Mah le rian cio

A luan ciami kum khat ah khan facebook ah kum li ngakchia nih 911 a chawnhnak kong youtube in ka rak hmuh. Ka lung a ka suk tuk i ka hin tlawmte ka rak ṭial ve.

Hi kong ah a phunphun in an chim cio. Ngakchia hi nu a si, si lo, hi thil hi a tak a si, si lo, tibantuk a phunphun an chim cio. Ka zong hin phundang in kan hun chim ve lai. Hi kong hi kum sarih leng a rau cang mi a si. An rak i chawnh ning tlawmte a tanglei ah ka van langhter.

Operator: 911 emergencies in a si.

Ngakchia: Aw, bawmh ka herh.

Operator: Zeidah cang?

Ngakchia: Ka kanaan.

Operator: Na kaa ma?

Ngakchia: Si lo, kanaan a si. Ka tuah hrim hau. Na ka bawm lai ma?

Operator: Siseh. Khoi ka dah na um?

Ngakchia: Si lo, fawn in ka chim ko.

Operator: Aa! A si kho lo. Mi bawmtu ka van thlah hna lai.

Ngakchia: Aw.

Operator: Bawmh na herhmi kanaan cu zeibantuk dah a si?

Ngakchia: Ka lak hlo.

Operator: Aw, na van lak hau mi a si lai cu.

Ngakchia: Aw.

Operator: Si cun zeidah a cang?

Ngakchia: Um, na ka bawmh a hau cang.

Operator: Aw, na kanaan cu van ka chim.

Ngakchia: Aw, 16 ah khan 8 ka lak, zeitin?

Operator: Ka chim tuah, zeizat a si lai tiah na ruah?

Ngakchia: Ka thei lo, pakhat.

Operator: Si lo. Kum zeizat na si?

Ngakchia: Kum li ka si.

Operator: Kum li!

Ngakchia: Aw.

Operator: A dang na van i harh mi cu tah?

Ngakchia: Um, aw ka hin. 5 ah khan 5 ka lak.

Operator: 5 ah khan 5 na lak, cun zeizat a si lai tiah na ruah?

Ngakchia: 5.

A nu: Johnny, zeidah na tuah?

Ngakchia: Palik pa nih ka ca a ka bawmh.

A nu: Fawn cu zeituahnak tiah dah kan ti?

Ngakchia: Bawmh na herh ah cun mi chawn hna na ka ti cu ta.

A nu: Palik cu ka ti duhnak a si ṭung lo.

A cung lei biaruahnak hi ka duh ning in kan van leh mi a si. Youtube ah an i chawnhning ngaih na duh ah cun a tanglei ah khin rak ngai te.

Hi thil kong ah ka lung a ka laktuk mi cu hitin a si. Ngakchia lungthian ti cu bawmh a herh cangka 911 a chawnh ko. 911 chawnh ahcun palik, meithahnak le siizung mawtaw sin in bawmhnak hmuh khawh a si. Cucu ngakchia in upa tiang nih theih a si. Cucaah ngakchia nih cun bawmh timi lawng ruat in 911 cu chawn sehlaw a dawh.

Bawmh a hermi kanaan cu 911 operator pa nih thiam lo in a um lai lo dah. Sinain pakhat hmah a bawm lo. Ngakchia i a ruahnak tu kha a hal leh lam. Cun operator pa kha saya a rak si lo ca zongah a si kho. Upat awk tlak a sinak pakhat cu 911 he a pehtlai lomi a si ko nain lungsau tein bia a ruah.

Khat lei kam in ruah awk thil a um ve ṭhan mi a um. Ngakchia nih fawn a chawnh lio ah khan a nu kha zeidah a tuah? Ngakchia nih ca a zoh lio ah a dang khoi ah dah an um hna? A nu a um ko nain ziah ca a zoh pi lo? Ruah awk phunphun a um.

Nangtah hi kong na theih ah zeibantuk ruahnak dah an pek ve? Operator pa dirhmun ah hei i um ter law zeitin na leh ve hnga, siloah ka rian silo tiah fawn na phih khenh hnga ma?