A 4nk Mifim Pa (The Fourth wise Man)**

Nawl Hre Cin

Bible chung ahhin mifim hi pathum an si ti a langhternak a um lo, an laksawng pekmi pathum a si caah minung pathum an si lai tiah ruah a si. Asinain hlanlio deuh khrihfa hna nih tuanbia phunin an rak i ngeihmi ahcun pa li an si an ti. Bible chung i aa telmi minung pathum hna an min hi Caspar, Melchior, le Balthasar an si. Bible ah a tel lomi a dang pakhat a um rih, i a min ah Artaban a si an ti.

Artaban hi Siangpahrang chuah hmelchunhnak arfi a hmuh in kawl dingah a rak i tim ve. Laksawng pek dingah Sapphire (kawl holh in Nila an timi khi a si), ruby (lungvar) le Pearl (Pale lungvar) thil mansung pathum hna aa ken chih. A hawi le pathum Caspar, Melchior, le Balthasar hna he hmun pakhat ah i ton te dingin an rak i chimchung hna. Arfi umtuning zoh tikah, an kawlmi siangpahrang cu chuah deng dawh a si cang. Cucaah kan tanhmanh sual lai lo ti phanah an khualtlawn an hun i namcham cio. An i chimhchungnak hmun le caan ah phak khawh lo ahcun i hngak te lo dingin an rak ceih.

Santa Claus Tuanbia (Legends of Santa Claus)**

Nawl Hre Cin

Santa clause hi Khrihfa a simi paoh nih Khrismas thla a phak fatin kan hmuh lengmang tawn, asinain mi zeidah a si ti belte hi a thei lomi tampi kan um kho men. Myra khua mi mithiang Nicholas timi pa min in a chuakmi a si. A tuanbia le a si ning tak hi tling cikcek in aho hmanh nih theih a si lo nain thil tha a tuahmi tu cu a thei lomi an um ti lo.

Nicholas hi Khrihfa chungkhar in a chuakmi a si. Nicholas timi min hi a pu nih a sakmi a si, i a pu hi a chuahnak Patara khua i bishop a si. A nu le pa hi ngeih le chiah leiah mi thawngtha ngai an si. An fapa a duhmi paoh tuahpiak an i zuam tawn. Asinain Nicholas hi a ngakchiat tein lentecelhnak thilri tuktak pawl hi zei ah a rel bal hna lo. Thil theih le cawn ko hi a rak huam, abikin biaknak lei hi theih a rak huam khun. Kum riat a si lioah an khua ah zawtnak tha lo (plague) a rak tlung i a nu le pa nih an rak thih tak. An chungkhar ngeih le chiah vialte amah nih a co dih, cu chungah cun Sui thluan thum zong a tel. A nu le pa tuan te an thihtakmi nih hin Nicholas hi lunglileng ngaiin le mi hmai chuak ngam lo tiangin a rak um ter. Hawi thar kawl tuk lem loin amah te lawngin kum caan saupi a vakvai.

Christmas Thingkung

Britain i a ngan bik Christmas thingkung,

Wakehurst Place, West Sussex.

Nawl Hre Cin

Christmas caan paoh ah thingkung pawl hi Christmas hmelchunhnak ah kan hman tawn hna. Mah hi phung hi kan hlan i Khrihfa a rak simi hna nih an rak tuahtawnmi a si ruangah kan tuah sawhsawh ve bia a si lem lo. A ngaingai tiah cun thingkung, thinghnah timi pawl hna hi minung kan nunnak he then awk a tha lomi hrim an rak si. Thingkung, thinghnah pawl biaknak hmelchunhnak i hman timi hi Khrihfa chan hlanpi, a luancia kum 3000 in a rak i thawk diam cang. BC 1300 hrawngah Egypt miphun pawl nih khuasik caan ni tawibik (winter solstice)¹ ni ahhin puai an rak ngei tawn. Cuahcun, kum khat chung a hnah a hring khomi thingkung kuhchuk (palm) a hnah khi an inn tamhnak ah an rak hman tawn. An tuahhnawhchan bikmi cu kan cinthlak hna hi a thar in kumkhat chung hring zungzal sehlaw thei tha tampi tlai seh tinak caah a si. Rome miphun pawl zong nih hi khuasik caan ni tawibik (winter solstice) ni ahhin puai an rak tuah tawn ve. Cu puai cu Saturnalia tiah a min an pek, i cinthlak lei pathian a simi Saturn upat peknak caah an rak tuah tawn. Egypt pawl bantukin Rome miphun pawl zong nih an inn hi hnah hring in an rak tamh tawn. Cuti an tuahnak nih cun an cintlak pawl kumkhat chung hring dildel in a um ter tiah an rak zumh.

Nobel Peace laksawng cotu a bau

Lung siarem lo ngai in Nobel Committee chairman
Thorbjoern Jagland nih Liu Xiaobo thutnak
a lawn ko cu a zoh

Vawleicung laksawng lakah a sungbik tiah ruahmi Nobel daihnak laksawng cu nizan December 10 ah pek a si cang. Sihmanhsehlaw cohlangtu a um lo caah a thutnak hnga hmun ah chiahpiak a si. A cotu ding Liu Xiaobo cu Tuluk cozah nih thong kum 11 tla ding in thong an thlak caah a si. A nupi nih lak ding a si ko nain leng chuakkho lo in an tuah ve.

Hi laksawng laknak hmun pawng ah Tuluk mi cheukhat cu duhlonak an rak langhter. Zeiruang ah dah hihi nan tuah tiah thawnghlat nih mi pakhat a hal. A lehmi cu nan pekmi laksawng hi daihnak laksawng a si. Hipa Liu nih hin Tuluk ram ah zeidaihnak dah a tuah mi um, Tuluk ram daihnak caah zeihmanh a tuah mi a um lo. Cucaah kan duhlonak kan langhter tiah a ti.

Nobel daihnak laksawng cotu aiawh in Norway mi fidi Liv Ullman nih a zaka in bia a chim. Liu i a ruahnak pawl a chim. Biapi bik Liu alungput cu "Kei cu ral le huatnak ka ngei lo," tiah a ti. Liu nih Nobel committee sin ah bia a cah mi hna cu keimah laksawng nan ka pek cu 1989 i Tiananmen Square democracy ca a cawlcang mi pawl nan pek a si tiah a ti.

Laksawng peknak hmun ah cun minung 1000 leng an chuak. Cu lakah Norway ram siangpahrang le siangpahrang nu zong a laicer ah thu in an telpi ve hna.

Tuluk cozah nih Nobel daihnak laksawng cu an tlaihmi Liu nih a hmuh caah an cohlanpiak lo. Laksawng peknak zongah a kal lo lawng siloin ramdang zong kal hlah u tiah a ti hna. Norway ram um ramdang palai zung paoh cu sawm dih an si nain palai zung ram 19 cu an kal lo.

Atu bantuk Nobel daihnak laksawng pumpak in a rak la kho lo mi 4 an rak um. Cu hna cu Carl von Ossietzky (1936), Andrei Sakharov (1975), Lech Walesa (1983) le Aung Sann Suu Kyi (1991) hna an si.

Ch: Guardian, Nobel

Silent Night

U Khin Nyunt (Vunci hlun) le Palek General Khin Yi tonnak

khin nyunt from 88bigguy on Vimeo.

