Malaysia Exodus Diary, Biahlei

Salai Lian Biak Hu

Zanghleicawi riantuan hna

Mipi caah tiah zanghleicawi in rian a tuan mi hna lawmh an um tuk. Sihmanhsehlaw caan a rauh ah cun lung a si tawn lo. Len tik zongah mithmai tha hmuh a har. Bawmh hal tik zongah kutput a hau. A ngei lo nih bawmhnak hal na lakah docawi hmasa a hau. Theihhngalh mi an um ah hmai a hngal nain an hnu an kan chit hnu cu an hmai kan hmu kho ti hna lo.

Zapi caah rian an tuan kan ti ko nain zeimaw caan ahcun anmah caah an i hui. Kawlrampi uknak tang umawk a that lo tuk caah ramleng kan chuak. Asinain zeimaw caan ah cun kan duh lomi Kawlrampi uknak bantuk in an kan tuah caan zong a um theo tawn. Saram zuatnak hmun i an zuatmi vui an thlahmi bantuk an si. (A ke ah hri in an hren i kar nga lawng a kar tawnmi an thlah hnu zongah kar nga lawng a kar mi vui bantuk.)

Laica thiam nih Laica an hrawh

A hlan ah cun Laica kan rak ngei lo nain Mirang an kai hnu in Laica an kan serpiak i kan ngei ve. Cu kan Laica cu dirhmun fek a ngei kho lo. Ca a si caah aa thleng lemgmang ve. Sihmanhsehlaw zeimawzat te ah cun dirhmun fek a ngeih khawh nakding a um ko nain Laica thiam hna nih an zam, a merh, an den tikah dirhmun fek a ngei kho lo.

CACC nih biatak deuh in khua a khan i zeimawzat cu a remh deuh ngai. Mitam u nih CACC cu bochan a si. CACC ah an i mer hna. CACC ah cun Laica cu an ceihmai lengmang tikah an ruahnak le an duhmi cio chuah a si. Zapi hnatlak kut thlir a si tikah cun mi tam deuh nih tei a si.

Cuticun Laica cu a kal lengmang i a hlan i kan rak ngeih mi Laica cu an nei. A lan ding mi kan ca zong an thai. Hitining in Laica cu tihawk tha lo mi aitek kung cung an kai ter ahcun a puak te lai i toh ngam lomi ah a cang sual kho.

Ramriantuan nih kan ram an hrawh

Kan ram a thancho nakding caah ram riantuan hna an um. Sihmanhsehlaw ram riantuan hna cu mah ca lawng a ruat mi an si. (Mah ca lawng a ruat lomi ram riantuan cu ram riantuan dingah an i tlak lo.) Ram riantuan hna cu anmah ca lawng an i ruah caah kan ram muisam a rawk hoi. (Hruaitu thim a hauh ah cun ahodah ka thim lai ti cu biatak tein ruah a hau.)

A hme bik in zoh hmanh u sih; Hakha ah lam tampi um in ser siam khawh a si ko nain a lu in a taw tiang lam pakhat nih a tan tikah lam dang vialte zong an rawk dih. Zeiruang ah dah a si?

Chinram zoh rih u sih; thil sining tein rak dothlat hna sehlaw Chinram tlangholh a um ko ding kanmah holh an ti ruangah pakhat le pakhat i rem lonak tiang a chuak. Zeiruang ah dah a si?

Kawlrampi ah hnatlak ning tein rak um ko seh law a thangcho tuk ding mi mah zawn lawng ruahnak ruangah ralkap uknak tangah kan um. Zeiruang ah dah a si? A ruang cu kan ram hruaitu ramriantuantu hna ruangah a si ko lo maw?

Ramriantuan zeimawzat cu ka ton bal hna. Mi zeimaw cu, uico bantuk, an luak cia luak a ei than mi zong an um ve.

Chawlet nih kan ram an hrawh

Kan chawlet chawhrawl hna nih anmah ca lawng si lo in kan ram pi ca zongah rian tha an tuan tawn. Asinain chawlet hna nih pangpar biatak tein kan ram ah an lak ciammam i kan thingkung vialte an hau dih. Ti tha a chuak kho ti lo. Thlithiang kan hmu ti lo. Nikhua a tha ti lo. Ruah a that lo tikah lo thlawh mi an rawk dih.

Micheukhat puaisa pawl nih cun anmah tangka hmuhnak ca lawng kha chikkhat cu an ruat tawn i ramleng chuahnak dingah caan tha lo zong mi an khawmh i an kal ter tik hna ah lampi ah temtuar tuk a si. Micehukhat nu cu zei an ton zong chim ngam a si lo. Malaysia an phak hnu rian an hmuh khawh lo tikah an tuanmi rian hmanh chim ngam lo a si.

Zalong lomi Media

Zarhtin te thawngthanh ca an chuah lengmang. Thawngpang pawl zong relphu ngai an si. Nain zeimaw thawngpang cu chuah ngam an si lo. Chuahduh zong ah mithmai zoh hmasa a si hoi. (Bianabia: CRC ah buaibainak a um, mipi nih lakphak dawr le riantuannak kip ah ceihphai a si. Nain media ah cu thawngpang cu a chuak lo. CCF ah upa pawl meeting an tuah, an lung an i hmu lo. Mipi nih riantuannak le lakphak dawr ah ceihphai a si. Nain media ah a chuak lo.)