CBCUSA YC online biaphawngden

Salai Lian Biak Hu

 

CBCUSA YC cu online in video ka rak zoh ve. Nan thil tuah a tha, nan i nuam.  Online in a rak zoh vemi pawl zong kan i lung si theo lai dah.

CBCUSA YC kong ah tlawmte tial ka duh nain counseling le media kong cawnpiaknak ka zoh lio ah cun ka let than. Ka tial lai lo tiah ka ti. Sinain cu kong a ngai i a thei fiang vemi nih cun an ka theih thiam ko lai tiah ka tial than.

 

Cawnpiak tu an tam bang cawnmi kong zong a tam ve. Minung bal ram lenglei ruah ning nakin nan tlawm deuhmi ko a lo. Khan khat ah minung 30 hrawng, khan hra nan si i 300 hrawng si dawh a lo. Nain cawnnak ah um thiam loin riantuanmi he 300 leng si dawh nan si, 400 cu tlin dawh nan si rua lo. Leng lei theihnak ah CBCUSA cu Khrihfabu 50 leng funtomnak a si ti a si. Khrihfa bu pakhat ah minung 10 cio rak i thawh hna sehlaw 500 tal cu an si lai ti khi a lo ngai nain.

 

Cawnpiaktu pakhat nih cun kanholh, kan ca, kan nunphung tbk. cu tlau hmanh sehlaw kan zumhnak cu tlau hlahseh tiah ro bia a cah. Zumhnak zong tlau dawh a si. Cu hlan i a chimmi cu kan ca te pawl zong hi a tlau kho men tiah a ti. CBCUSA YC tlangtar zong kha Mirang ca hman a si cang. Mirang ram ah kan um i kan hman awk a si ko ti zong a si ko lai. Biafang pa hnih lawng a si caah hman a ol ti ruang zong a si lai dah. Nain kan ca a si ti lo. Cun cawnpiaktu hna nih an hmannmi PowerPoint zong ah Mirang ca deuh an si mi a lo.

 

Salai Bawi Lian Mang nih cawpiaknak a donghnak ah i nunpi ding Baibal in ro bia a chiah tak ve hna. Baibal cang Matthai 7:12 a chim i a theimi chim tuah u a ti nain an chim lo. Van kan relpiak u a ti i pakhat nih rel a timh nain a kenmi Baibal kha Mirang Baibal a si caah Laica in siseh tiah a ti than caah rello in a dang nih an rel. Donghnak zan i caan tlaitu nih Baibal a relmi zong kha Laica he Mirang ca he a rel chih. Kan hawi le nih thei ve hna seh tinak zong a si lai cu. Nain cawnpiaktu nih kan ca zong a tlau kho men a timi hi ruah lo awk a tha lo.

 

Cawnpiaknak a ngeimi hna nih an i lung si bik mi ah cun Khrihfa innchungkhar kong kha si sehlaw a dawh. An hmai a mirh i an tha a nuam ko. Ho ko dah a chimtu cu a si hnga tiah ka zoh ve cu paw puar nawn, bia a chim ah a tha ba pah cang sehlaw a lo, sayama pakhat a si. A chimmi van ngaih taktak cu a ngaitu pawl thawchuah hlan ah a dih. A paw puar zong kan hmu manh lo, a thabat aw zong thei ti hlah caan tlaih awk that lo cu zeiti awk dah tha. Biaruahnak an ti hoi i caan i zat a si hoi lo. Kaa thawt saling ah ngol a si hoi.

 

Khrihfa innchungkhar kong cawmpiaknak kha ramthumnak a phanmi Laimi dihlak nih kan herh khun ko rua. A hlei in harnak cu US khuasa nih ton khun mi siseh law a dawh. Kan hawile hmurka le groupmail in theih pah tawn a si tak. Sex kong he a pehtlaimi cawnpiaknak ah cun ralrinte in bia i sum lo ding ti ka theih bal nain tutan cawnpiaktu hna an bia i sum hna sehlaw a lo pah. Cawnpiaktu nih ngamh ko zong ah Laimi kan sining nih a pek rih lo ca zong ah sidawh a si. Atu bantuk mino cawnpiaknak ah cubantuk te hna cawn cu a timi zong rak um rih hna sehlaw thei hlah.

 

Cacawn ninga zan cawnpiaktu biaruahnak zong kha tuah phu ngaingai a si. Nain zeitin "How" timi biahalnak kha zeidah "What" timi bialehnak tamdeuh rua ka ti. Minung paruk nih suimilam pakhat caan chung biaruah cu pakhat nih minute 10 cio lawng tin a si ca zong ah a si kho men. Asiloah biahram domh lo cun an fiang lai lo timi ruahnak ruang zongah a si kho. Zeikhom a si ah biahalmi te leh ahcun a tha deuh hnga.