Lay Phyu -Tan Phoe ( New Song )

Aung San Suu Kyi Thang An Chiat

Nga Min Shwe nih a tialmi capar a phawt lio hna

Nizan November 25, 2010 ah khan National League for Democracy zungpi hmai ah ralkap cozah duh in catial thiam Nga Min Shwe timi pa nih Daw Suu he ton ka duh tiah a au. Monitor journal i ka tial mi capar kong ah biaruah ka duh, amah ruangah ramleng chawlet chawhrawl an phihmi on a hau tiah a ti.

NLD zungpi hmai ra ding in a autu cu SnapShot News Journal i Myat Khain fapa Zeya Myat Khain a si. Rat khawh a si cang a ti cangka in Nga Min Shwe cu a tialmi capar he a rak chuak i a au khung colh. A tialmi capar pawl cu ramchung journalist pawl le mipi sin ah a phawtzamh. Ramleng journalist pakhat nih a hal ve nain ramleng journalist cu kan pe kho lo tiah a ti.

Zeidah a si tiah an hlat tikah NLD nih cun Nga Min Shwe tialmi Daw Suu Kyi tiah a tialmi tlangtar cu an lung a tling lo. Mipi zong an lung a tling cio lo.

NLD zungpi i chungtel U Win Htein nih Nga Min Shwe cu a ton. Daw Suu he cun atubantuk au khuan buin ton cu kan duh lo, na tial mi Daw Suu Kyi timi zong remh tiah a ti. Thong ka um lio ah ralkap cozah thatnak le Daw Suu le NLD chiatnak na tial mi zong tampi ka rel tiah a ti.

Daw Suu thawngpang ruangah ramchung journal tampi phih an si. Daw Suu thawngpang lak an ngamh lo lio ah Snapshop nih cun video camera he an thlak len.

Thawng fiang in an hun hlat hnu cun Thura Shwe Mann (Bogyokekyi) hlun nih palik le mihleihlai thawngla pawl nih Daw Suu kong nan hlat lai, hman nan thlak lai nain hnahnawhnak nan pe lai lo tiah a ti. NLD zungpi chungah thawng lak khawh a si lo caah vunci U Kyaw Sann nih tangka phalh in hmanthlak le video thlak a fialmi hna an si ti a si.

Ch: Niknayman

Daw Aung San Suu Kyi a voikhatnak bia, 1988

Daw Aung San Suu Kyi 14th November, 10 speech -1

Aung San Suu Kyi sihni bia

Aung San Suu Kyi thong in a chuak

Aung San Suu Kyi nih mipi a thong sin biachimnak
a ngeih lio. November 14, 2010

Kan hnulei November 13, 2010 zanlei suimilam 5 ah Daw Aung San Suu Kyi cu thlah a si cang. Daw Suu cu a luancia kum 21 chungah kum 15 chung cu thong ah a um. Atu bantuk thing in a chuah cu nichuah nitlak ram hruaitu hna nih an rak lawmhpi cio.

Thong in a chuahka zarhte ni zanlei ah cun zei bia hmanh chim rih loin a um i a thaizing zarhpi ni chun ah mipi sin biachimnak zong a ngei. Daw Suu a chuak cang, democracy a kan hmuhpiak lai tiah i ruah hlah u. Keimah lawng nih democracry ca ka tuan lai lo, kan dihlak in kan tangti lai. Keimah lawng ka si ahcun nawlngeinak a hmangmi pei ka si lai cu tiah mipi sin ah a chim. Keimah lawng zong in a si kho lo, kan dihlak in kan tangti hna lai tiah a ti.

Cun hmailei kong biaruahnak an ngeihmi ah cun; hmailei kong cu ka chim kho lo, tlaih than khawh zong ka si. Ka ngeihmi caan chungah tuah awk a simi cu tuah khawh ka zuam lai tiah a ti. Humhimnak tu cu kan dihlak, rammi vialte, cu uktu hna nih zoh khenh hi an rian a si caah ka hna a ngam ko. Phanawk ka ngei lo tiah a ti.

Kawlrampi remhthannak caah cun iremnak a herh. Cu caah iremnak hi tuahkho ding in biatak tein tan kan lak lai tiah Daw Suu nih a chim.

Daw Aung San Suu Kyi thong in a chuah cu kawlrampi thimnak an tuah zarhkhat hnuah a si. Thimnak ah a tel khawh lo lawng si lo in an party (National League for Democracy) zong phiahpiak an si. Sihmanhsehlaw vo an thlaknak ah ningcang a si lo ning kong vawleipi thieh in biatak tein kan au pi lai tiah Daw Suu nih a chim.

Daw Aung San Suu Kyi cu 1990 kum kawlrampi thimnak ah teinak hmumi a rak si. Kawlrampi democracy hmuhnak ding le hruaitu ah zumhbik mi le bochan bik pakhat a si. Nobel peace laksawng zong 1991 ah a hmumi a si.

Ch: VOA, VOA

Pu Victor Biak Lian nih NMØ 2010 laksawng a hmuh



Victor Biak Lian (a lai)

Norway ram i nichuah lei ah rian a tuanmi bu Norwegian Mission to the East (NMØ) timi nih Pu Victor Biak Lian cu Stephen Prize 2010 laksawng an pek. Cu laksawng cu Norway ram i khualipi Oslo ah a chungkhar he November 9, 2010 ah an va hlam.



Laksawng peknak caan an hman hlan ah Burma-Seminar tiin seminar zong an tuah. Cu seminar i biachimtu hna cu Pu Victor Biak Lian, Khin Maung Win (DVB, Assistant Director), Bjørn A. Wegge (NMØ, GS) le Edward C. Brown hna an si. Seminar cu zanlei suimilam pahnih in pali tiang tuah a si. Cu dih hnu ah zan suimilam paruk in laksawng peknak tuah a si.

Zan laksawng peknak ah Norway um laimi tampi zong nih an telpi ve. Laksawng peknak caan chung zong ah Norway Chin Mission Church, Oslo (NCMC) nih hlaremh (Laihla fung hnih) le lawmhnak bia NCMC chairman Pu Thang Hlun zong nih a chim.



NCMC, Oslo

Pu Victor Biak Lian cu 1988 siangngakchia buainak ah biatak tein a rak i telmi a si. Kawlrampi ah a nunnak a him lo caah India ram ramthen Mizoram ah a rak zam. Atu ahcun Canada ram khualipi Ottawa ah a chungkhar he khua a sa. A rian tuanmi cheukhat hna cu Chin Human Right Organization (CHRO), Ethnic National Council (ENC), National Reconciliation Programme (NRP), Chin National Council (CNC) an si.

Election 2010 Live Show (Part 1), VOA

Election 2010 Live Show (Part 2), VOA

Election 2010 Live Show (Part 3), VOA

Mizzima TV, November 8, 2010

Kawlrampi thimnak kong ah CNN le Soe Aung biaruah

Kawlrampi thimnak, November 7. 2010, CNN

Kawlrampi thimnak kong ah biaruahnak

Kawlrampi thimnak kong ah CNN thawngthanh

Kawlrampi thimnak kong ah Malaysia PM bia

Vawleicung a tar bik nu a thi

Vawleicung ah a tar bik lai tiah an timi nu, Eugenie Blanchard (Kum 114), cu tuni November 4, 2010 ah a thi cang. Kum 30 chung Saint Barthelemy siizung a um hnuah a thih cu a si.

Amah cu February 16, 1896 ah a chuak. Unau 13 an si. A nun chung khua a sak biknak hmun cu Dutch Caribbean tikulh i Curacao a si. Amah hi phungkinu (nun) a si. Atubantuk i saupi nun a duhnak cu "mithianghlim a sinak hi Pathian sinah pek a duh caah a si" tiah a tupa Daniel Blanchard nih a chim.

