Mipi thimmi dotla vice president Pu Henry Van Ṭhio

Kawlrampi president thimnak ah minung pathum an chuahpi hna. Cu lakah mipi nih thimmi vice president cu Pu Henry Van Ṭhio a si. Zeitin dah na chim khawh nan ti men lai, a talnglei ah zoh hmanh hna u sih.

Cozah thar ah president a ṭuan dingmi hna.
Hmanthlak: AP

Zeitin dah vice president an rak chuah cio ning a si timi zoh hmasa u sih.

Pa khatnak ah president ah thimmi pa U Htin Kyaw. U Htin Kyaw cu National League for Democracy (NLD) lutlai Daw Aung San Suu Kyi nih president ṭuan dingah kutdong sawh in thimmi a si. Cucu NLD pary nih an lung tlinpi. NLD pary lungtlin in thim i Daw Aung San Suu Kyi nih lungtlinpi mi a si lo.

Pa hnihnak ah vice president U Myint Swe cu 25% ralkap nih an chuahpi mi a si. Hihi cu mipi he zong pehtlaihnak a ngei bak lomi a si. Tu chan holh cun bia a dih, a ceih hrim kan i ceih kho lo.

Pa thumnak ah Pu Henry Van Ṭhio; Daw Aung San Suu Kyi nih tlangcungmi covo phun in a thim mi pei a si ve ko cu ti a fawite. Tlangcungmi ah hin Chin mi lawng kan si lo. Tlangcungmi tampi lakah aho dah aa tlak lai timi kha NLD nih an zoh dih hnu ah Pu Henry Van Ṭhio hi an thim i cucu Daw Aung San Suu Kyi nih a hnatlak pi mi a si.

Pyidaungsu Hluttaw thimnak zoh rih hmanh u sih.

President thimnak ah NLD nih thimfung 390 an ngeih. Cu an ngeihmi thimfung hmangin 360 nih U Htin Kyaw cu thimfung an thlak. An thlakmi thimfung zoh tikah NLD lawng bak nih an thim ti khawh a si. Cu hmanh ah cun rawnmi lawng an si men lai tiah puh khawh an si fawn.

Cubantuk ṭhiamṭhiam in U Myint Swe zong a si ve. Ralkap nih thimfung 166 an ngeih. Cun United Solidarity and Development Party (USDP) nih thimfung 41 an ngeih ve. Cu pahnih fonh ah 207 a si. Ralkap le USDP cu pakhat ah ruah an si bantuk in anmah lawng bak le anmah minung a si ṭheo lai tiah ruahmi minung panga nih thimfung 213 an thlak ve.

Sihmanh sehlaw Pu Henry Van Ṭhio tu cu anmah bantuk a si lo. NLD thimfung 390 ah a tangmi 20 le ralkap, USDP a si lomi party nih thimfung 79 an thlak ti khawh a si. NLD hmanh ah party nih thimmi le Hluttaw zongah party tampi fonh in thimmi a si caah Pu Henry Van Ṭhio cu mipi thimmi dotla vice president kan ti nak cu a si.