Daw Suu nih CGI ah bia a chim

Daw Aung San Suu Kyi nih Clinton Global Initiative ah online in bia a chim.
Minute 37:30 in Daw Suu biachimnak aa thawk lai.

Private sianginn tuahnak ah thil 8 le ramchungmi si a herh

Phungki sianginn, Hakha. Ht. MT

Atu ah cun private sianginn tuahnak phunglam a hran an ser dih cang. Cu phunglam a hran cu nunter a si tikah private sianginn tuahnak caah a herhmi phun 8 an um. Private sianginn tuah a duhmi asiloah bu chungtel hna cu ramchungmi an si lai ti a si.

Private sianginn tuahnak phunglam hran cu hlutdaw zung nawlngeihnak ca nambar 9/2011 in an chuahmi ca a si. Private sianginn tuahnak phunglam hran cu dal 8 a si i phunglam cang 41 a um. Private singinn tuahkhawhnak dingah a herhmi cu phunglam cang 8 nak ah a um.

A voi khatnak Daw Suu ca an chuah khawh

Daw Aung San Suu Kyi thong a chuah hnu in a ca a voi khatnak ramchungah an chuah khawh. Biaruahnak le Bagan tlawnnak capar ramchung ca chuah hna nih an rak halmi cu an chuah khawh cang. Biaruahnak ca cu September 4, 2011 The Messenger Journal ah a si i capar cu September 6, 2011 The People’s Age journal ah a si lai.

Daw Suu he biaruahnak a ngeimi The Messenger Journal ṭuanvo ngei editor pakhat nih cun hitin a chim. Biapi in halmi cu mino kong a si. Tuchan mino hna hi Daw Aung San Suu Kyi zeitin a hmuh hna timi tlangtar in kan halmi a si tiah a ti. Cachektu sin kan ca kan ap cu kan biahalnak a dih bak in kan ap colh ko tiah a si. Sihmanhsehlaw a caan a rauh kong cu a chim chih lo.

Daw Suu capar an chuah duh lo

Ramkong lei ca biatak in zarhtin chuahmi The People’s Age journal nih Daw Aung San Suu Kyi sin ah capar an hal mi cachek zung nih an chuahpiak duh hna lo. Cachek zung ah kan chiahnak zarhkhat leng a si cang tiah editor lutlai Phe Myint nih a chim. Cu capar cu Daw Aung San Suu Kyi sin in kan hmuhnak zarh thum leng a si cang tiah editor Maung Wa Tha nih a chim.

Zeitik ah dah hi ca hi chuahnak nawl a kan pek lai timi bia lawng hi ka hngak ko. Nawl a kan pek ahcun thawngṭha tuk a si hnga. Tuante ah nawl kan pe hna seh law a ṭha, tuante ah kan chuah colh ve hnga ti zong editor Maung Wa Tha nih a sia herh a hun chim chih.

Cu capar cu Daw Aung San Suu Kyi nih ramchung cachuah sin ah a voi khatnak a kan pekmi a si. A dang cachuah sin ah a pek hna le pek lo cu ka thei lo tiah editor Maung Wa Tha nih The Voice Weekly sin ah a chim.

The People’s Age Journal cu June 2010 in chuah hram rak thawkmi a si. Editor lutlai ah caṭial thiam Phe Myint a si. Hi ca chuahnak nawl an pekmi cu caṭial thiam Maung Wa Tha min in a si.

Ch:  The Voice Weekly