Ruahchannak A Dong

Salai Lian Biak Hu

Khua pakhat cu rilinih a kulh mi a si caah an vawlei ngeihmi a bi ngai. Cinthlaknak vawlei hmunhma zong an ngei lo ti si. Innhmun bak lawng an ngei kho. Cu caah rili khat lei ral ah rawl hi an va phiar tawn. Cun mithawngtha le mirum mingei deuh cu rili ral ah sianginn zong an va kai. An khua ah tang li ting lawng cawnnak a um. Catang sang kai a duhmi cu rili ral ah an va kai tawn ti a si.

Khuami hna nih varal kalnak ah an hmanmi cu tilawng le tinbaw deuh an si. Cu zong cu zapi nih ngeihmi a si lo tikah zaran cu kal kho lo in an um. Mi nih an umnak ah an rak zuarmi tu caw in khua an sa ve hna ti si. Cuti an har cu khuami hna nih an ruah tikah rili ah hin hlei i donh sehlaw a tha tiah khua an khan ti si. Cu hlei donh ding cu an khua i ummi company pakhat kha tuanvo kan lakpiak tiah an ti, ti a si.

Company nih cun hlei cu donhding ah khua chung i a ummi engineering pawl kha tlangrian tuan dingin a sawm hna ti a si. Engineering pawl zong nih cun kan khua caah pei a si cu tiah lungthote in tlang rian cu an i thawh ve ti a si.

Hlei cu an hun donh thluahmah. Hlei donh a va dih tik i an hmuh lai dingmi theipar mitthlam cuanh ah an tha a tho tuk ti a si. Caan tlawnpal a hun rauh ah khin hlei donhnak thilri le tangka chuahchungmi kha a dih ti si. Cutikah engineering pawl nih cun company sin ah kal in kan thilri a dih, thilri a chambau rihmi zalpiak kan hau tiah thawng an hei thanh hna ti a si. Company i hruaitu pakhat nih cu duh sah in kan van tuah te lai tiah a hun leh hna ti a si.

Hlei donhnak thilri a um lo tikah riantuantu pawl cu an rian an i din chung ti a si. Company nih hlei donh an zoh tikah a dih ti lo. Ziah riantuantu pawl tah an ti tikah an i din chung tiah an leh hna ti a si. Company hruaitu pakhat nih cun cubantuk riantuan cu, hlei donh le an duh fawn, rian le thathi an tuan lo. Hlei zong hi mi nih an zawh bal lai lo cu, ti lawng le tinbaw in an kal cio ko hen hi, tiah zeirello ngai in a phunzai pah ti a si.

Hlei donhnak ding ah company lei in thilri an chuah hlei lo tikah engineering cheukhat cu an rian in an chuak ti si. Cuticun riantuantu an hun tlawm deuh tik le company nih hleidonh kong zeihmanh an rel lo tikah an rian hma a kal kho ti lo ti si. Cun an donhmi hlei zong cu hman awk tha theng lo in a tuah ti a si.

Nikhat cu khuami pakhat nih hlei donh hi kan herh hringhran ko, hlei kan donh lo cu a si kho lo, kan donh hrimhrim a hau ko tiah chunmang a manh len ti si. Sihmanhsehlaw hlei van donh ding ah a dihmi tangka a tamtuk. Zaran nih donh khawh a si lo tikah a lung a dong ngai ti si. Asinain hlei a rak donh bal i an khua ummi company nih cun an donh khawh ko lai, hihna sin ah bawmhnak hal ah a tha lai ti kha a ruat ti si.

Nikhat cu an khua i ummi company sin ah cun a va kal ti si. Hlei dang donh a herhnak kong, zaanhlei cawi in hlei donh aa timhnak kong le a chunmang kong cu a hei chim hna ti si. Cutikah company nih cun an rak lawmh tuk i thazaang zong an pek len ti si. Hlei donhnak dingah hin tangka kan in chuahpiak lai i rian cu tuan ko. Sinain kanmah ta a si lai i kan kut tangah a ummi a si lai tiah an ti ti a si. Sihmanhsehlaw khuami pa nih cun anmah ta si ding cu a duh ko nain anmah kut tang i um ding cu a duh ve lo ti si. Zeicaah tiah hlei dang an rak donh bantukin zeirel lo in an um lai i a rawk than sual lai ti kha a phang ti si.

Hlei donh kong ah cun bia cu tam deuh an hun i ruah hna ti si. Khuami pa te nih cun hlei donh dingmi ah hin hlei a hmang mi paoh nih hleiman pek a si lai ti kong zong a chimh hna ti a si. Cutikah company nih cun hleiman pek ahcun a miak tuk lai cu ta tiah an zaang a hung ram colh i hleiman cu kanmah nih kan co hrimhrim a hau tiah an ti ti a si. Khuami pa nih cun hlei zohkhenhnak le a herhbaumi tete caah hleiman lak a timhmi cu a si. Cun hlei zong cu khuami vialte nih an hman khawh ding kha a saduh thanh a si tikah hleiman tampi lak lo kha a duhmi cu a si fawn. Cutikah company he hnatlaknak an ngei kho ti lo ti a si.

A tlangpi in khuami pa te nih a duhmi cu hlei donhnak ding i a dihmi tangka hi company nih kan bawn hna sehlaw hlei donh le zohkhenh cu hlei a donhmi hna nih tuanvo lak siseh ti kha a si. Cun hleiman lak timi zong cu hlei a hngaktu nihlawh pek ding le a rawkral mi remh ding le thianhhlimhnak ca ding ah hman than ding an si. Sihmanhsehlaw company nih hleiman tangka kan hmuh lo ding le hleidonh hi kanmah ta, kanmah kut ah a um lo ding a si ahcun kan in bawm kho lai lo tiah khua mi pa te cu an ti ti a si. Cutikah khuami pa te cu company he an duhnak aa khah lo tikah lungdong ngai in inn lei ah a tlung than ee ti a si. A dong lo!

Chingchiah: Tial ka timh mi ka dih hlan ah kaa let diam nain zohthan lo le edit loin ka tar than.