 |
Britain i a ngan bik Christmas thingkung, Wakehurst Place, West Sussex. |
Nawl Hre Cin
Christmas caan paoh ah thingkung pawl hi Christmas hmelchunhnak ah kan hman tawn hna. Mah hi phung hi kan hlan i Khrihfa a rak simi hna nih an rak tuahtawnmi a si ruangah kan tuah sawhsawh ve bia a si lem lo. A ngaingai tiah cun thingkung, thinghnah timi pawl hna hi minung kan nunnak he then awk a tha lomi hrim an rak si. Thingkung, thinghnah pawl biaknak hmelchunhnak i hman timi hi Khrihfa chan hlanpi, a luancia kum 3000 in a rak i thawk diam cang. BC 1300 hrawngah Egypt miphun pawl nih khuasik caan ni tawibik (winter solstice)1 ni ahhin puai an rak ngei tawn. Cuahcun, kum khat chung a hnah a hring khomi thingkung kuhchuk (palm) a hnah khi an inn tamhnak ah an rak hman tawn. An tuahhnawhchan bikmi cu kan cinthlak hna hi a thar in kumkhat chung hring zungzal sehlaw thei tha tampi tlai seh tinak caah a si. Rome miphun pawl zong nih hi khuasik caan ni tawibik (winter solstice) ni ahhin puai an rak tuah tawn ve. Cu puai cu Saturnalia tiah a min an pek, i cinthlak lei pathian a simi Saturn upat peknak caah an rak tuah tawn. Egypt pawl bantukin Rome miphun pawl zong nih an inn hi hnah hring in an rak tamh tawn. Cuti an tuahnak nih cun an cintlak pawl kumkhat chung hring dildel in a um ter tiah an rak zumh.
Kum zabu 5nk A.D. a thawk ka hrawngah hin Europe nichuahlei ram tampi nih far kung an innhmai phun hi an rak hman ve. Mah an tuahmi nih khuachia khuavang (evil spirit) a kham, a ratter kho lo tiah an rak zumh. Mah cu phung cu kum zabu 7nk (A.D. 725) tiang pehzulh tein an rak tuah rih. Kum zabu 7nk ahhin England ram Devonshire khua mi Boniface timi pa hi Europe ram, a bikin Germany, ahhin Pathian thawngtha phuan dingin a va phan. Amah hi German i a thil tha tuahmi tampi ruangah St. Boniface tiah mi zapi nih theihmi ah a hung cang. Nikhat cu minung tampi thingkung nganpi (kuhthing kan timi thingkung khi a si) tangah ngakchia raithawinak an rak tuah hnik kha a hmuh hna. Cu thingkung cu tthawnnak a ngeih caah tonghchia a si tiin an rak ruah. Boniface nih cun ngakchia raithawinak tuah cu a va thloh hna i cu an thingkung cu a haupiak hna. Cuka pawng i a ummi farkung tu kha a hmuhsak hna. Mah hi thingkung hi a thiangmi thingkung, ngakchia te Jesuh hmelchunhnak thingkung a si tiah theihternak a tuah hna. Hi thingkung hi Khrihfa hna nih kan zumhmi thumkomh Pathian hmelchunhnak a si tiah a cawnpiak fawn hna. Cu ni thawk cun an innhmai far kung chiahhram an i thawk cio. Mah cu dawtnak le zaangfahnak hmelchunh (sings of love and kindness) tiah min an pek. Mah hi Christmas thingkung i a tuanbia a rak i thawknak ahrambik a si tiah an zumh.
Christmas tingkung tamh, Christmas thingkung cung i mei (candle) a ceumi tete rakchiah, belte hi kumzabu 16 nak hrawng ah Martin Luther nih a rak thawk. Mah cu thawk in cun chaklei Germany hrawngah Christmas thingkung an tamhmi tete hmuhkhawh pah a si cang. Cu an tuah tawmmi te cu Germany ram dihlak le ramleng tiangah chikkhat teah a rak karh cawlh. United States of America zong nih German pawl sinin an rak i lak ve i kumzabu 18nk in Christmas thingkung tamh an hun thawk ve.
A hlandeuh ah cun Christmas thingkung tamh hi Roman Catholic pawl nih cun Protestant pawl nih an i ngeihmi phung ah an rak ruah. Asinain Christmas bantuk in Christmas thingkung tamh timi zong cu Roman Catholic pawl zong nih an hun cohlan cawlh ve, a ruang cu hman lo dingin kham khawh a si ti lo. Kumzabu 18nk tiang i Christmas thingkung an tamhmi pawl hna hi inn ah mahte i tamhmi lawngte an si, a deu pakhat hmanh an rak um rih lo. Christmas thingkung a deu in tuahmi hi kumzabu 19 lio hrawng in Germany ah biatak tein an rak tuah. Kumzabu 20 nak hawi hna ahcun Christmas thingkung hi a taktak asimi nakin a deu i tuahmi tu mi nih uar deuh a si cang. 21st century ah cun Christmas thingkung a deu hmang lo bakin mah tein tamh a hmangmi cu Laimi lawng kan si cang men lai. Hlanlio deuh ahcun Christmas thingkung hna hi Christmas phak lai ni taktak lawngah inn chungah chiah i tamh a si tawn. Asinain atu ahcun, sipuazi lei a tuakmi pawl hna nih thil man deuh seh ti an duh caah hmun tampi ahcun October thla dih hrawngin dawr, Mall chung te pawl ah dawh tein an tamh i an chiah cang.
Jeremiah 10:1-5 hi cherhchan i lak zau in Khrihfa cheukhat nih cun Christmas thingkung tuah le tamh hi an khamh. Asinain hi Bible ca nih a duhnak cu thing, ngun, le sui hei ti pawl in siasal ser i biak a dohnak tu a si deuh. Hi zawn hi Khrihfa pawl zong nih biatak tein kan i ralrin a herh vemi a si. A chuah ni kan lawmhmi Jesuh Khrih tu philh zauin Christmas thingkung tamh tuktak ah kan i zat sual ahcun a thami thil a si ti lo. Cucaah Christmas thingkung timi hi hawi nih an tuah cio caah tuah sawhsawh si loin, Jesuh Khrih kan ca i vawlei ah a chuahnak a hun kan theihter thantu siter hna u sih. Cu lawng ahcun Christmas thingkung timi hi man ngei le sullam ngei a si lai.
1Khuasik caan ni tawibik ni (winter solstice) cu December 21 asiloah 22 ni a si.
Hrete, Christmas tree thawhkehnak zei maw zat na hun kan cheuhboh (share) caah tampi kai lawm, cun ruahnak cheuh kan duhmi cu Germany le Rome nih an rak thingkung le thinghnah biak hram an rak i thok ning zong reference langhter chih law ka duh...nangmah bia le nangmah ruahnak sawhsawh ttialmi hna alo i Academic writing ahcun source le Ref., etc... langhter hi biapi ngaimi asi. I zuam chin ko thilttha asi.
ReplyDelete