Hleisen Ni siloah Hleirang buainak Ni

Rangoon Institute of Technology (RIT), March 13, 1988 ah Phoe Maw timi sianghleirun siangngakchia meithal hmual in a thi. Kawlram cozah thawngthanhca nih RIT sianghleirun siangngakchia le mipi an i thuatnak ah a thimi si tiah thawng an thanh. Siangngakchia hna nih a thihning fiangin theih an duh caah cunglei bawi sin ah thawng an hal. Daite in um thiam lo in an um. Siangngakchia Phone Maw a thih thawngpang cu sianghleirun dangdang zong ah thawng an hei zamh cio hna. Cuti thil a can caah mizohkhenhtu palik (lungthing palik) nih RIT sianginnpi cu March 14 ah an kulh dih colh. Siangngakchia cu dai tein an um khawh ti lo caah palik le ralkap 600 leng nih March 15 cun fung in an tuk an thuat hna. Siangngakchia 400 leng an tlaih hna. Cozah nih buaibainak a chuahpitu siangngakchia tiin a zi ka zuk hna lai tiah thawng a thanh chap.

Cuticun siangngakchia hna cu an dai kho ti lo. Rangoon University zong ah cu thawngpang cu an theih ve tikah dai tein an um kho lo. Sianginn kulh chungah cun buaibai ngai in an um hna. Cu lio Rector Dr. Chit Shwe zong nih chun suimilam pakhat ah siangngakchia hna sin ah bia a rak chim. Siangngakchia hna zeidah nan duh tiah a rak hal hna i “Phatsit cozah thlak ding” tiah hmunkhat awkhat tein an rak au. Sayaci nih cun siangngakchia duhnak cu a theihthiam ve caah sianginn kiam chungah nan um ah cun nan him ko lai, a leng ah chuak duh hlah u ti zong in bia a rak kamh hna. Siangngakchia hna zong nih sianginn kiam chungah cun an duhnak cu an rak langhter. An umnak sawng kip ah kal in an duhnak cu an rak langhter. Sianginn dang sii lei sianghleirun zong in an sin ah cun an rak i fonh ve. Cutin an i chawhleh le bia an chimlio ah cun an hruaitu pakhat nih RIT lei kal ding in a hun sawm hna, i lungtho ngai in zanlei suimilam 3 hrawng cun adipadih lam in kal hram an hun thawk. An i timhnak ah cun Pyi lam zawh zau in Hlaing Sianghleirun ah luh pah i Tamaing kiangkap siangngakchia vialte sawmdih i RIT sianghleirun kal ding a si.

Sianngakchia hna nih cun hmaisuang ah channing in an rak hmanmi awtaw thantar cu an hun i thlir i Pyi lam cun RIT sianghleirun kal ding ah an hun zawh thluahmah. Siangsangrun a kai mi hna zong nih an sianginn thuam he an hun zulh cio hna. Siangngakchia milu zong an hung tam chinchin. Cuti an hun zawh thluahmah lio Inya lam le Pyi lamkil Inya tidil hleirang pi an hun lonh ah cun ruahlo piin an dir ko. An hmai ah ralkap tampi nih thirhrihling le raldoh lai meithal hmuitinh in an rak hngah ko hna. Siangngakchia hna nih cun miphun hla le ralkap hla cu tlo thluahmah in an hun i sak. Cu lio ah cun an hnulei in lungthing palik za leng nih an hun kulh kham ko hna. Siangngakchia hna cu an ar ko. Hmailei ah ralkap, hnu lei ah lungthing palik, an sir (keh le awrh) ah Inya tidil le tlakrawh vampang a si. Cu tlawmpal ah cun nawl an hun chuah i lungthing palik nih cun fungtuk hram cu an hun thawk. Siangngakchia hna cu mah le mah hngal lo an mah le phaknak cio ah an tli hna. A cheu cu tlakrawh vampang an per, a cheu Inya tidil ah an zuang. A tli kho lo mi nu tam u cu lungthing nih fung in an tuk chih khun hna. Cuticun siangngakchia hna cu an tli zam, an i thup cio. Lungthing nih cun a tli kho lo paoh cu an fung cun an tuk hna, an tlaih hna i a cheu cu Inya tidil ah an hnim an thah hna. Cuticun hleirang tidil vam cu siangngakchia thi nih a khuh dih i hleirang tidil vam cu hleisen ah a hung i cang.

