CNF; Laimi Hmai Kan Suang Thluahmah Ve Cang

CNF le Cozah voi 2nk biaruah hnatlaknak tonnak,
Hakha, May 7, 2012

Salai Lian Biak Hu

Kawlram chung ah tlangcung mi cu zeirello le kong ceih a si theng ballo. Cu lak hmanh ah cun Laimi kong cu chim le ceih a si bal lo. Nai hrawng cun hmunhma kan la thluahmah ve cang. Ramleng in ram rianṭuannak lei zong ah siseh, biaknak lei zong in siseh, a dangdang cawlcanghnak lei zong in hmunhma tete kan ting thluahmah ve cang. Sihmanhsehlaw a cheu nih cun hmunhma pek ding ah an i harh ngai rih. Pek lo awk a ṭhat lo ruang ah pek mi zong a um pah ṭheo.

Kawlram cozah nih hriamtlai pawl sin ah remnak a tuah cuahmah. Media pawl nih thawngpang lak in aho dah hmasa bik thawng a thanh kho ti an i zuam cuahmah. Aho nih dah mipi sin ah hmasabik thawngpang a phak ter khawh ti an i zuam. Cu lio ah CNF nih cozah he biaruahnak (January 5-6, 2012) an tuahmi cu ni hnih thum a rauh hnu, phu dang nih remnak an tuah hnu tu ah media in an thawng theih a si. A cheu cu cozah lei tu nih thawng an thanh hmasa. Cu nih a langhter mi cu an kan namneh ngaingai rih tinak a si.

Sihmanhsehlaw CNF zong hrial awk an rak ṭha ve ti lo. Cozah nih remnak a tuahmi kong ah CNF kong chim ve lo cun rawl dumnak ah cite a baumi bantuk a si cang. Nizan May 7, 2012 Hakha ah CNF le cozah lei in biaruahnak an ngei i hnatlaknak minsen an thut. A dih hlan hmanh in media nih cu e kha e tiah an zuan hnawh colh hna. Sihmanhsehlaw a cheu nih cun an hna an rak i chehter ve ṭhaim rih.

BBC, RFA, DVB tibantuk nih a tuanbik si ding in thawngthanh khawh an i zuam. (Culio ah Laimi nih ngeihmi media (Chinland Guardian, Khonumthung tbk) pawl cu thawng kan thanh kho rih lo. Kanmah kong ah cun hmasabik si khawh kan i zuam a herh ngai.) Sihmanhsehlaw VOA tu cu sahngar, cenghnia bantuk eichuak ṭuanzam a si ko. An herhnak tu ah cun heh lawh tiah CNF sin in ruahnak an hal len nain CNF kong thawngthanh ding tu ah cun an khul a nuar ngaingai. Kan hnulei zarh zarhte zan (May 5, 2012) VOA radio live biaruahnak ah Dr. Ngun Cung Lian cu upadi kong biaruah ding in Lairam ah phone an hei chawnh. Nain nizan CNF le cozah biaruah hnatlaknak minsen an thutmi kong ah cun thawng an thanh ti lo. Hibantuk hi tlangcungmi kan caah cun ṭihnung thil pakhat bantuk a si ve.

Anmah (VOA rianṭuantu) bantuk minung MP Phyo Min Thein (NLD party) cu VOA nih hmunhma an pek ngai. 2010 ah NLD nih thimnak lut lo ding in an rak um lio ah Phyo Min Thein cu party fate a dirh i haotu rian a ṭuan. Cu lio ah atu le tu VOA nih biaruahnak an hei tuah lengmang. A hnu ah cu party in a chuak hmasa bik a si ṭhan. Cu party nih cun 2010 ah MP hmunhma pakhat hmanh an hmu lo. Cutluk in hmunhma a ngei lo mi tu cu anmah bantuk minung a si caah atu le tu biaruahnak an hei tuah lengmang. Cubantuk lio ah acozah nih CNF sin ah kal riangmang in remnak biaruahnak a tuahmi, hitluk a nganmi thil, tu ah cun dai ziar in an um kho ko. Hi nih a langhter mi cu thleidannak timi a si.

Sihmanhsehlaw a rau lai lo. An dai peng kho lai lo. CNF kong an thanh ve lo ah cun rawldumnak ah cite a bau bantuk a si lai bantuk in VOA media cu a chambau ding khi a si ve hnga. Mual an pho lai cu an duh ve lai lo i a phung men tal in thaizing hrawng cun thawng an thanh ve te lai. Cucu Laimi hmai kan suang thluahmahnak cu a si.