Biahalnak tuah kan hau ko rua

Salai Lian Biak Hu

Hakha ah CNF le ramthen uktu hna biaruahnak ah
aa telmi upa hna. Ht. CG

Kum 2011 cu Kawlrampi caah thawngṭha bantuk a si. Ram hruaining aa thleng, uktu umtu ning aa thleng, mipi zeimawzat lung aa thleng, mipi zeimawzat umtu ning aa thleng. Thlennak kum bantuk a si. Daw Aung San Suu Kyi zong bochan ngai in dirhmun pek a si. Zeimawzat zong lam a kal cuahmah.

Thimnak an tuah, a dik a hman ti lo an kalpi phot. A duh mi zazat, a duhlomi zazat an si. Keh lei ah an um rua timi zong orhlei ah an rak dir bantuk in orhlei ah dir rua timi zong kehlei ah an rak um ve hoi. Thong chung ummi zong a thongthong in voi thum bakte an chuah hna nain a za ti a um hlei lo. A sualmi tu an tam ti a si hoi.

Chim awk tampi lakah Laimi ca zongah thlennak kar a hung hlang thluahmah ve. CNF nih UNFC hmang in a cawlcang thluahmah ve. Ramchung ah remdaihnak biaruah ding in aw-aan a um tikah CNF zong a hrial kho ve lo. A rannak in meting tuah a si colh. CNF umtu ning zong a thlen.
Kum cu a hung dih. Kumthar kan hun phan. Laimi kan caah thawngṭha maw thawngchia dik a hnih in aa hin mi a um. Cucu CNF/A kan ti lengmang mi cu ramchung ah remdaihnak tuah ding in minung 10 an hung lut. Luatnak kan hmu cang tibang lamka in mipi nih an rak orh hna. Cuvialte lakah cun Pastor, MP, Vunci, tbk upa hna zong nih an rak don hna. Lung a tho, tha a nuam, tih a um ti lo. Laimi umnak paoh ah cu kong lawngte ceihphai a si. A thei lo cu Laimi a si lo dara ti khawh awk in a um.

January 5-6, 2012 tiang biaruahnak le hnatlakmi minsenthutnak zong an ngei. Minsenthut hnu cun CNF zong ramchung ah zalongte in an um ve cang lai. Thantlang ah umhmun pakhat khuar in an i dor kho lai. Kan ram kilven dingah chaklei le thlanglei zongah umhmun khuar kho ding an saduhthah a si. Cu thawngpang cu a hnih in a hnin, mei tlang bang Laimi kan caah cun a puak mi thawngpang a si.

Sihmanhsehlaw Kawlrampi zoh in media hna nih cun cupkhap ti zong an ti lo. BBC, VOA tibantuk zong nih zeicukha an ti lo. Dai ziar in an um ko. Irrawaddy news hoi hna nih cun thazang a tlawmngaimi CNF tiah an hei ti mei ko.

Daw Aung San Suu Kyi nih NLD a nun khawh nakding ah a zuam len nain a tei lo. A thar in Party dirkhawhnak tu ka tuah lai a ti. Thimnak ah ka lut lai a ti tikah zeimawzat minung cu an paw a khuai hna tiah an ti. A ruang cu ramleng in politic a rak tuahtu hna bu tampi cu umhmun ngei lo ah an rak i chuah.

Cu le cangka in politic a tuahmi tampi nih tlangcungmi hna kha thazang ah an i hman colh hna. Kachin ral kong ah a rak i theih ter ballo mi zong a hmun tiang phak khawh an i zuam. An umnak hmun cio in Kawlrampi democracy caah cun tlangcungmi an biapi tuk hih tiah an au khuang cio hna.

Cuti an au khuan lio ko zongah cun CNF nih remdaihnak an tuahmi kong cu an hna an i cheh ter khawh ko. Hihi zeiruang ah dah a si hnga? Laimi hi miphun dang nih zeitin dah an kan hmuh? Zeidirhmun ah dah an kan chiah rih hnga? Kanmah le kanmah biahalnak hi tampi kan i tuah a hau rih ko rua lai?

(Hngalhawk: Lungchuak bia ṭialmi a si.)