Ramdang tangka thlennak dawr an tuah

Yoma Bank, Ph. MMT

Kawlrampi ah cozah bank a si lomi nih tuchun October 1, 2011 Yangon khua Thein Phyu lam ah ramdang tangka thlennak dawr an hun. Ramdang tangka thlennak nawl a ngeimi bank hna cu Myawaddy Bank, Innwa Bank, Kanbawza Bank, CB Bank, Myanmar Industrial Development Bank le Myanmar East Bank hna an si. Hihi Kawlrampi ah a voikhatnak ramdang tangka thlennak dawr an hun a si.

Bank a dirnak a tlawm bik kum thum a si cangmi Bank ngan pipi hna cu atu bantuk in laisen (license) an chuahpiak mi hna a si. An thlenmi tangka hna cu USD, EURO, SGD (Singapore Dollar) le FEC hna an si. Tangka thlenzat cu vawleicung tangka thlenzat in thlen ding a si.

Nikhat ah voi hnih in zeizatdah thlenzat a si lai timi thawngthanh a si lai. Tuchun an hun le cangka in tangka thlenzat cu USD 1 ah Kyat 830 a si. Dollar 2000 tang cu hmatpungṭin (ID card) piah ahcun thlen khawh a si nain Dollar 2000 cung a si ahcun tette ngeihmi piah a hau. Sihmanhsehlaw ramdang tangka tawnghthamnak nawl a ngeimi, company, NGO tibantuk cu thlennak nawl an ngei ko tiah dawr hunnak i a kal ve mi pakhat nih a chim.

Tangka thlen USD-Kyat

Tuchun ah an thlen bikmi tangka cu FEC a si. Mipi nih FEC hi an kut cungah chiah an duh tuk lo tiah mi pakhat nih a chim. Atu bantuk tangka thlennak dawr an hun ruangah ramdang tangka a tawngtham mi hna nih an fuh hlei lai lo bantuk in a thlite in tangka a thleng mi hna zong an zor hlei lai lo tiah Dollar tangka a thlengmi pakhat nih a chim.

Ch: VOA