Dr. Hmuh Thang + Dr. Lian H. Sakhong = Henry Van Ṭhio

Pu Henry Van Ṭhio cu Kawlram uknak ah vice president ca thimchung a si cang. Khuazei hmun a dir lai bal theih a si rih lo. Laimi tuanbia thar ṭialtu a si. Kan umnak in kan rak lawmhpi cio. Pathian nih a rianṭuannak ah thluachuah hram ko seh. 

Hmanthlak: gettyimages

A luancia 2010 thimnak ah Dr. Hmuh Thang nih, “President ṭuan ka duh caah party nganmi ah ka lut,” tiah a rak ti. Fianghlang tein bia a rak chim. Hibia nih tampi hmai a rak sa chung cia cang.

Nikum 2015 DVB Debate tuahnak ah Dr. Lian Hmung Sakhong nih kawlpawl cu fakngai in bia a chalh hna. Upa pakhat nih khatluk bia chimmi kha cu a fak hringhran ko. Laiholh in hei chim u sihlaw, “Nanmah Kawlchia, rimnam hna,” tiah hei ti sehlaw cubang cun an i fah sak lai dah.

Kawlpawl nih cun nan duhmi nan hmuh cang an ti khawh men. A ruang cu ṭangtiang naa timh lawng ah khup tiang na phan kho lai timi ruahnak an ngeih caah a si. Dr. Lian Hmung Sakhong bia leng a pet lo. Nawl ngeihnak a ngeimi president kan duh, a phungmen, covo cheuh chom in pekmi nawlngeihnak a ngei lomi vice president cu kan duh lo tiah a rak chimmi.

Nihin ah cun vice president rian pek a si taktak cang. Dr. Lian Hmung Sakhong nih bia a tiamh mi cu president rian kan ṭuan khawh ko ti a si. Kawl pawl caah cun hneksaknak an tuahmi zong a si kho.

Zeithil hmanh hi amah tein a cangmi a um lo. Pu Henry Van Ṭhio zong amah pumpak hrim ṭhutdan sang ṭhu ding ah a tlam tlingmi a si. Laimi kan lungtak a si lomi kan chim ṭheo mi cu, “Kan phut kan tawk lo,” timi a si. Nihin ṭhutdan sang ṭhuding ah kan phut kan tawk lomi siloin kan phut kan tawkmi ṭhutdan a si ko.

Pu Henry Van Ṭhio a rianṭuannak ah Laimi nih amah bochan in rianṭuan siloin amah a bawmchantu tu si i zuam cio hna usih.