Sunday, October 26, 2014

Ruatṭhan Hmanh!

Salai Lian Biak Hu
 
“Nan dam maw, nan dam maw? Hawikom dawtmi vialte hna…”
 
xxx
Zion Baptist Church, Hakha
Sunday Church School saya/ma cheukhat
 
Kan thlacam caanhmannak cu cuvial si sehlaw atu cu thlakhat voikhat, zarhkhatnak cawn nihnih zan i kan tuah tawnmi meeting cu kan thawk colh ko hna lai tiah chairman nih a von thawk colh. Kum khat chungah kan rian ngan bik tiah kan ruahmi pawl cu kan dih ngawt ko cang. Atu cu December thla i Sweet December hngah le Ngakchia Christmas vah lawnglawng a tang ko cang. A biapi mi cu... Um rih tiah, Maung Cap nih a von ti i, vah cu an bawh bu in maw an vah lai ngakchia pawl cu? hahahhaa… tiah kan dihlak in kan ni dih hna. Ka bia a dih rih lo cu tiah chairman nih a von ti i a bia cu a hun peh than. Kan dih cia mi biapi bik in kan i chiahmi pawl cu Ngakchia inncung kai, sangkip ngakchia inn kip lennak, ngakchia ramleng chuahpinak tibantuk rian har deuh i kan i chiahmi cu kan dih ngawt ko cang hna. Sangkip ngakchia len kha Ko Sui te cu an dih cang ko rua, kan sang lei ah a ra i tiah Maung Cap nih a hun ti. Zawte nih a nih cu tlangbo lei kan thiah nain a ti i, Zawte ziah nang zong atu kha Cherry ah kan in hmu lo bang, sanghnih hrawng ah na vak rua kan sang rat loin tiah Ko Sui nih a hun ti ve. Kawi Mon nih ka dua Maung Cap, kan sang cu na kan hloh bak ko, kan in hngah lengmang i na ra ti lo. Nangmah rat lai ko pei kan i ngaih cu tiah kan fa le nih an ka ti len. Kan dih lai zan lawng ah na ra i kan i lawm thiamthiam ko a hun ti. Chairman nih ka dua le kan dih ko cang i a tlamtling ko, khoi ka lei nan kal cio ti cu, "Nan chaw umnak ah na lung zong a um ve lai," ti pei si cu.

 
Atu cu hmaithla December kan caanhmanding kong ah kan i ruah cang hna lai. Hmaithla cu rianuan ding lawng te a si lai i kan dih bak in Saya/ma pawl ramleng chuah a si lai. Tlangkai maw nan duh lai Tiva kal? Kumkhat chung kan rianuannak cu mah tikah a dih te lai. Hmasa bik ah Sweet December hngahnak kan ceih lai i a dih in ngakchia Christmas kong kan i ruah chih te hna lai cu. Sweet December zan cu Zawte hi a zohtu ah pakhat chiah a hau eh tiah Maung Cap nih a bia a tan colh. Cun saya Van zong hi mawtaw cung a kai i a kan tumtak ti lo zong a biapi ngai cu, cu lo cun khi zan cu mah tein a dong mi an um cio lai i mu, heheee... ti koh saya Van. Maung Cap hi cu na kuat a ha tuk eh tiah saya Van nih a ti i kei cu ka kuat a thar lengmang si. Kawl holh cun Kuat Thit ka si ko cu, kyawngia kan luh ta ah cun, hehee… si lo ma, Kawi?
 
Tuzan kan meeting cu cu vial si ko sehlaw a donghnak thla kan cam hlan ah ninga zanlei pumh kha philh hlah u mu, cun zarhte zing thlakhat voi khat thonginn le siizung kan kal tawn mi kha bau lo tein rat khawh cio rak i zuam u mu. A donghnak ah kan pastor nih thla a kan cam piak lai i tlangval pawl kha a vun ti ah khin Atluang nih khakha cu in pah a si i anmah tein an i kawp cio te ko lai. An rian ruah tein an i ruah ko, phawt na palh sual lai, a hun ti.
 
xxx
 
“Par bang en chin seh Sunday Church School, kan ram Khrihfa bu dawh tertu na si…” Biakinn in hla an chuah cang. "Hu, na ra pup lai lo si?" Ka nu nih a hun ka thawh. Ka nu nih buh um a khin dih hnu, Biakinn ah thla a va cam i a in hnu, ka thawh hlei lo ruang i na pum lai lo maw tiah a hun ka thawh khi a si. Voi dang bantuk ka hliphlau kho ti lo. A ka sawm tawn tu aw zong cu an um ti lo. Ka pumh zongah ka hawi le an tling ti lai lo. Atangmi cu santlai lo bantuk i ruah, kum saupi Sunday School ah pum i pek lengmang zong cu hancho lo ah ruah a si hoi. Pumh zongah keimah lawng upa lei ka va si cang lai. Ka tha a zor thluah mah.
 
Zei khum a si ah hawikom ruangah ka pum ka pek mi a si tung lo, Pathian caah pei ka pum ka pek ko cu. Ka hawi le an um lo zongah Sunday School kai mi ngakchia an um chung cu ka kal ve rih ko lai. Keimah le keimah lungcan ka von i pe. Ka tho i ka ihphah cu ka bil, ka hmai ka phiah. Ka thil ka thleng i khuasik zing lakah Sunday Church School pumh cu ka thawh. "Theihthiam caan a cu, lawmhnuamh chuah ter tu, Par dawh ruathan hmanh."
 
xxx
 
“A dangdang i kan um tikah Pathian nih kan zohkhenh cio ko seh, Amen!”
 
Note: Zion Sunday Church School ka hawile philh lonak ah ka ialmi a si.
Muko mekazin i Vol. 13, No. 4, 2008 Dipa (December) i cahmai 121 nak i ialmi a si.

No comments:

Post a Comment

Na hmuhning a tangah rak ṭial khawh a si.
Kan ruahnak i cheu cio hna usih.