 

Cun cu an biaruahnak ah a phi chuak cu nu zong nih Khrihfabu ah Khrihfa upa hmunhma ngeih ve ding timi a phi siseh law ka lawh ter. Nuhrin covo lei riantuanmi nih biahalnak a van tuah taktak cu nu lei in a lehmi zoh tikah Khrihfabu ah hmunhma pek lo ruangah sidawh a si. Nain CBCUSA upa nih a lehmi cu thimnak ah van thim taktak hna usih law nu le nu hmanh me an i pe lai lo tiah a ti. Nain culio ah an pawng thumi pakhat nih TCBC ah cun Khrihfa upa ah nu pahnih kan ngeih hna tiah a ti. An biaruah a tlangpi in hei cuanh tikah hmunhma rak pek hmasa a biapi mi ko a lo. CBCUSA nubu hmanh a hruai khomi nih cun Khrihfabu upa tuan khawh lo nakding zong cu ruah awk a um ngai. Salai Bawi Lian Mang nih cun tangka lawng zong tlaihpiak ti hna hlah u tiah cawnpiaknak ah a chim.

 

Mino thithruainak kong an hun ceih mi ah pakhat nih cun hruaitu hna an za tuk ko tiah a ti. An za tak ko rua. Cuai van thlai ta hna u sih. CBCUSA Mino tonnak um lio ah CBCUSA Nubu zong tonnak an ngei ve. Cawnpiaknak an ngei veve hna. Nubu pawl tu cu Lai lei rak i cawnpiak ning bantuk Biakinn ah khat thup in an thu hna i hmai lei in cawnpiaktu pakhat nih cawnpiak a si. A ngaitu caah ka ba deuh tiah ngut zong ngamh a fawi deuh. Khua a lin, a ka hut deuh tiah leng chuah zong a fawi. Hmuh sung ton har tiah a thli tein bia a rak i ruah mi zong rak um hna sehlaw thei hlah.

 

Asinain mino pawl tu cu khan khat ah minung 30 hrawng lawng a si tikah ngut ngam zong a si deuh lo. Ngut duh zong ah dirbu in ngut a hau i a fawi lo. Cawnpiaktu zong nih hiip deuh khawh a si. Cun a cawngtu ca zongah chim venak caan ngeih khawh deuh a si fawn i chim ngam deuh zong a si. Chim duhmi cu mino pawl khuakhan a men lo hei ti bia khi si ko.

 

Ca zong a sau ngai cang i dongh ter pah cang u sihlaw, a donghnak ah Salai Bawi Lian Mang nih a ti mi cu tutan ah a ra mi hi an fel tuk hna i a fello mi zong tu hnu cu van rat ter ve cang hna u, tiah a ti. A fel lo deuhmi cu CYO ah i tel ve dawh an si, CYO kong ceihphaimi ka theih tawk ah. A cheu nulepa nih cun an fa le kha CYO puai ah kal a sianh lo mi zong an um ti an chim ka theih bal caah a si.

 

CYO kong van chim lio lawlaw ah van peh ta ning law, hmai kum puai tuahding kong ah lungre a thei ngai timi kha nikum hrawng ah cun groupmail ah hmunhma a la ngai. A ruang cu CBCUSA le CYONA puai tuah kum a khah caah a si. Vawlei cung Laimi tam u nih chimmi le tutan CBUSA YC zong ah an chimmi cu ram rum bik ah kan um, cawnnak tha bik ram ah kan um, kan si ning hi hmun dang ka dang ummi Laimi hna nih an i cawn cio ti a si.

 

Nain tutan CBCUSA le CYONA kong ah cun Norway khuakhannak nih rak ngia thlai ve u ti kan duh piak ngai hna. Nan nih kum khat chung ah puai a ton ruang i nan buai ngai lio ah kan nih cu a then lai kan phang deuhmi a lo. Zeitin tiah, tukum hi puai pa hnih July 25-30 tiang tuah ding kan si. Cucu Norway Chin Christian Federation le Europe Chin Fotball Cup & Culture Feltival timi an si. NCCYF kha kan tuah hmasa lai i a dih in Europe puai hmunkhat ah tuah than ding khi a si. Europe puai hoi hna cu then lai phan ah kum hnih dinh ter a si.

 

US lei zong CBCUSA puai tuah hmasa in CYONA kha peh ve te u law atu i a fel lo deuhmi timi zong an fel deuh ve hnga i nulepa cheukhat nih CYO puai kal sianh lomi fa le zong an i tel kho ve men hnga.

 

Hi ca hi biaphawngden phun tial sawhmi a si. A ruang cu online in nan thil tuahmi kan rak hmuh ve tikah kan i lawmhnak langternak ca tu a si deuh.