Amah hi min din a ngei. Cucu "Douchy" ti a si. Asullam cu a thlummi tinak a si. A ruang cu a tonmi ngakchia hna cu muthai a pek tawn hna caah a si.

Eugenie Blanchard a thih cun Eunice Sanborn cu a tarbik a si lai tiah Gerontology Research Group zohchun in an ruah. Amah cu kum 114 a si.

Ch: VOA, IndyPosted

101 East - Myanmar elections

Khirh le ranh khawh a simi caan

Laimi tampi nih bia meilah bantukin an chim lengmang mi cu kan nunnak ah caan hi khirh khawh a si lo ti a si. Mitthep karte hmanh kan uk khawh lo mi caan hi upat ding ngaingai kan si. Minung tu nih caan hi kan hngah i kan dawi a hau tiah biachim thiam hna nih an ti.

Sihmanhsehlaw tuchun ni ah cun zeizong te hi a let dih cang ko. Caan cu minung nih kan ser kho lo nain thil sining cheukhat cu kanmah tein kan rak i sermi an tam pi ve. Cu lakah caan zong a tel.

Norway ram ah cun caan zong hi mah tein ser a si. Duh ah cun an ranh i duh ah cun an nuarh ter ko. Zeitintiah tuchun ni (31.10.2010) ah cun Norway ram ah suimilam caan cu pakhat in an hun hnuh than.

Cu tikah a hlankan in bia a rak i tiam cangmi hna nih caan an hngalh ti lo sual ahcun tuchun ni caan ah suimilam pakhat tuan ah an i timhmi thil cu an tuah. (Biana ah, pumh caan cu suimilam 10 tiah an timi kha suimilam 9 ah Biakinn an rak phan.)

Tuchun cu Norway ram ah cun suimilam pakhat in an nuarh ter. Hmaikum khuasik le thal karlak ah suimilam pakhat in an ran ter than te lai.

2010 Nobel Laksawng

Nobel Peace laksawng hmutu Liu Xiaobo

Nobel laksawng hmumi cazin cu October 4, 2010 in thanh hram an rak thawk. Nobel peace laksawng cu 2010 ah aho nih dah a hmuh lai ti ruah len lio ah Tuluk ram in Liu Xiaobo nih a hmuh. Amah cu nuhrin covo kong ah Tuluk cozah he a ral mi a si. Nobel laksawng lakah Noel Peace laksawng hi a sang bik ah ruah a si.

Tuluk ram ah nuhrin covo kong he pehtlai in caan saupi buaibainak um lo tein rian a tuan ruang ah kan pekmi a si tiah Nobel laksawng a petu hna nih an chim. Sihmanhsehlaw Tuluk cozah nih cun upat ngai a simi Nobel laksawng cu lakawk tlak lo ah Nobel laksawng petu khuakhangtu hna nih an tuah tiah an ti. Liu Xiaobo cu Tuluk cozah nih ram dotu a si tiah nikum December thla in kum 11 thong an thlak.

Nobel laksawng cu 1901 ah pek hram an rak thawk. An pekmi cu Physics, Chemistry, Physiology or Medicine, Literature le Peace an si. Hi laksawng cu vawleicung khuazakip kha Nobel Foundation in Stockholm, Sweden nih pekmi a si. 1968 hnu ah Economic Science cu Sveriges Riksbank nih Alfred Nobel philhlonak ah an hun chap. Nobel laksawng bu an si. Hi laksawng cu medal, catlap le tangka an si.

2010 Nobel laksawng hmumi hna cu

Physiology or Medicine

Robert G. Edwards

Physics

Andre Geim

Konstantin Novoselov

Chemistry

Richard F. Heck

Ei-ichi Negishi

Akira Suzuki

Literature

Mario Vargas Llosa

Peace

Liu Xiaobo

Economic Sciences

Peter A. Diamond
Dale T. Mortensen
Christor A. Pissarides

Ch: Nobelprize, VOA

Waihnin Pwint Thon nih Kawlrampi kong Labour Party Conference bia

2007 Ramkhel Lamzawh Philhlonak

World University Rankings 2010-2011

Vawleicung Sianghleirun tha bik 10

Times Higher Education nih vawleicung sianghleirun tha bik 200, 2010-2011 cazin an lak i pakhatnak ah Harvard University a si tiah an ti. Fimcawnnak lei ah minthang a si ve mi British ram i um Cambridge le Oxford cu 6nak le 7nak an si. A dang hlathlai bu pakhat nih an an chim ve nak ah cun Oxford hi pakhatnak a si.

Vawileicung sianghleirun tha bik 5nak tiang cu US ah a ummi lawngte an si. Cun a tha bik 50 tiang ah hin British in sianghleirun 5 lawng an i tel. Australia in 2 an i tel ve. A tha bik 200 lakah Asia in Tuluk cu 6 an i tel kho i cucu a tambik a si.

Times Higher Education nih an chekhlatning cu cawnpiak ning, kherhhlai ning, cawnpiaktu le siangngakchia hna i an thimnak pawl an zoh in tuahmi a si. British cu vawleicung ah fimthiamnak ah cun 2nak ah a um rih ko tiah hlathlaitu hna nih an ti.

Harvard University a minthannak pakhat cu Business cawnnak lei kam ah a si. Laimi zong zeimawzat cu Harvard University in degree a lami an um ve cang. Cun biaknak lei kam ah sianghleirun tha bik 5nak a simi Princeton University in a dihmi zong Laimi an tlawm ti lo.

Vawleicung Sianghleirun thabik 10 hna cu;

1 - Harvard University

2 - Californai Institute of Technology

3 - Massachusetts Institute of Technology

4 - Stanford University

5 - Princeton University

6 - University of Cambridge

7 - University of Oxford

8 - University of California, Berkeley

9 - Imperial College London

10 - Yale University

Ch: Planet, BBC

Kan Nunzia

DKTluang

( I )
"Mi lo ah
Zu le zawng,
An i seh," timi
Phungthluk te kha
Hun ruah thanah
Atu lio Laimi
Kan nun/umtu hi
A si ko lo ma?
"Vawlei cu aa thleng kho lo nain,
Minung lungput cu aa thleng kho."

( II )
"Hmurfung bia laa
Zaangfung thahnem"
Biachim nih thiam
Zei tuah fawn lo
Na chimmi bang
Hei tling/si sehlaw
Zaangfung thahnem
A si hnga mu?
"Chim lawng theih i;
A tuah theih lo hi sual phunkhat a si."

( III )
"Sanglai inn ah dir"
Na tuahmi thil
A theitu nang
Na ton lai thil
A hmutu Pathian
"Sanglai inn ah dir"
"Thil cu tuah sual khawh a si;
Nain tuah hraam lo cun tuah sual cu a har."

Malaysia Exodus Diary, Biahlei

Salai Lian Biak Hu

Zanghleicawi riantuan hna

Mipi caah tiah zanghleicawi in rian a tuan mi hna lawmh an um tuk. Sihmanhsehlaw caan a rauh ah cun lung a si tawn lo. Len tik zongah mithmai tha hmuh a har. Bawmh hal tik zongah kutput a hau. A ngei lo nih bawmhnak hal na lakah docawi hmasa a hau. Theihhngalh mi an um ah hmai a hngal nain an hnu an kan chit hnu cu an hmai kan hmu kho ti hna lo.

