The Lady kong film ka zoh ve

Salai Lian Biak Hu
Kan hnu zarh April 28, 2012 ah khan kan umnak khua (Skien) ah The Lady kong baisakup an piah. Ka sayama nu (Ingunn, Kum 60) nih kan zoh te lai tiah January thla in a rak ka sawm cia cang. Kan zoh hlan ah online cung zoh khawh awk in an thlah mi kha ka rak hmuh ve i voi hnih cu ka zoh manh. Sihmanhselaw ka sayama nu he cun kan zoh ṭhiamṭham.

Film zoh ding in kaa thawh. A hmun ka phak cu minit 20 aa duh rih. Zanlei 18:00 in piah ding a si. Ka sayama nu zong cu a rak pha rih lo. Minit 5 ka hngah ah khin a rak phan colh ve. Cucu minit 15 aa duh ah kan i tong te lai tiah a rak ka timi caan bak a si. Nangmah lawng ma a ka ti. Keimah lanwg tiah ka hei leh ve.

Luhnak lethmat cu kanmah ca veve kan i cawk. Pakhat ah Kr. 100 a si. Kan luh hlan ah Daw Aung San Suu Kyi kong tlawmte kan i ruah. Atu lio parliament luh tik i biakam ding kong hi nang zeitin na ruah, NLD hi parliament an kai lai tiah na ruat ma tiah a ka hal i hitin ka leh. Cozah nih cun an bia an let bal lai lo, a hnu ah cun an lut lai i biakamnak ah phunghram cu kan kilven ko lai tiah bia an i kam te ko lai ka hei ti. A ruang cu parliament an luh lo cun cozah nih amah hmaklaknak ah a hman diam ko hna hnga.

Zung chung luh a hung za. A chung kan vung luh cu mi an rak tam ngai lai dara tiah aho hmanh an rak um lo. Kanmah pahnih lawng kan si. A ka timi cu Burma mi an tam ngai lai tiah ka ruah nain a ti. Kan khua pawng Porsgrunn zong ah an piah ve i cu ka ah an zoh i a si lai tiah ka hei ti. Online in an rak zoh cio cang mi kong chim kha ka philh diam. Online in ka zoh cangmi zong kha ka chim ve lo.

The Lady kong an thawk le cangka in kan biaruah cu a cat colh ve. Film zoh lio ah biaruah a duh lo i a si lai tiah bia ka ruah lem ve lo. Daidup le cawl lo in a um tikah upa kan ti cu a hngilh i a si ko lai tiah ka ruah pah. Nain ralkap nih meithal an puah ah khin a lau i a ik tawn. Siizung chung an tlik an lek lio, vawleitang bom an lamh ter lio tibantuk ah khin cun a mitthli le a hnap duk he a si ve. Cu ceo cun a zoh ko hi ta tiah siarem ngai in ka zoh ṭhan ve tawn.

Biathli vialte cu hitin nawlngeitu sinah
an pek tawn hna

Film a dih. Leng ah kan hung chuak. Zeitin dah na ruah tiah ka hei hal. Comment pek ding a ruah awk ka hngal lo, a tha ngai ko a ka ti. Nain ralkap kha kha tin ma an si ko tiah a ka ti. Aw, an si ko. 2007 lio zong kha tin an si ko tiah ka hei ti. Sitak! 2007 buainak ruang ah na rak chuak tak a si lo ma cu a hei ka ti. Film kong an thlak ning hi a taktak ma a si dih ko, movie lei art dah a tel pah tiah keimah tu bia a ka hal. Zakhat ah sawmriat hrawng sawmkua hrawng cu a taktak a si ko lai, a dang tu cu film a si caah art zong aa tel pah ko lai tiah ka ruah ka hei ti ve. Aung San Suu Kyi kong cu keimah nak in a thei deuh lai dah. Cuticun bia tlawmpal kan i ruah hnu ah kan i ṭhen i kan tin veve.

The Lady kong a dih tiang a zohmi hi kanmah pa hnih lawng kan si. A ruang tampi a um lai. Film a voi khatnak an piah ah hin man lo in piah an hmang. Cu lio ah an rak zoh dih cio i a si lai dah. Norway mi nih The Lady kong zoh dingah zei ṭhathnemnak dah an caah a um hnga, zeibantuk miaknak dah an hmuh hnga. Cu nakin a dang film ṭhaṭha zoh kha an duh deuh suaumau i a si lai dah, hibantuk Norway ram ah hin. Kawlram mi a zohmi kan um lo cu kan umnak khua ah innchungkhar 8 lawng kan um. Baisakup ka zoh bal tiah an chim ka theih mi an um bal lo. A hlei in The Lady kong cu online in kan rak zoh cio cang caah a si fawn lai. Cun manlo in online ah zoh cia mi Kr. 100 le caan pek in va zoh ding kha kan caah sullam ngei lo bantuk a si fawn. A hlei in The Lady kong hi zeitik an piah lai ti kan theih lomi ruang zong a si kho. Keimah zoh aa timmi zong sayama nu nih a ni caan chim hlah sehlaw ka theih ve lai lo.

Zeikhom va si seh kanmah he aa pehtlai mi kong ah cun kan duh lomi zong, kan zuam lomi zong kan herh lomi a si zong ah va i teltum hi mi khua le ram ah cun a rak biapi ngai. Mi pakhat ruang ah thangchiat ton hi a fawi te i mi pakhat ruangah thangṭhat ton zong hi a fawi te ve. Norway ram bantuk ah cun ṭhut dir zia hi kan i ralrin ngai a hau.