Tay Za nih EU taza a cuai

Tay Za chungkhar: L-R, Tay Za, Htet Tay Za,
Rachel Tay Za, Pye Phyo Tay Za, Thidar Zaw

European Union (EU) nih chawlet chawhrawl dantat a si mi Pye Phyo Tay Za cu a pa Tay Za  nih London um sihni phu a hlan hna i EU nih dantatmi cazin in hnawhpiak ding ah EU cu taza a cuai hna. Pye Phyo Tay Za i a sihni hna cu D Anderson, M Lester le G Martin an si. Khatlei kam in a dirmi hna cu EU council lengah Britain, New Zealand le European Commission an si.

A voikhatnak i a chuapi mi bia cu May 29, 2009 ah EU biaceih zung General Court nih an cohlanpiak lo. A hal mi hna cu a tanglei bantuk in an si.

Dantatmi min cazin in phiat ding

Pye Phyo Tay Za he pehtlai in dantatnak phung le phai pawl hnawhpiak ding

Biaceihzung i a dihmi cu EU council nih liam dih ding

Sihmanhsehlaw lungdong loin July 27, 2009 ah a thar in nawlnak ca European Court of Justice ah a hun ṭial ṭhan. A nawlmi hna cu;

EU General Court nih cohlan lomi ca cu cohlanpiak ṭhan ding

Pye Phyo Tay Za he pehtlai in February 8, 2008 i EU dantatnak phungphai 194/2008 riakhiahmi hna cu kan hnawhpiak tiah thawngthanh piak ding

EU i European Court of Justice le General Court i biaceihzung a dihmi vialte EU council nih liam ding hna an si.

Biaceihbawi ruahnak petu nih a bia cu a cohlanpiak i November 29, 2011 ah ECJ sihni pakhat nih ECJ zung ah a chuahpi. ECJ sihni pa nih a cohlannak a ruang tampi lakah pakhat cu zeiruang ah dah atu bantuk in dantat a si timi langhtarnak ca a um lo tiah a ti.

Pye Phyo Tay Za cu kum 24 lawng a si rih. EU nih dantatmi min cazin ah an rak ṭial cu 2003 ah a si i kum 16 lawng a rak si. Atubatuk in dantat a simi Pye Phyo Tay Za cu EU ramchung ah khualtawnnak nawl le chaw lehthalnak nawl a ngei lo.

Ch: Khin Yadana FB