Zapi caah rian an tuan kan ti ko nain zeimaw caan ahcun anmah caah an i hui. Kawlrampi uknak tang umawk a that lo tuk caah ramleng kan chuak. Asinain zeimaw caan ah cun kan duh lomi Kawlrampi uknak bantuk in an kan tuah caan zong a um theo tawn. Saram zuatnak hmun i an zuatmi vui an thlahmi bantuk an si. (A ke ah hri in an hren i kar nga lawng a kar tawnmi an thlah hnu zongah kar nga lawng a kar mi vui bantuk.)

Internet Tuanbia

Thongtla 120 Insein thong in an chuak

Insein thong, Yangon

Tuchun August 24, 2010 ah Insein thong i a ummi thongtla 120 cu thlah an si. An thlah mi hna cu misual, kum tlawmte thong tla ding le a chuak lai mi pawl an si. Ramkong ruangah thongtla mi an i tel rih lo tiah BBC cacawn nihnih zan thawngzamh (24.08.10) nih a chim.

Kan hnu lei August 21, 2010 ah khan phungki pakhat nih thonginn ah thongtla 9700 leng sinah thawngtha a va chim. Thawngtha chim pah in hnipuan le rawl zong a dangh pah hna. Cu lio ah cun thongbawi nih thongtla 300 hrawng thlah ding an um, a rauh hlan ah kan thlah hna lai tiah an rak chimh.

Cun ILO kong he pehtlai in Mandalay biaceih zung nih Magway peng Thayet thong i an thlak mi hna 2 (Myint Maung le Thura Aung) zong an chuak ve. Sinain thongchung ah 4 an tang rih tiah BBC nih a chim.

Ch: BBC, BBC

Miss Universe 2010

Jimena Navarrete (Mexico)

Vawleicung muidawh zuamnak Miss Universe 2010, voi 59nk cu kan hnu August 23, 2010 ah khan Mandalay Bay Event Center, Las Vegas, Nevada, U.S. ah an tuah. A rak i tel kho mi ram 83 an si. Laksawng pekmi phun 4 a um i cu lakah a sang bikmi cu Miss Universe 2010 a si. Miss Universe 2010 cu Jimena Navarrete, kum 22, Mexico nih a hmuh. Atu hi a voi hnihnak Mexico ram nih an hmuh a si. Voikhatnak cu 1991 ah an rak hmuh.

Laksawng hmumi hna cu a tanglei bantuk in an si.

Miss Universe 2010: Jimena Navarrete (Mexico)

Congeniality: Jesinta Campbell (Australia)

Best National Costume: Fonthip Watcharatrakul (Thailand)

Photogenic: Fonthip Watcharatrakul (Thailand)

Ch: Miss Universe 2010, Wikipedia, Hmanthlak

Hmun zungzal seh kan tiam bia

2010 summer Youth Olympic Singapore ah an tuah

2010 summer Youth Olympic cu kan hnu kum 21 February 2008 biachahnak bantuk in Singapore ah an tuah. An tuah ni caan cu August 14-26, 2010 tiang a si lai. Cu puai ah a telmi hna cu Kum 14 in 18 kar mino 3531 an si. National Olympic Committee 205 an i tel kho.

Hi lentecelhnak cu phun 26 zuamnak an ngeih leng ah Nunphung le fimcawnnak lei zong a tel chih lai ti a si. Ziaza zong zoh chih a si lai.

Ch: Singapore 2010, Youth Olympic Games

A voi 20nk BWA civui tlamtling tein an dih

Hawaii convention Center

A voi 20nk Baptist World Alliance civui cu Honolulu, Hawaii, US ah July 28 in August 1, 2010 tiang an tuah. An tuahnak hmun cu Hawaii Convention Center ah a si.

Ram kip Baptist a ra khomi minung 4000 leng an si. BWA president David Coffey nih an tlangtar a simi “Hear the Spirit” timi hrilhfiahnak zong a ngeih hna.

Hi an civui lio ah Secretary Denton Lotz cu Baptist World Alliance Human Right award an pek. Amah cu 1988 in 2007 tiang BWA ah GS a tuanmi a si.

Hi civui ah hruaitu thar zong thim a si. President thar an thimmi cu John Upton, US in a si. Amah cu Baptist General Association of Virginia le Virginia Baptist Mission Board ah executive director a tuanmi a si. General Secretary ca i an thimmi cu Neville Callam a si.

BWA civui cu kum 5 ah voi khat tuah a si. Aralaimi 2015 a voi 21nk BWA civui cu Durban, South Africa ah tuah ding in timhtuahnak an ngei. Cun 2013 ah a voi 16nk Baptist Youth World Alliance civui zong Singapore ah tuah an i tim. Atu lio vawleicung Baptist cu ram 105 ah an um.

Ch: BWA

New York khua ah Islamic center saknak nawl Obama nih a pek

2001 September 11 lio i ralhrang hna nih New York khua um World Trade Center an hrawhnak hmun pawng ah Muslim pawl nih Islamic center sak ding in an i timhtuah mi cu US president Obama nih August 13 ah a hnatlak pi hna.

Hi hmun ah hin Muslim pawl nih an i pumhnak ding center saknak nawl an ngei ko tiah president Obama nih a ti. Cun hi ram ah miphun, biaknak thleidan lo in umnak, cawlcanghnak nawl pek a si. Muslim pawl zong nih an biaknak kong ah nawl an ngei tiah a ti.

CNN thawnghlat nih mipi sin thawng an laknak bia a let mi hna 70% tluk nih cun khi hmun ah Islamic center sak ding cu an duh lo. Minung 500 tlum innkhan, lentecelhnak khan, lemcanghnak khan, rawldawr tibantuk a telmi USD 100 million dih dingin sak timh cu cu hmun pawng i ralhrang ruangah minung 3000 tluk a thi mi hna upat pek lo a lo lai tiah an ti.

New York i khua bawi Michael Bloomberg tel in hi khuakhan mi a co hlangmi hna nih cun New York khua lai i Islamic Center hi nitlak vawlei le Muslim vawlei kar pehtlaitu hlei a si lai tiah an ti.

Ch: VOA, CNN

2010 thimnak cu a dikmi si ding an zum lo

Tukum Kawlrampi 2010 thimnak cu a ralaimi November 7 ah a si lai. 1990 ah an rak tuahmi thimnak cu ralkap nih nawlngeihnak an lak caah mipi lungtling cozah an kai kho lo. Kum 20 hnuah atubantuk thimnak an tuah than hi a si.

Mitam u ruahnak ah cun atubantuk thimnak dah ti lo cun Kawlrampi cu kan thleng kho lai lo tiah party ser in ramkong ah riantuanmi tampi an um. Sihmanhsehlaw caan a hun rauh ah cun ralkap cozah nih a tuah ding mi thimnak cu a dikmi a si bal lai lo tiah party cheukhat le mitam u nih cun an zumh.

Union Democratic Party i an chairman U Phyo Min Thein zong thimnak cu a dikmi a si lai lo tiah a zumh caah party in a chuak. Democratic Party chairman U Thu Wai nih cun hi thimnak lawng in thlennak lam a um cang tiah a ti nain atu ah cun thimnak hi a dikmi thimnak a si lai tiah a zum ve ti lo.

Demecratic Party chungtel cazin hna cu nawlngeitu (Union Election commission) sin pek a si. Cu cazin cu dothlattu sin a phan i party chungtel sin ah dothlattu pawl nih an konglam le hmanthlak 2 an hal hna tikah party chungtel pawl cu an lau ko tiah Democratic Party chairman U Thu Wai nih a chim. Cun party chungtel zong karh ti hna hlah seh ti an duh fawn tiah a ti.

