cungah lawmhnak

Hakha mincimh tlawmpal ah MP Con Kheng nih Hakha cu vawlei a dor caah Falam peng ah khualipi `hial ding in ca a `ial. Cun MP Van Cin nih Bungzung lei ah Hakha khuathar ser ding in ca a `ial ve. Asinain a ca cu a lak `han. Khualipi `hialnak kong ah Hakha lei mi zong a biafak mi an um len. Hi kong ah mizeidah zei lungput a ngei i mizeidah zei lungput a ngei timi a langh ngai tikah MP hna cungah lawmh a um ngai. Nihin ni i nuhrin covo ti lengmang mi zong a thar in hngalhnak a kan chap ngai lai.

A thar

Hakha cu a cheu tluk a rawh tik le um awk a `hat lo caah hmunthar ah i `hial a hau. Hi thil nih thilthar tampi a chuahter lai. Atu tiang ah hmunthar tambik zohmi cu Falam lam lei a si tiah theih a si. Cuka lei ah cun Hakha College ser ding mi he zong a naih deuh te lai. Khuathar a si lai bantuk le fimthiamnak chan a si bantuk in ningcang tein ser a si lai tikah a `ha in a dawh deuh fawn lai. Cun nawlngeitu cozah zeitluk in a biapit timi le khuami hna ziaza zeidah a si timi a lang ngai te lai. Cucaah zeipaoh te ah thilri ah siseh lungthin ah siseh a thar lawngte a si lai.

Zeikhom a si ah harnak kan tonmi chungin nuamhnak a chuahpitu si hram ko seh. Thil`halo chung in thil`ha a chuak, a dawh lo mi chungin dawhnak a lang, a rawk mi chung in `hatnak chuak hram ko seh.