Party pa hnih azizut ding

Kan hnu July 26 ah khan Naypyidaw ah meeting kai ding in aa thawhmi party The 88 Generation Student Youth (88GSY) le The Union of Myanmar Federation of National Politics (UMFNP) cu lam man pek duh lo kong ah an buai. Cuti an buainak lampi cu Yangon-Mandalay lamthluanpi ah a si. Lam man latu nih lam man an hal hna tikah pek lo in an bia a tam.

Yangon-Mandalay lamthluanpi gate 3 ah lam man Ks. 5000 pek ding an duh lo ruangah an buai. U Aye Lwin nih cun Lamsernak zung upadi in man pek ding ti a si ko nain party lei minkhumhnak upadi in ngunkhuai luatnak nawl a um ve ko tiah a ti.

Ramkong i party pawl hna cu party dirhnak nawl upadi no. 6 ah phunghrampi, kan rian thil pathum, phunglam humhipnak le daihnak timi pawl zulh le kilven ding an si. Cu a si caah Kawlrampi thimnak committee nih party minpeknak upadi he aa tlak in biaceihzung bia chah ning in tlangtlak i azizut an si ko lai tiah bia an chuah.

Ch: Venus News

Zalong tein web blog zoh khawh si cang

Kawlrampi chungah web tampi zoh kho loin rak phih tawn a simi cu nai hrawng in zoh kho ding in an tuah ṭhan. Irrawaddy, Mizzima tibantuk ram chungah zoh kho lo ding in rak phih tawnmi cu fawite in zoh khawh a si cang. 

A hlan ah cun Kawlrampi thawngpang ramleng in an rak ṭial tawnnak web hna cu zoh kho lo ding in rak phih an si. On khawhnak ding ah proxy hmang in rak on tawn a si. Cun blog tampi zong zoh kho lo ding in an rak phih. Sihmanhsehlaw atu ah cun fawite in blog zong on khawh a si cang tiah ramchung in blog a zohmi hna nih an chim.

Media lei rianṭuan cheukhat nih cun atu bantuk web an on mi cu thil ṭha a si ko. Sihmanhsehlaw hihi Kawlrampi nih media lei zalonnak a pek kan ti kho lo. A ruang cu web kong cu chunzan in phih khawh colh a si. Atu an on i thaizing ah an phih khawh ṭhan mi a si. Media zalonnak an tuah ding a si ahcun ramchung media lei zalonak biatak tein an pek ding tu a si tiah an ti.

Laimi tampi zong nih blogspot hmang in ca tampi an tar ve. Cu hna cu ramchung ah rak rel kho lo in an ummi zong atu ah cun fawite in an rel khawh ve cang lai. Thawngṭha tampi zong web cung in an rak zoh khawh lai lawng siloin ramchung le vawleicung thawng Laica tein ṭialmi thawngpang fawi tein an rak rel khawh ve cang lai.

Ch: VOA

President Thein Sein nih ralzaam tlunnak nawl a pek

1988 hnu a phunphun ruangah Kawlrampi in a zaam mi ralzaam hna cu ram chungah kirnak nawl pek an si tiah tuchun Naypyidaw i meeting an tuahnak ah president Thein Sein nih a chim. Kawlrampi chawlet chawhrawl bu hna le zatlang bu hna he tuchun Naypyidaw ton biaruahnak an ngeih nakah atu bantuk in a chim cu a si.

Rampi chawva lei ṭhanchonak caah a phunphun ruang in ramleng a chuak mi hna cu ram chungah luh ṭhan khawhnak nawl pek an si. Sualnak a ngeimi hna ca zongah ruahpiak an si lai tiah a ti.

Sihmanhsehlaw ramleng um dothlannak a tuah mi nih cun ramchung ah zeitluk in dah zalonnak a um ti zoh hmasa a hau. Atu bantuk ram leng a chuak mi hna luhnak nawl a pek mi kan zumh khawh nakding ahcun ramkong ruangah thong a tla mi hna an thlah dih hna hmasa a hau tiah an ti. Cun ram chungah zalong tein ramkong ceihmai tuahnak nawl a um hmasa a hau tiah an ti fawn.

Kawlrampi nih a biaphuannak ah a hman mi hna New Light of Myanmar le the Mirror thawngthanh ca i nitin an ṭial chih pengmi BBC le VOA ral tukforh, RFA le DVB miforhtu tiah an ṭial tawnmi ca zong nizan thawk cun an ṭial ti lo.

Ch: VOA

Kawl Cozah Dirhmun le A Ruahning (Policy) le Laimi

Sang Awr

Biahmaithi: Biaknak lei rianṭuanmi ka si nain kan cozah nih ram an kan hruaining ka zoh tikah ka purh khawh tawk ka hmuhning ṭial ka duh. Laimi dirhmun in cuanh ka duh fawn. Biaknak lei Vuanci nih kum khat ah voihnih tluk Kawlram chung biaknak lei rianṭuantu upa he tonnak an tuah tawn i MBC President dirhmun in kaa tel ve ṭheo. Khrihfa lawng si loin Muslim le Hindu zong an i tel. Kanmah duhmi chimnak nakin anmah nih zul hna seh ti an kan duhmi kha an kan chimh tawn. A donghnak ah nan duhmi kan chim ve uh an ti i biaknak ah luatnak a um lonak, biaknak lei inn sak a harnak, zalong tein i pumh khawh lonak, thawngṭha chimtu harnak an tonning hna kan chim tik hna ah “Ṭha tein kan in zohpiak hna lai” an ti nain a taktak ah cun kan duhnak an tuah bal lo. Biaknak lei vuanci cu ralbawi General a si ve caah ralkap kalning in a kan hruai ko. Hi bantuk ka hmuhtonmi tete le nihin cozah an dirhmun le cozah nih thil an ruahning le Laimi dirhmun kha ka hmuhning ka hun ṭial lai.

Khuaruahhar thiltuah, mawtaw mawngh le mit