Zeiruangah thongtla 651 an thlah ṭhan hna?

Salai Lian Biak Hu

Kyaw Tu nih Min Ko Naing thong chuahka
biaruah lio, Ht. EMG

Ramuktu president zangfahnak he pohma 401, dal 1 ning in thongtla 651 cu January 13, 2012 ah thlah an si. Cu an thlahmi hna lakah ramkong in thong a tlami upa zong an i tel ve. Tutan an thlahmi hna lakah 1988 siangngakchia hruaitu Min Ko Naing, Ko Ko Kyi tibantuk, cun tlangcungmi hruaitu pakhat zong a si i SNLD an haotu a simi Khun Htun Oo le a chungtuan Sai Nyunt Lwin tibantuk zong an chuah hna. Cuhna cu mipi lei in an i ruahchan ngai mi hna an si.

Sihmanhsehlaw zapi ruah theng lomi ralbawi hlun U Khin Nyunt zong chuah a si ve. Cun a fapa le a dangdang a rian ṭuanṭi cheukhat zong chuah an si. Cu thawngpang nih cun meida ah tlumlo lakin hmunhma an lak. Web, blog, Facebook, forum tibantuk nih hmunhma an lak dih.

US president Obama le ramdang pehtlaihnak palai Clinton zong nih Kawlrampi thil tuahmi cu kan cohlan tiah thawng an thanh colh. Cun US palai chiah in Kawlrampi cu pehtlaih hawikomhnak ka tuah cang lai tiah thawng a thanh colh ve.

Zeiruang ah dah nihin theng ah thongtla a thlah ṭhan colh hnga?

Kawlrampi a ṭhat khawh nakding ah tiah Kawlrampi cozah nih tlangcungmi hriamtlai hna cu remdaihnak tuah ding in chawnhbiaknak a tuah cuahmah lio a si. Tukum chungah CNF nih January 6 ah khan ramṭhen uktu hna he remdaihnak cu minsen an thut cang.

A hun changtu ah KNU nih ramṭhan uktu hna he remdaihnak cu January 11 ah khan an tuah colh ve. Cu thawngpang hna nih cun vawleipi cu a hnih dih. Atu lio vawleipi ah ramkhel hriamtlai bu kum 60 leng a dirmi nih remdaihnak minsen an thut cu vawlei mipi lung a hun leh ngai. Cu lio ah Kawlrampi cozah nih thongtla a hun chuah colh ṭhanmi cu ruahawk a um ngai.

Ruahnak pakhatnak: Cuti kum 60 leng hriamtlai in a ummi KNU nih minsen a thut lawmhnak ah atubantuk in thongtla an thlah hi a si hnga maw? A ruang cu kan hnu January 3 ah khan vokhat an thlah cang hna. Nihra lawng a rau rihmi a dang a hun thlah ṭhan mi hna hi KNU nih remdaihnak minsen an thut ruangah a si hnga maw?

Ruahnak pahnihnak: Atu bantuk in kum 60 leng hriam a tlaimi KNU nih minsen an thut tikah vawleipi cu a hnih colh. Cu thawngpang nih a chuahpi mi cu thawngpang ṭha tiah ruah lio ah thawngpang chia ah a chuak sual lai ti an phan caah a si hnga maw? Cu thawngpang cu vawlei mifim hna nih kherhhlai le ruahnak tampi chuah in thilṭhalo lei ah a leh sual lai tibantuk phan ruang ah thongtla an thlahṭhan mi hna a si hnga maw?

Ruahnak pathumnak: Kawlrampi cu ram ṭha lo a si tiah an ti tawnmi hi thlennak a um cang ko, ram ṭha si ding in a thleng cuahmah ko ti langhternak ah tuahmi a si hnga maw? US, EU tibantuk nih zumhlonak an ngeihmi hi kan zum hna seh ti an duh ruangah a si hnga maw? Ramdang sin in hmak lak duh ah tuahmi a si sual hnga maw? Ruahding dangdang zong a tam ngai.

Uknak thar a hun i thlen cangka president zangfahnak in thongtla an thlah hna hi a voi 4nak a si cang. Kum 2011 ah voi hnih le 2012 January ah voi hnih an si. Nikum May 17, 2011 le October 12, 2011 ah voi hnih le January 3, 2012 le January 13, 2012 ah voi hnih tiah voi li a thlah cang hna. Thongtla cu tampi a thlah ko hna nain ramkong ruangah thongtla a thlahmi an tlawm ruangah soiselnak zong a rak tam ngai.