Cuti mithi le hmapu tampi cu lungthing palik timhcia in a rak ummi hna nih siangngakchia a thimi cu mawtaw cung ah an hlonh hna i a thi lo mi hna zong an tlaih hna i mawtaw cungah an hun chuan hna. Cu tlawmpal ah meithahnak mawtaw a ra zau i thi lawngte in a khatmi hmun cu thiang cikcek in an hun tuah. Cuti timhcia tein an hun um mi cu thawngthanh baichimnak zung in nawl an hun chuahmi a si. Cu ti nawl chuahtu cu mahsahla (BSPP) U Ne Win i a milu U Sein Lwin a si.

Cuti mithi an um lio March 16 chun suimilam 12 hrawng ah cun lungthing mawtaw pakhat a ra i nu pathum, an tanglei thi he zoh ngam lo in a ummi hna cu mawtaw cung cun an hun thlak hna. Cu mi hna cu an thaw a um rih caah a hmumi siangngakchia cheukhat nih a naihnak bik lakphak dawr ah an kal pi hna i khuadei tiang an hun hngah hnu zing suimilam 5 hrawng in siizungpi ah an hun kal pi hna. Siizungpi ah cun an mah bantuk ningcang loin an rak tuahmi hna tampi an um tiah sii sayama (nurse) pakhat nih a chim. Pakhat nu hoi cu mitampi nih sualpi hna sehlaw a dawh, a nauinn a kuai ruang ah siizungpi a phak cangka a thi beh tiah thawng an theih.

1988 March 17 ah cun siangngakchia tampi cu boihlaknak innhmai ah cun an i khawm hna i Student Union an hun dirhnak kong thawng an hun thanh. Cu hmun ah cun siangngakchia hruaitu pathum (pa pahnih nu pakhat) nih bia an hun chim.

Siangngakchia Phoe Maw ruak cu Kyintaw thlan hmun ah meikhangh ding a si caah siangngakchia tampi nih an hngah lengmang ko. Sinain Phoe Maw ruak cu Tamwe thlanhmun ah cozah nih a thlite in chun suimilam pakhat ah an rak vui diam. Siangngakchia hna cu an lung a rak faktuk hringhran.

Siangngakchia hna sianghleirun sianginn an rak kir cun sianghleirun pi cu lungthing mawtaw le ralkap mawtaw ngan pipi nih an rak kulh dih ko cang. Dr. Chit Shwe nih cun sianginn leng nan chuah lo paoh cun nan him ko lai tiah siangngakchia hna cu a rak chimh hna.

Sianghleirun kiang i a ummi mawtaw cu zanlei 2 hrawng cun sianginn chungah an hung lut i siangngakchia hna cu an rak tlaih, thuat thluahmah hna. Mitthli tlaknak a si mi bom zong an rak puah. An umnak khan tiang dawi zau in tlaih le thuat an rak si. Nu he pa he tlaih an si hna i mawtaw chungah cun vok le ar hlonh in an hlonh hna, an ben hna i mawtaw cung ah a thi zong an rak thi phah.

1988 March 18 ah Student Union thar dirhmi nih cun Phoe Maw thihnak, hleirang pi mithahnak le a dangdang siangngakchia temhinnak biadik chim ding ah masalah cozah sin ah an rak nawl hna. Masalah cozah nih cun hlathlaitu bu sin ah thlakhat chung hlathlaiding rian pek zau in thanh ding ah tuanvo an pek hna. (Thawngpang dik an rak chimlo)

March 16, 1989 ah sianghleirun kiam chung Bo Aung Kyaw thlan hmunrawn ah philhlonak a voikhatnak siangngakchia hna nih an rak tuah.

Ch: niknayman