Private sianginn tuahnak ah thil 8 le ramchungmi si a herh

Phungki sianginn, Hakha. Ht. MT

Atu ah cun private sianginn tuahnak phunglam a hran an ser dih cang. Cu phunglam a hran cu nunter a si tikah private sianginn tuahnak caah a herhmi phun 8 an um. Private sianginn tuah a duhmi asiloah bu chungtel hna cu ramchungmi an si lai ti a si.

Private sianginn tuahnak phunglam hran cu hlutdaw zung nawlngeihnak ca nambar 9/2011 in an chuahmi ca a si. Private sianginn tuahnak phunglam hran cu dal 8 a si i phunglam cang 41 a um. Private singinn tuahkhawhnak dingah a herhmi cu phunglam cang 8 nak ah a um.

Cu hna cu;

(a) A tlawm bik tang nga in tang hra tiang cawnkhawhnak sianginn si ding timhlamhnak ngeih ding

(b) Sianginn pawngkam, sianginn kulhchung le sianginn cacawnnak khan hna cu ngandamnak he a tlak in thianghlimte in um ding

(c) Sianginn cu cacawnnak he aa tlak mi inn si ding

(d) Siangngakchia hna an kum le minung zat in sianginn thilri, cacawnnak caah a herhmi thilri le thutumnak ah an i zaatding in um ding

(e) Cawn dingmi ca cawnchap duhmi cawnnak le cawnchap dingmi ca hna cu a tling i a hmanmi khawmhsuatmi si ding

(f) Catang kipah cawndingmi ca cachimtu ah mah nih ngeihmi cachimtu tling in ngeih ding

(g) Cawndingmi ca i zarhtin cawnding mi cu thate in tuah ding

(h) Riahnak inn ser a si ahcun cu riahnak inn cu riahnak ah hmanawk a thak mi a si lai. Nu le pa riahnak thleidan a si lai i nu riahnak cu humhimte in kilhkamh ding. Riahnak kip ah ṭuanvo ngeitu chiah ding. Poipang caah ngandamnak lei i a herhmi zohkhenhtu chiahpiak ding

Cu hlei ah private sianginn tuah tikah ramleng bawmhnak in tuahmi a si lai lo. Ramdangmi nih tuahmi asiloah cu bu hna nih tuahmi sianginn a si lai lo. Biaknak lei nih tuahmi sianginn a si lai lo tiah phunglam a hran cang 7 (a) ah a um.

Ch: Eleven Media Group