Union Solidarity and Development Pary (USDP) tu cu an duh paoh in cawlcanghnak pek an si. Mipi cu kan sin nan tan ahcun nan umnak sang lam kan in serpiak hna lai, a karh tlawm tein tangka kan in cawih hna lai tibantuk in lemsawinak an tuah.

Fimcawnnak lei vunci changtu U Aung Myo Min nih University of Foreign Language, Yangon i siangngakchia le cachimtu hna sin a chimmi cu USDP nih thimnak a hmuh lo zong ah ralkap cozah nih nawlngeihnak a lak than ko lai tiah a ti tiah U Phyo Min Thein nih a chim.

Ch: Irrawaddy, AFP

Kawlrampi thimnak ni an thanh cang

2010 thimnak cu a ra lai mi November 7, 2010 ah a si lai tiah tuzing (Kawlrampi) sml 10:30 ah cozah TV in thawng an thanh. Hihi roadmap 7 i a donghnak a si.

August 16 in 30 tiangah hluatdaw aiawhtu thimmi hna cu mah le vo thlaknak hmun cio in minpek a si lai. Cun cu min hna cu September 6 in 10 tiang thimnak tlaitu committee nih zohpiak a si lai. Cu minpek mi lakthan duh ah cun September 3 ah lak than khawh zong a si tiah thawng an thanh.

2010 thimnak ding ah party minkhumh ding in a sawkmi 47 an si i party thar minkhumh ding in a sawkmi 41 an si. Culakah minkhumh dingin cohlan a si mi party 40 an si.

Party minkhumh a si cangmi hna nih party min cohlan a si ni in ni 90 chung ah chungtel cazin pek ding cu party 40 chungah party 14 nih an pek cang. Culakah Chin National Party zong August 12, 2010 ah khan min an pek ve.

Ch: Irrawaddy, NLM, AP, NEJ

Hleisen Ni siloah Hleirang buainak Ni

Rangoon Institute of Technology (RIT), March 13, 1988 ah Phoe Maw timi sianghleirun siangngakchia meithal hmual in a thi. Kawlram cozah thawngthanhca nih RIT sianghleirun siangngakchia le mipi an i thuatnak ah a thimi si tiah thawng an thanh. Siangngakchia hna nih a thihning fiangin theih an duh caah cunglei bawi sin ah thawng an hal. Daite in um thiam lo in an um. Siangngakchia Phone Maw a thih thawngpang cu sianghleirun dangdang zong ah thawng an hei zamh cio hna. Cuti thil a can caah mizohkhenhtu palik (lungthing palik) nih RIT sianginnpi cu March 14 ah an kulh dih colh. Siangngakchia cu dai tein an um khawh ti lo caah palik le ralkap 600 leng nih March 15 cun fung in an tuk an thuat hna. Siangngakchia 400 leng an tlaih hna. Cozah nih buaibainak a chuahpitu siangngakchia tiin a zi ka zuk hna lai tiah thawng a thanh chap.

8888 ramkhelnak

1985, 1987 tangka thimi ram sifak

03.01.1985 ah Kyat 100 tlap, 05.09.1987 ah Kyat 25, 35, 75 tlap hna cu an thi cang tiah thawng an thanh i Burma Socialist Programme Party (BSPP) cozah nih ramchung tangka 80% cu an fim dih. BSPP uknak tang i a ummi Kawlrampi cu a hlan a thangcho lio mi ram in ram thangcho lo bik ah Least Development Country-LDC nih December 1987 ah cazin an khumh.

Ko Phone Maw thihnak

Rangoon Institute of Technology (RIT) sianginn pawng ah siangngakchia le mipi chung buainak kha BSPP cozah nih meithal he an chuah hnawh hna tikah Ko Phone Maw cu meithal hmual tampi iin bu in a thi. Cu tlawmpal ah Ko Soe Naing zong a thi ve.

Gas in ramleng tangka tampi an hmuh

Gas a kalnak thirpep

Kawlrampi innpa hna nih mei thazang tampi an herh caah Kawlrampi in ramleng ah gas tam chinchin in an kuat. A luancia mi kum nakin nikum ah gas kuatmi in siseh, a tangka in siseh a karh deuh. 2008-2009 kum ah cun gas kuat man an hmuhmi USD 2.35 billion a si i 2009-2010 ah cun USD 2.56 billion a si. Zatuak in cun 8% a karh.

Kawlrampi innpa a si mi India, Tuluk le biatak tein atu lio gas ramleng an kuatmi ram Thailand hna nih mei lei thazang an herh tuk caah nikum i gas ramleng kuat mi cu ramleng thilkuat vialte i 33% a si tikah rampi nih biapi tak in a hngatchanmi thilkuat a si ti a lang.

Kawlrampi ah ramleng in zinan le gas riantuannak ah a tel mi company 14 an si i hmun 28 ah rian an tuan. Kawlrampi cu vawleicung gas chuak ramleng kuat tambik ah ram 11 nak a si. Ramleng thilkuat ah gas cu aman in pakhatnak a si i pahnihnak ah USD 1.6 billion an hmuhnak leithuamnak lei, pathumnak ah USD 1 billion tluk an hmuhnak lung mansung hna in an si.

Kawlrampi ah October 2009 tiang ramleng in ramchung ah hrambunh in rian an tuannak tangka hi USD 15.7 billion a si i cu lakah cun 60% cu mei lei thazang ah a si.

Ch: Myanmar Times

Kim Jong-Il tuanbia cauk an fim than

Catialtu le Cauk phaw

Kawl catial thiam Hein Lat nih North Korea president Kim Jong-Il kong a tialmi cauk cu a rauh hlan ah an fim than. Aruang cu chirhchanmi cauk hi North Korea nih chuahmi cauk siloin ramdang chuahmi a si caah a si tiah catialtu nih a chim. Cu cauk cu America in an chuahmi cauk ukhnih chirhchan in tialmi a si. A cauk tialmi chungah cun North Korea palai zung nih an chuahmi ca pawl zong an i tel ko. Asinain a dang chirhchan i a tialmi kha char in a hman lomi a si tiah Kawlrampi um North Korea palai zung nih an ti ruang ah a si.

Cuti cauk an fim cu cauk a chuah thla hnih hnuah a si. North Korea Palai zung i Kawlholh thiam mi hna nih hihi, khakha a hman lo tiah an sawhpiak. Cun a cheu Kawlca in tialmi cu Mirangholh in an leh ter. North Korea i ralkap umtuning khi a hman lo tiah an ti. Cucu a bik in a si rua tiah catialtu nih cun a ruah. Phunghrampi ah General pazeizat tibantuk America lei chuahmi cauk ah cun a tel. Asinain anmah North Korea lei in cun cubantuk a thlithup bia cu an tial lo cu ta tiah catialtu nih a ti.

Cuti cauk an fimthanmi cu a sin i a tangmi uk 350 leng a si. Dawr i an zuar liomi pawl tu cu an fim lai ka zum lo tiah catialtu nih a chim. A ruang cu tangka pek in fim a hau i tangka dih lai an zaangram tuk tiah a ti.

Mipakhat tuanbia tial duhchannak cu Kawlrampi mino hna nih hruaitu pawl an lungput, an ziaza thami tete i lak kho ve hna seh, ramkip i thil sining tete zong thei ve hna seh, a thami tampi a um bantukin a chiami zong tampi a um ve. Kan tial hnawhchanmi cu theihhngalhnak i chap dingah a si tiah catialtu nih a ti.

