Norway ram a voi 4nk NCCF civui

Biahmasa

July thla cu civui thla ko a lo. Vawlei cung ramkip Chinmi umnak ah civui rak tuah cio a si i Norway ram zong ah civui kan rak tuah kho ve.

Civui ni le Khual phak
Kan hnu lei July 7-11, 2010 chung Skien khua ah a voi 4nak Norway Chin Christian Fellowship (NCCF) civui an tuah. An tlangtar cu "Khrih ah lungrual tein I Korin 1:10," a si. Norway ram Baptist kum 150 tlinnak puai zong an tuah fawn. Cun Karen mi zong civui an ngei ve. Skien khua ah cun mi kan tam ngaingai.


Norway ram cu riantuan nih a nenh tuk hna caah civui zawh zong duh ning in a si thiam lo. Rat a duh ko nain khual phak ni ah a phan kho lo zong an tam ngai. Khual cu July 5 in 10 tiang an phan hna. Minung kan tlawm lai tiah ruah a si nain kan i timhminak in kan tam deuh. khual 300 in 400 kar kan si.

Mah tein um cio
Khual a pha mi paoh riahnak ding ah sianginn pakhat hlan a si. Cu hmun ah cun mah le khua cio in khan phawt an si. Ihphah zong mahte in rak i phawrh cio a si. Cu lawng hlah, rawlchuannak um zong mah tein i phawrh a si fawn. A ruang cu civui tuahnak khua mi hna kha an re thei hlah seh tiah ruah a si caah a si.

Rawl chuan tik zong ah tuzing an nih khua rawl chuan, tuzanlei an nih khua rawl chuan tiah i phawt a si. Cuti riantuan ti zong cu hawikomhnak ah a tha tuk mi a si.

Chinmi Church 6 an i tel kho
Norway ram ah Chinmi Church 6 nih Norway Baptist Union (NBU) he pehtlaihnak an ngeih caah civui hlan deuh te ah NBU conference zong an ngei ve. NBU EC chungtel 4 ah minung 3 thim ding a si i Chinmi in Pu Thang Hlun zong thim a si ve. Cun NBU nih Chinmi Pastor Ngun Cung cu Reverend an pek fawn.

Norway mi sin kan i pum
Cawn nithum July 7, 2010 zan cu Norway mi he fonh in pumhnak kan ngei hna. Chinmi zong nih hlaremh kan ngei kho ve. Cun zarhte July 10, 2010 zan cu ruakhatlak laam le hlaremh kan ngei kho. Chun zong ah Skien khua, khua laifang tualleng ah ruakhatlak laam in caan kan hmang kho fawn. Laithuam he kan si hna tikah an khua ruah kan har ko.

Meeting a tam
NCCF civui a si ko nain hibantuk hmun khat i ton hi a fawi lo tuk caah caan tha hmang in bu dangdang zong nih meting tuahnak caan NCCF upa te an hal hna i an tuah ve. Chin Community in Norway meting tlamtling in an dih kho. Thimnak zong an tuah i 2010-2012 chairman thimmi cu Peter Sang Lian Thang a si. Cun NCCYF EC meting, CNF-CN meiting zong tlamtling tein an tuah kho hna.

NCCF bupi meting cu nihnih chung an thut hnu ah tlamtling tein an tuah kho. Norway Chin Christian Fellowship tiah kum tampi an rak i hruainak cu phunghram thar an ser i ceihmai a si. Zapi lunglting in Norway Chin Christian Fellowship cu Norway Chin Christian Federation ah thlen a si cang. 2010-2013 tiang hruaitu Chairman caah Pu No Thawng thim a si.

Civui thawngtha
Civui chung ah thawngtha chimding in Kawlram lei ah Rev. T. Pa Hrang cah a si. Cun Rev. Pa Ni Maung zong a phan ding a si. Asinain kan civui chung ah an rak phan kho lo. Norway ram khuasa Chinmi upa le Pastor hna nih thawngtha an kan chimh i kan lung a hmui thiamthiam.

Vok an kan thah
Inntek a si mi Chin Christian Fellowship in Telemark nih vok sum 6 fai an thah. Civui zanriah cu zarhte zan July 10, 2010 ah kan i hrawm hna. Sa vo cu rua in an thil i phawt cio a si. Cuti rawl kan i hrawn lio ah cun Norway ram ah kan um ti zong kan i philh phah. Kan ram ko a lo an ti cio.

Mino concert
Mino hna zong zarhte zan cu concert an tuah. Anmah tein an i hruai hna. Hla an sakmi zong anmah tein phan chommi an sa kho hna i lawmh an um taktak. An aw nih a tha. An hruaitu hna zong an thiam. Culakah lawmh a um tuk mi cu Laihla bak in concert an tuahmi hi a si. Kawl hla cu kan zuun thiam lo an ti. Tulio mino an chairman cu Cung Cem Bik a si.

Nehnang fim
Chinmi tuahmi puai ah cun nehnang fim hi a har ngaimi a si. Miphundang sin i zuu le beer nehnang fim ko hi ningzak zong a si fawn. Nain Tutan civui ah cun cubantuk a um lo. Norway hmunthur cheukhat cu zuar khawh a si i zuu le beer hmunthur tu cu ka hmu lo. Cola, theithu hnang, pepsi tbk thawl lawng an um.

Cun sianginn khan zong an hmunthur phiah ding le thil fim ding an i ngaihlah tuk mi zong anmah tein an rak thianh dih tikah tuah ding a um ti lo. A ummi cu tawh va hrenh lawng a si hoi.

Khual tlun

July 11, 2010 zarhpi ni cu chunpumh a dih hnu in thil fim i tlun cio a si. Aruang cu NBU chawnhbiak in tuahmi civui a si tikah an khuakhan ning in zulh ve a hauh caah a si. Khual an tian dih hnu cu inntek cu an li a leng hringhran ko. Hmailei tu ah tonthannak um ko seh ti lawng thla an cam ko cang.

Civui ca a dihmi
Nikum Oslo ah civui ca i a dihmi cu Kr. 150,000 leng a si tikah civui tuah hi an tih ngai cang. Leiba zong tamlak te ngeih a si. Nain tukum civui ah cun Kr. 70,000 hrawng lawng a dih. Civui tuah ning cu aa khat thiamthiam ko. Cu nih a langh ter mi cu riantuan zia kan thiam deuh cang mi a si.