Chin National Day tuah a herh maw?

Salai Lian Biak Hu

 

Zeiruang ah dah CND kan tuah? A herh maw herh lo? Tuah lo zong ah zeidah a poi? Biahalnak hi mah le duh ning in tuah khawh a si cio ko. A fawinak in chim ah cun Norway ram ah CND kan tuah lo zong ah a poi lo ti a fawi te.

 

Laimi cu phun a ngeimi kan si. Kan phun kan rak i theih lo liote hmanh ah khan UNHCR nih ram thumnak kal ding in timhtuah a si tikah Norway ram kal ding cu a hnu bik ah na chungkhar min (Family name) tiah hal a rak si. Kan nih lio ah cun holhlet nih a buaithlak tiah khua an rak khan i Family name cu na phunmi tiah rak hal kan si. Cu tikah kanmah le kan phunmin cu rak chim cio a si. Cucu UNHCR kong ah hei si sehlaw.

 

Laimi cu phun a ngeimi kan si. Phung le lam he a nung ve mi kan si. Arsa thah (phun thawh) lo in ngeihmi fa cu lakfa ti a si. A ruang cu phun ngei lo a si caah a si. Cu tikah pa nih arsa thah (phun thawh) a tuah hnu lawng ah a pa phun kha a fa nih a hrawm ve. Cuticun phun ngei ah a hung cang. Chim duhmi cu Laimi cu phun a ngeimi kan si. Zatlang phung, thitum phung, phung le phai, hla, holh, laam... tbk in a ngei vemi miphun pakhat kan si.

 

1947 February 20, Falam khua ah Chinram upa hna an rak i tong. Mirang uknak kan duh lo, kanmah tein lairelnak nawl, mizapi duhnak in a hruaimi uknak in i uk kan duh tiah an rak ti. Cuni cu miphun pakhat kan si ve nak langhternak ah miphun ni tiah kan auh lai tiah hruaitu upa hna nih biakhiahnak an ngei. Cu caah nihin ni tiang cuni (February 20) cu Chin National Day tiah kan hman lengmang nak cu a si.

 

Cuti miphun pakhat kan si venak cu Kawl miphun nih hloh an kan timh. An miphun sinak, an holh le an biaknak hi Kawl miphun sinak, Kawl ca le Buddish biaknak ah lut dih hna seh tiah an i zuam. Cucaah Chin National Day cu tuah lo ding in kum saupi nawnnawk kan rak si. Sihmanhsehlaw ram leng a ummi hna nih cun zalong tein tuah nak nawl kan ngei. Kan umnak ram zong nih tuahnak nawl pek kan si ko. Cun rian a tuan mi hna zong khunh laknak nawl pek a si ko. Cu tluk in miphun pakhat a si vemi nih miphun ni tuahnak nawl kan ngeih ko lio ah tuah lo in maw kan um lai? Mi nih cun lo hna seh, tlau hna seh an kan ti lawng siloin an i zuam lio ah miphun ni cu tuah lo in ma kan um ko lai?

 

Um hlah! Chin National Day cu kan tuah ko lai. February 20 thengmang kan tuah khawh lo zong ah miphun ni cu kan tuah thiamthiam ko lai. CND tuah ding in tlangtlatu hna nih khuakhan bantuk in puai tuahnak hmun zong ah kal khawh in i tel zong i zuam cio hna u sih. Phun ngei lo kan si tung lo, phun kan ngei cio. Cucaah kan miphun nih ah chuah khawh cio rak i zuam hna u sih.

 

Chingchiah: Norway khuasa groupmail pakhat ah sawmnak bantuk in tialmi kha ka tarmi a si.