Hibantuk cauk chuahmi cu a miak a har ngai. Uk 1000 dih ding hi a har taktak ti zong a chim fawn. Atubantuk Kim Jong-Il cauk kong ah mipi lei in cawlcanghnak zeihmanh a um lo. Cu cauk kong zongah a tha chia tibantuk bia zong zeihmanh a um lo tiah catialtu nih a ti.

Catialtu Hein Lat cu 1965 in catial hram a rak i thawk cang. Capar 3000 leng a tial cang. Cauk in a chuahmi uk 51 a si i atu bantuk mipakhat tuanbia a tialmi hi uk 25 hrawng a si cang. Kum 2002 ah khan Lee Kwan Yu tuanbia cauk (Ramthumnak vawlei in ramkhatnak vawlei ah) a tialmi in Burma National Literature Award (Lehchom) a hmuh.

Ch: Irrawaddy

Ni a linh ning hmuhsaknak

Nikhat hnu nikhat in ni hi a lin chin lengmang. Pawngkam zohkhenhtu hna nih thingkung ramkung, tiva hna hi an rawh sual nakhnga lo biatak tein an zoh khenh ve. Cu lakah inn sak tikah thlalang in a sa mi zong an rak um thiamthiam. Thlalang hman hi pawngkam a linh ter ngaingai. Zeitluk in dah NI tha a pinh timi hmuhsaknak Green Power Science nih an tuah i cucu a tanglei youtube ah hin rak zoh cio ve hnik u.

LAITLANG KHUALIPI ZUNG LAITLANG AH UM AWK HNATLAKNAK

Hrangtar Nawnkhar

Khuapi

Kawl nih CHIN tiah an kan auhmi tlangcung deuh i a ummi miphun cu kan umnak kip ah mah le phunthek cio in holh phundang cio an rak hmang i 1931 kum milurelnak ah holh 44 a um tiah cazin an khumh. Cu holh a hmangmi chung hmanh ah cun kan rak i then rih i KHUA pakhat cio in khua an rak sa. Lovah awk ah RAM an rak i ham. Cuticun kan Laiholh ah KHUA le RAM ti bia a rak sem i, a thawngtha deuh nih KHUA tam deuh an pennak in PENG le RAM tiah a hung thang. Miuk, ram ngei tiah an rak ti hna. Miuk pakhat nih khua tampi ngaingai a rak ngei kho lo. Cu caah Mirang a rak kai tiang (1896) ah KHUARAM khan lawng a rak um rih i PENGRAM ti hmanh hi chimtlak ngaingai a rak si rih lo. Sakhua rawlrel pekmi in tuaktan deuh a rak si i, uknak ngaingai thathi in a rak leng kho lo i, KHUALIPI zong a rak um lo.

Kawlrampi sianghleirun ah Mirangca thiam a herh

Kawlrampi ramchung sianghleirun PhD le Master degree lakding ah Mirangca thiam le thiam lo camipuai tuahmi awn hnu lawng ah degree pek a si lai ti a si. 2010-2011 thawk in Test of English as a Foreign Language for Advance Study (TEFLAS) camipuai ah hmak 550 hmuh lawng ah awn a si lai i awn hlan lo phih a si lai. Atubantuk camipuai an tuahmi cu TOEFL he a lo tiah siangngakchia hna nih an i ceih len.

Fimcawnnak lei vunci zung in Kawlrampi ah PhD le Master degree an pekmi hna cu Chemistry, Physics, Mathematics, Burmese, History, Geography, Zoology, Geology le Economics hna an si. Tukum ah PhD le Master a kai mi dihlak cu 4,000 hrawng an si tiah asangmi fimcawnnak zung in thawng an thanh.

Kawlralkap cozah thawngthanhmi ah Kawlrampi ah sianghleirun (University, College, Degree College) 159 a um an ti. ASEAN ramchung ah cun sianghleirun tambik ram a si. Asinain ramkip nih theihpi mi sianghleirun ah an i tel lo. Cun fimcawnnak vunci zung, asangmi fimcawnnak zung in 2009 ah sianghleirun (University, College, Degree College) cachimtu 14,992 an um tiah thawng an thanh.

Ch: NEJ

Kawlrampi ah media zalong lo

Kawlrampi ralkap uknak tangah media cachekhlattu hna nih journal, mekazin kong he pehtlai in azizut ding ah zeicukha ti loin mah tein dinhnak ca tial ding in thilthar an chuah.

Ramchung cachuak journal, mekazin tibantuk hna cu cachekhlattu hna nih an chek dih hnu lawngah chuahnak nawl a um.

Cachuak pakhat ah cun chuahnak nawl pek a si ko nain a dang ah cun chuahnak nawl a um lomi zong a um. Cun atu ah cun cachuak pakhat ah a chuak cangmi cu a dang ca ah chuahnak nawl pek a si ti lo.

Chuahnak nawl pek a si hnuah cachekhlat zungnih cachuahtu hna sin ah fawnchawnh in chuahnak nawl pek a si than lo an ti hna i azizut minthut ter zong ton a si.

Cachuahtu pakhat nih cun an dun le dan hi hngalh a har tuk. Model pakhat nih sakat aa hruk tikah a tawisau, zeitin thutdir ning tibantuk zeitindah kan theih khawh dih lai tiah cachekhlat zung dun le dan kong ah a chim.

Atubantuk mah tein kan i din ti catial cu a dawhcah lo, hi ruangah media a thangcho hlei lai lo tiah ramchung cachuahtu hna nih an ti.

Ch: NEJ

Relchap: Irrawaddy, Irrawaddy

Burmese Martyrs' Day

July 19, 1947 cu Kawlrampi chunmui tlun ni a si. Kawlrampi luatnak ding le Kawlrampi zeitin kan i hruai lai tiah chikkhat cozah rian a tlaitu Anti-Fascist People's Freedom League hna meeting an tuahnak hmun ah thah an ton ni a si. Cucu July 19, 1947, zarhteni zing sml 10:37am a si.

Cu ni cu zing khuadei in minmei a tam, nikhua a maw, lung a fim lo, nikhua umtu ning nih mi a hliphlau lo tiah catial thiam hna nih an tial.

Bogyoke Aung San cu a hnuzul a simi Bo Htun Hla he an umnak in meeting tuahnak hmun ah cun an ra ti. Bogyoke Aung San cu taihpung le longgyi he tiah Kawl muisam keng ngai in a rak i thawh. U Ba Gyan hoi hna nih cun a hei siamsak pah.

Norway ram a voi 4nk NCCF civui

Biahmasa

July thla cu civui thla ko a lo. Vawlei cung ramkip Chinmi umnak ah civui rak tuah cio a si i Norway ram zong ah civui kan rak tuah kho ve.

Civui ni le Khual phak
Kan hnu lei July 7-11, 2010 chung Skien khua ah a voi 4nak Norway Chin Christian Fellowship (NCCF) civui an tuah. An tlangtar cu "Khrih ah lungrual tein I Korin 1:10," a si. Norway ram Baptist kum 150 tlinnak puai zong an tuah fawn. Cun Karen mi zong civui an ngei ve. Skien khua ah cun mi kan tam ngaingai.

2010 World Cup laksawng hmumi hna

Tukum 2010 World Cup cu kan hnu July 11, 2010 ah khan a dih cang. Final cu Netherlands vs Spain an chuih. Minute 90 ah an i tei kho lo. Caan hlei an pek rih hna i minutes 116 a si ah Spain lei in Andres INIESTA nih a kawl. Netherlands lei in an cham khawh ti hna lo caah Netherlands 0:1 Spain nih an tei hna.

