Sunday, May 8, 2011

Laiholh in holh

Salai Lian Biak Hu

Laimi a simi caah Laiholh in holh i ti cu sullam ngei lo a lo. Laimi a si ko mi nih Laiholh in an holh ko hnga lo maw van ti awk in a um. Nain Laimi zong ram tampi ah khuasa mi kan si ve. Kan umnak ram i an holh kha cawn kan i foih ngai heo. Cu caah hi bia hi a rak biapi ngai han.

Yangon 2004-05 hrawngah khan Lai Baptist Church, Yangon (LBC) nih pangtar ca pakhat an rak chuah. Cucu Laiholh in holh ti a si. LBC chungtel a simi inn paoh ah tar a rak si. Innchungkhar ah Kawlholh a hmangmi an tam, Laiholh a hmang theng lomi zong an rak um caah a si. A cheukhat Yangon um Laimi cu anmah le anmah i chawnhbiaknak zongah Kawlholh kha an hman heo. An kaa a naal deuh hlei ah an caah a thlum khun. Hi thil hi LBC lawng ah a si lo hmun dangdang zongah a simi a si.

Ramdang um Laimi kan holh ruah tikah phundang in a um. Lairam ah a hang i Laiholh in a holh mi caah cun nitin an holh mi hi ruah awk a um tuk lo. Nain ramdang ah a hangmi mino ngakchia caah cun aa thleng ngaingai.

Nitin sianginn kainak le rianuannak ah miphun dang holh hman a si. Inn lawngah Laiholh cu hman a si. Laiholh cawn caan a um ti lo. Miphun dang holh cawn aa harh vemi nih innchungkhar ah an hmanmi Laiholh tu kha an theih lo karah an rak thiam. Nain an chimmi bia ha tein ngaih tikah Laiholh a si ti lo. Miphun dang holh kha Laiholh in an hei chimmi tu khi a si cang. Biana ah “Ka laak kho ma?” “Ka hlan kho ma?” tbk. Cubantuk phun in holhmi cu Laihoh an si ti lo.

Cubantuk thil cu upa lungfim hna nih biatak in tan an kan lakpiak a hau. A hlei in innchungkhar ah i chimh, cawnpiak  thiam ngaingai a herh. Laiholh a thiam lomi hna kha an thiammi holh in Laiholh chimh a si. Cuti i cawnpiak tikah kan philh sualmi thil pakhat a um tawn. Biafang pakhat hnu pakhat kan i chim. Catlang pakhat ah kan ser. Asullam an fiang. An chim thiam. Cu vial ah cun kan ngol tawn. Cutikah a phichuak cu miphundang holh kha Laica in kan hun leh ah a cang. Cucu chimhmi hna nih an i nunpi ve. Nitin an nunnak ah an hman ve tikah Laiholh a rak si ti lo. Cucaah Laiholh in tah zeitindah kan hman ve ti zong kha i cawnpiak kho hna u sih. Biana ah “Ka laak kho ma?” timi cu “Ka laak lai hi mu?” “Ka hlan kho ma?” ti cu “Ka hlan ta lai mu” ti phun in chimh an hau hnga.

Cubantuk hiamhiam in calettu pawl nih ca an leh tik zongah a herh ngai. An lehmi cu a palhnak a um lai lo nain ca chungah kan Lai nunphung a rak um kho ti lo. Miphun dang holh kha Laiholh nih a tlinh lo ti a fawi ngai. Sihmanhsehlaw Laica in ialmi kha miphundang holh in leh va si ve sehlaw kan Lai Adjective le Adverb pawl khi zeitin an hei leh ve hnga? Cun bifang ning in leh va si ve sehlaw sullam ngei lo le bia kal ning hman lo an lo ko hnga.

Laimi cu miphun pakhat kan si. Miphun pakhat nih cun holh le nunphung a ngei. Cubantuk in Laimi zong holh le nunphung a ngeimi kan si. Mifimthiam hna nih cun holh chungah hin nunphung a um an ti. Cubantuk in Laimi kan holh zong ah hin Lai nunphung a rak um ve. Cucaah Laiholh in holh ve hna u sih.

Hngalhawk: hinhang Cazual, Vol. 2, No. 8 (February 6, 2011) Chin Baptist Church, Dallas, Texas nih rak chuahmi a si.

No comments:

Post a Comment

Na hmuhning a tangah rak ṭial khawh a si.
Kan ruahnak i cheu cio hna usih.