Nobel Peace laksawng cotu a bau

Lung siarem lo ngai in Nobel Committee chairman
Thorbjoern Jagland nih Liu Xiaobo thutnak
a lawn ko cu a zoh

Vawleicung laksawng lakah a sungbik tiah ruahmi Nobel daihnak laksawng cu nizan December 10 ah pek a si cang. Sihmanhsehlaw cohlangtu a um lo caah a thutnak hnga hmun ah chiahpiak a si. A cotu ding Liu Xiaobo cu Tuluk cozah nih thong kum 11 tla ding in thong an thlak caah a si. A nupi nih lak ding a si ko nain leng chuakkho lo in an tuah ve.

Hi laksawng laknak hmun pawng ah Tuluk mi cheukhat cu duhlonak an rak langhter. Zeiruang ah dah hihi nan tuah tiah thawnghlat nih mi pakhat a hal. A lehmi cu nan pekmi laksawng hi daihnak laksawng a si. Hipa Liu nih hin Tuluk ram ah zeidaihnak dah a tuah mi um, Tuluk ram daihnak caah zeihmanh a tuah mi a um lo. Cucaah kan duhlonak kan langhter tiah a ti.

Nobel daihnak laksawng cotu aiawh in Norway mi fidi Liv Ullman nih a zaka in bia a chim. Liu i a ruahnak pawl a chim. Biapi bik Liu alungput cu "Kei cu ral le huatnak ka ngei lo," tiah a ti. Liu nih Nobel committee sin ah bia a cah mi hna cu keimah laksawng nan ka pek cu 1989 i Tiananmen Square democracy ca a cawlcang mi pawl nan pek a si tiah a ti.

Laksawng peknak hmun ah cun minung 1000 leng an chuak. Cu lakah Norway ram siangpahrang le siangpahrang nu zong a laicer ah thu in an telpi ve hna.

Tuluk cozah nih Nobel daihnak laksawng cu an tlaihmi Liu nih a hmuh caah an cohlanpiak lo. Laksawng peknak zongah a kal lo lawng siloin ramdang zong kal hlah u tiah a ti hna. Norway ram um ramdang palai zung paoh cu sawm dih an si nain palai zung ram 19 cu an kal lo.

Atu bantuk Nobel daihnak laksawng pumpak in a rak la kho lo mi 4 an rak um. Cu hna cu Carl von Ossietzky (1936), Andrei Sakharov (1975), Lech Walesa (1983) le Aung Sann Suu Kyi (1991) hna an si.

Ch: Guardian, Nobel