2010 World Cup i laksawng a hmumi hna cu a tanglei bantukin an si.
Pakhatnak hmumi ram: Spain
Pahnihnak: Netherland
Pathumnak: Germany
Sui Pumpululh cotu: Diego Forlan (Uruguay)
Sui kedan cotu: Thomas Mueller (Germany)
Sui kuthruk cotu: Iker Casillas (Spain)
Mino a thiambik: Thomas Mueller (Germany)
Pumpululh chuih thianghlim bik ram: Spain

Pangpar

Salai Zing Mang

A rak i-aih tawnmi angki leng a sente
aThawng te innleng i a rak cheuhmi pear
ca a va piah tawn ai her i a lang tlang linak khabe zumte

kum tampi a rauh tikah cun
tampi an rak taang lo
cutin kum tampi a rauh tikah cun
tlawmte in lungne a tho ko.

Semmawng lio izah bu itlaihchannak cu
kum an liam par bang a rak ziam.

Caan ai leh sin par tthan ser dingah maw
a rim a rak taan
a ziamh lung riam lo ruangah dah
atu tiang a hmui, pangpar aw...

[2010 June 30]

Michael Jackson tuanbia tawi

Michael Joseph Jackson cu August 29, 1958 Gary, Indiana, US ah a chuak mi a si. Mipi nuamhnak (entertainment) lei minthang a si caah Guinness World Records zong ah min khumh a si. A hlasak mi lawng si lo in a laam zong mipi nih duh ngai a si.

Ahla album minthang deuhmi cu "Beat It", "Billie Jean", "Thriller" te pawl an si. A hnu bik a chuahmi "That Is It" hoi hna cu zoh phu taktak a si. 1986 ah "We Are the World" timi a hla nih Grammy Award pa 4 a hmuh. A hla lakah "Heal the World" timi album cu UK le a dang Europe ramchung ah zuar bikmi a si. An zuarmi dihlak hi khuai 450,000 a si. Cu hla a chuah hnu 1992 ah "Heal the World Foundation" timi bu zong sifak rethei, ngakchia bawmhnak caah a dirh beh.

Michael Jackson cu hlasa, hlaphan, laam, catial tbk zong a tuahmi a si. Anih nih a lak deuh mi cu Pop, R&B, rock le laam lei kam deuh hi a si ve. Jackson a cawlcangh caan chung vialte cu 1964 in 2009 tiang a si. A ruang cu kum 50 (June 25, 2009) a si in a nunnak Los Angeles, California, US ah a liam ruang ah a si. Michael Jackson cu a nunchung ah "King of Pop" tiah an ti.
Ch: Wikipedia
Website: www.michaeljackson.com

Salai Tin Maung Oo tuanbia tawi

Salai Tin Maung oo cu Pu Mya Din fapa a si i Rakhine ram ah a chuak mi Lai siangngakchia pakhat a si. A ngakchiat te in Yagon ah a ummi a si.

Sianghleirun a kai lio ah ramkong ah a rak i tel lengmang ve mi a si. 1965 a voi 5nk Asia nichuah thlanglei zanglek zuamnak ah biatak tein a rak i tel ve. 1972 siangngakchia cawlcanghnak ah biatak tein a rak i tel. Cu cawlcanghnak ah cun tlaih a rak tong i Insein thong ah an rak thlak. 1974 Burma Socialist Party phunghram fehter ni January 3 ah an rak thlah. 1974, Chin Literature and Culture Committee ah chungtuan an rak thim. Hi lio caan ah hin biatak tein Laimi hna kan i funtom khawh nakhnga caah tiah pa pawl min hmai ah Salai le nu min hmai ah Mai timi min bunh ding in a rak tang i a rak dirpi mi a si.

1974 U Thant ruak kong buainak ah biatak tein ralkap a rak doh tu a si ve. Hi buainak ah tlaih luat ding in Thailand ram ah siangngakchia 5 he an rak zam. Cu an zamnak ah hriam tlai siloin ramtang dohdalnak in an rak tang.

1975 in ramchung ah a rak lut than i June 6 Shwedagone siangngakchia buainak kong ah hruaitu pakhat a si. Ralkap cozah nih June 10 ah a buai mi paoh cu tlaih an rak i si i dan fakpi in an rak pek hna. Salai Tin Maung Oo bal cu a rak luat kho. Asinain Salai Tin Maung Oo cu 1976, March 23 ah tuah ding mi Hmaing kumza tlinnak tuah an timh ruangah June 19 ah an rak tlaih. Cu an tlaih lio ah cun puantar catial viate, awtaw thantar vialte chuh dih an rak si.

Cu Hmaing kumza tlinnak puai lai ah cun a pa Pu Mya Din le a upa Hla Shwe zong tlaih an rak si. A pa le a upa an tlaih dih hna hnu ah a nau nu tangkua a kai lio mi Mai Poe Poe Tin @ Ma HLa Myaing cu biatak tein a rak i tel caah tlaih a rak tong ve.

Salai Tin Maung Oo cu Insein thong amuihnak nambar 1 ah an rak chiah. Thong chung vampang ah Baibal ca a rak tial hna. Cun vampang hmun pakhat ah ka u le ka farnu kan thangthat tuk hna tiah ca a tial tak.

1976 June 25 ah a pa he tonnak nawl an pek hna. Cu zan thawk cun a pa, a u le a farnu cu Taungngu ah thong an thial hna. Siangngakchia hna cu bia an ceih hna i thah ding in bia chah an si. Salai Tin Maung Oo cu na bia na let a si ah cun biachahnak kan thumh lai tiah an ti nain "Ralkap uknak tang ah cun ka khup ka bil lai lo" tiah a ti hna. Ralkap cozah nih cun June 26, 1976 ah chun lai Insein thong ah hri thlai in an thah.

"Ka kawi le hna, mipi theihter lo in kei cu a thlithup in thah ka si" tiah a au thawng cu khat lei vampang a ummi hna nih theih dih a si. Cuticun Salai Tin Maung Oo cu a nunnak liam.

Ch: Minthu (Mizzima)

Relchihawk: Mirang, Kawl, Tinmaungoo blog, A dangdang

Brazilian ngakchia te laam

Hi ngakchia te nih hin atu ah hi tluk a laam khawh a si ahcun a upat tikah zeitluk in dah a va thiam te hnga. Amah te a ruahnak maw a si hnga a nulepa bawmhnak a tel hnga maw? Ngakchia zohkhenh ning zong hi ngakchia te a laam mi nih hin khuaruahnak tampi a kan ngeih ter lai dah.

"Hringtu Pa Ni" Thawhkehning Tuanbia Tawi

Rev. Dr. Jones Mang Hup

Hringtu Pa Ni cu fale nih pale upatnak an pek ni a si. America le Canada ram ah mi tampi nih an pale an upatnak hna le an cungah an i lawmhnak langhternak caah Hringtu Pa Ni ah an pale laksawng an pek hna. Hringtu Pa Ni cu June zarh thumnak ah a si. Pa (father) ti tikah hringtu pa lawng a si lo. Ram pakhatkhat nih pa bantukin an ruahmi, miphun nih pa bantukin an ruahmi, khuami nih pa bantukin an ruahmi an si i thiam hngalhnak lei in pa bantuk in ruahmi zong a si.

America Washington peng Spokane khua mi John Bruce Dodd nupi nih 1910 ah Hringtu Pa Ni cu a rak thawk. Sonora Smart Dodd nih Hringtu Nu ni i phungchimmi a ngaihnak in hringtu pa ni tuah duhnak lungthawhnak nganpi a ngei. A nu nih a thih tak hna hnu ah a pa Henry Jackson Smart nih a cawmkennak hna cungah lawmhnak a ngei i a pa cu zeitluk in dah a ral a that i a nun a sersiamtu le a pa i nunraithawinak a ngeih kha hi Ni sunglawi ahhin langhter a duh. A pa hi June thla chuakmi a si caah June thla hi upat peknak ni ah aa thim. Cuticun June 19, 1910 ni ah a hmasabik Hringtu Pa Ni cu Spokane khua ah a tuahpi hna. Cu hnu in hringtu pale upat ni cu America ah a karh. America President Calvin Coolidge nih June zarh thumnak zarhpi ni cu Hringtu Pa Ni ah a thanh i President Nixon nih 1972 kum ah miphun nih a zungzal in upat peknak ni, ni sunglawi ah a fehter chin. Pale a nung rihmi caah Rose pangpar sen le pale a thi cangmi hna caah Rose pangpar rang kha laksawng pek an si.

1936 ah miphun hringtu pa ni (National Father’s Day) komiti an ser i headquarters cu New York khua ah a si. Rammi nih hringtu pa khan in an bochanmi le an zohmi kum fate in an thim. Kum fate in pa ah an thimmi cu kum khat chung rammi pa (father of the year) an ti. Douglas Mac Arthur, Ralp J. Bunche, Dwight D. Eisenhower le Harry S. Truman hi kumkhat chung khuami pa (father of the year) ah cun an rak thim hna.

Samuel Adams hi America Hringtu pa (father of America) ah an rak chiah. Amah cu American Luatnak si khawhnak ah a rak cawlcang ngai i ram daw bik pakhat a si. Phunghrampi upadi a hringtu pa (father of Constitution) ah James Madison a si. Damnak sii lei cawnnak i a min a thangbik ah Hippocrates a si i cucaah amah cu Sii lei cawnnak a hringtu pa (father of medicine) an ti. Amah hi hlanlio pi Greek sibawi minthang bik a si.

Roman Catholic le Anglican khrihfabu nih an tlangbawite cu hringtu pa (father) an ti hna. Baibal nih Abraham cu zumh awktlak mi hringtu pa (father of faithful) a si a ti.
(Baibal rel awk: Gen. 17:4; Ex. 20:12; Deut. 5:16; Matt. 5:16,45; 15:4; Mk. 7:10; Johan 10:30; 15:16)

Eurovision Song Contest 2010 pakhatnak Hmumi Lena hla

Eurovision Song Contest 2010 pakhatnak Lena

Eurovision Song Contest 2010 zuamnak cu Germany ram in Lena Meyer-Landrut nih pakhatnak a hmuh. Pakhatnak a hmuhnak hla cu Satellite timi a si. Lena cu May 23, 1991 chuak (Kum 18) a si. A chuahnak cu Hanover khua Germany ram a si.

Lena hi Germany ram hlasa pakhat a si ve. Hi zuamnak i pakhatnak a hmuh hlan zong ah Europe ram chung pakhat hlasa zuar bik 100 chung ah 8nk a rak si. Atu ah cun Satellite a hla in pakhatnak ah a phan. Nikum 2009 i Eurovision Song Contest pakhatnak a hmumi hla Fairytale by Alexander Rybak cu pathumnak ah a si.

Lena hi a ngakchiat lio te zong ah laam lei hi a rak zuam ngaimi a si. Hmasabik ah Ballet in a rak i thawk i atu ah cun Jazz, Hip-hop tibantuk zong a lam ngai.

Eurovision Song Contest cu kan hnu lei 25, 27 le 29 May. 2010 ah khan tlamtling tein Norway ram Oslo khua Telenor Arena hmun ah an tuah. Ram 39 in hi hlasak zuamnak cu an i tel. First Semifinal May 25, Second Semifinal May 27 le Final cu May 29, 2010 ah an i zuam.

Mah le ram cio in hmak rak pek a si. Final ah cun ram 25 nih an i zuam. Pakhatnak a hmumi Germany in Lena nih hmak 246, pahnihnak Turkey in maNga nih 170 le pathumnak Romania in Paula Seling & Ovi nih hmak 162 hna an hmuh.

Eurovision Song Contest cu pakhatnak a hmumi ram ah tuah lengmang a si. Nikum 2009 cu Norway mi nih a hmuh caah 2010 cu Norway ram ah an tuah i hmaikum cu Germany ram ah an tuah te lai.

Eurovision Song Contest cu Lugano khua Switzerland ram 1956 ah an rak thawk. Atu hi a voi 55nk a si. (Ch: Eurovision)

2009-2010 Lairam Tanghra Awng

Kan hnulei June 13, 2010 ah khan Kawlram pumpi sianghleirun luhkhawhnak camipuai (tanghra camipuai) sungh awn cazin a chuak. Lairam zong in minung 8706 nih an phit ve i minung 1426 an awng. Zatuak in cun 16.38% a si.

Lairam cu district pahnih a um i chaklei Lairam le thlanglei Lairam tiah then a si. Thlanglei Lairam cu Mindat District tiah pennak pek a si i chaklei Lairam cu Falam District tiah pennak pek a si ve. Chaklei Lairam ah cun Tonzang, Cikha, Tiddim, Thantlang, Falam, Rihkhuadar, Hakha an i tel. Thlanglei Lairam cu Kanpatlat, Palatwa, Matupi, Razua, Mindat hna an si.

Tukum 2010 camipuai awng cazin zoh tikah thlanglei Lairam nakin chaklei Lairam awng an tam deuh. Falam hi sianginn fimcawnnak lei ahcun bochan ngaimi a si nain tukum distinction a hmumi ahcun Hakha an tam deuh. Nain 5D hi Falam in Pakhat nih a hmuh. Hakha in cun 4D tiang lawng an hmuh.

Atubantuk camipuai theipar zoh tikah Lairam cu kan thazang a der ngai rih ko ti a lang. Zakhat ah 16% lawng kan awn tikah hnarcheu cu chim lo cheuli cheukhat hmanh kan phan rih lo. Kan i zuam ngai a hau rih ti a lang ngai. Tulio Lairam fimcawnnak lutlai cu U Myint Soe a si. Lairam chung in sianghleirun luhkhawhnak camipuai phi zat le awng zat hna cu a tanglei bantuk in a si.

No. Khua, Phi, Awng, Zatuak, Distinction

01. Kanpatlat 368, 74, 20.11%, 1D 7, 2D 1

02. Palatwa 1326, 104, 7.84%, 1D 2

03. Matupi 1337, 135, 10.10%, 1D 1, 2D 1

04. Razua 221, 22, 9.95%

05. Mindat 778, 151, 19.41%, 1D 13

06. Tonzang 150, 36, 24.00%, 1D 3

07. Cikha 174, 22, 12.64%

08. Tiddim 1161, 258, 22.22%, 1D 20, 2D 1, 3D 1

09. Thantlang 591, 122, 20.64%, 1D 4

10. Falam 871, 207, 23.77%, 1D 10, 2D 1, 3D 4, 5D 1

11. Rihkhuadar 79, 12, 15.19%, 1D 1

12. Hakha 1650, 283, 17.15%, 1D 22, 2D 3, 3D 5, 4D 1

DIHLAK 8706, 1426, 16.38%, 1D 83, 2D 7, 3D 10, 4D 1, 5D 1

Atang hmanthlak ah hin tling tein hmuh khawh a si.