Salai Tin Maung Oo tuanbia tawi

Salai Tin Maung oo cu Pu Mya Din fapa a si i Rakhine ram ah a chuak mi Lai siangngakchia pakhat a si. A ngakchiat te in Yagon ah a ummi a si.

Sianghleirun a kai lio ah ramkong ah a rak i tel lengmang ve mi a si. 1965 a voi 5nk Asia nichuah thlanglei zanglek zuamnak ah biatak tein a rak i tel ve. 1972 siangngakchia cawlcanghnak ah biatak tein a rak i tel. Cu cawlcanghnak ah cun tlaih a rak tong i Insein thong ah an rak thlak. 1974 Burma Socialist Party phunghram fehter ni January 3 ah an rak thlah. 1974, Chin Literature and Culture Committee ah chungtuan an rak thim. Hi lio caan ah hin biatak tein Laimi hna kan i funtom khawh nakhnga caah tiah pa pawl min hmai ah Salai le nu min hmai ah Mai timi min bunh ding in a rak tang i a rak dirpi mi a si.

1974 U Thant ruak kong buainak ah biatak tein ralkap a rak doh tu a si ve. Hi buainak ah tlaih luat ding in Thailand ram ah siangngakchia 5 he an rak zam. Cu an zamnak ah hriam tlai siloin ramtang dohdalnak in an rak tang.

1975 in ramchung ah a rak lut than i June 6 Shwedagone siangngakchia buainak kong ah hruaitu pakhat a si. Ralkap cozah nih June 10 ah a buai mi paoh cu tlaih an rak i si i dan fakpi in an rak pek hna. Salai Tin Maung Oo bal cu a rak luat kho. Asinain Salai Tin Maung Oo cu 1976, March 23 ah tuah ding mi Hmaing kumza tlinnak tuah an timh ruangah June 19 ah an rak tlaih. Cu an tlaih lio ah cun puantar catial viate, awtaw thantar vialte chuh dih an rak si.

Cu Hmaing kumza tlinnak puai lai ah cun a pa Pu Mya Din le a upa Hla Shwe zong tlaih an rak si. A pa le a upa an tlaih dih hna hnu ah a nau nu tangkua a kai lio mi Mai Poe Poe Tin @ Ma HLa Myaing cu biatak tein a rak i tel caah tlaih a rak tong ve.

Salai Tin Maung Oo cu Insein thong amuihnak nambar 1 ah an rak chiah. Thong chung vampang ah Baibal ca a rak tial hna. Cun vampang hmun pakhat ah ka u le ka farnu kan thangthat tuk hna tiah ca a tial tak.

1976 June 25 ah a pa he tonnak nawl an pek hna. Cu zan thawk cun a pa, a u le a farnu cu Taungngu ah thong an thial hna. Siangngakchia hna cu bia an ceih hna i thah ding in bia chah an si. Salai Tin Maung Oo cu na bia na let a si ah cun biachahnak kan thumh lai tiah an ti nain "Ralkap uknak tang ah cun ka khup ka bil lai lo" tiah a ti hna. Ralkap cozah nih cun June 26, 1976 ah chun lai Insein thong ah hri thlai in an thah.

"Ka kawi le hna, mipi theihter lo in kei cu a thlithup in thah ka si" tiah a au thawng cu khat lei vampang a ummi hna nih theih dih a si. Cuticun Salai Tin Maung Oo cu a nunnak liam.

Ch: Minthu (Mizzima)

Relchihawk: Mirang, Kawl, Tinmaungoo blog, A dangdang

Brazilian ngakchia te laam

Hi ngakchia te nih hin atu ah hi tluk a laam khawh a si ahcun a upat tikah zeitluk in dah a va thiam te hnga. Amah te a ruahnak maw a si hnga a nulepa bawmhnak a tel hnga maw? Ngakchia zohkhenh ning zong hi ngakchia te a laam mi nih hin khuaruahnak tampi a kan ngeih ter lai dah.

"Hringtu Pa Ni" Thawhkehning Tuanbia Tawi

Rev. Dr. Jones Mang Hup

Hringtu Pa Ni cu fale nih pale upatnak an pek ni a si. America le Canada ram ah mi tampi nih an pale an upatnak hna le an cungah an i lawmhnak langhternak caah Hringtu Pa Ni ah an pale laksawng an pek hna. Hringtu Pa Ni cu June zarh thumnak ah a si. Pa (father) ti tikah hringtu pa lawng a si lo. Ram pakhatkhat nih pa bantukin an ruahmi, miphun nih pa bantukin an ruahmi, khuami nih pa bantukin an ruahmi an si i thiam hngalhnak lei in pa bantuk in ruahmi zong a si.

America Washington peng Spokane khua mi John Bruce Dodd nupi nih 1910 ah Hringtu Pa Ni cu a rak thawk. Sonora Smart Dodd nih Hringtu Nu ni i phungchimmi a ngaihnak in hringtu pa ni tuah duhnak lungthawhnak nganpi a ngei. A nu nih a thih tak hna hnu ah a pa Henry Jackson Smart nih a cawmkennak hna cungah lawmhnak a ngei i a pa cu zeitluk in dah a ral a that i a nun a sersiamtu le a pa i nunraithawinak a ngeih kha hi Ni sunglawi ahhin langhter a duh. A pa hi June thla chuakmi a si caah June thla hi upat peknak ni ah aa thim. Cuticun June 19, 1910 ni ah a hmasabik Hringtu Pa Ni cu Spokane khua ah a tuahpi hna. Cu hnu in hringtu pale upat ni cu America ah a karh. America President Calvin Coolidge nih June zarh thumnak zarhpi ni cu Hringtu Pa Ni ah a thanh i President Nixon nih 1972 kum ah miphun nih a zungzal in upat peknak ni, ni sunglawi ah a fehter chin. Pale a nung rihmi caah Rose pangpar sen le pale a thi cangmi hna caah Rose pangpar rang kha laksawng pek an si.

1936 ah miphun hringtu pa ni (National Father’s Day) komiti an ser i headquarters cu New York khua ah a si. Rammi nih hringtu pa khan in an bochanmi le an zohmi kum fate in an thim. Kum fate in pa ah an thimmi cu kum khat chung rammi pa (father of the year) an ti. Douglas Mac Arthur, Ralp J. Bunche, Dwight D. Eisenhower le Harry S. Truman hi kumkhat chung khuami pa (father of the year) ah cun an rak thim hna.

Samuel Adams hi America Hringtu pa (father of America) ah an rak chiah. Amah cu American Luatnak si khawhnak ah a rak cawlcang ngai i ram daw bik pakhat a si. Phunghrampi upadi a hringtu pa (father of Constitution) ah James Madison a si. Damnak sii lei cawnnak i a min a thangbik ah Hippocrates a si i cucaah amah cu Sii lei cawnnak a hringtu pa (father of medicine) an ti. Amah hi hlanlio pi Greek sibawi minthang bik a si.

Roman Catholic le Anglican khrihfabu nih an tlangbawite cu hringtu pa (father) an ti hna. Baibal nih Abraham cu zumh awktlak mi hringtu pa (father of faithful) a si a ti.
(Baibal rel awk: Gen. 17:4; Ex. 20:12; Deut. 5:16; Matt. 5:16,45; 15:4; Mk. 7:10; Johan 10:30; 15:16)

Eurovision Song Contest 2010 pakhatnak Hmumi Lena hla

Eurovision Song Contest 2010 pakhatnak Lena

Eurovision Song Contest 2010 zuamnak cu Germany ram in Lena Meyer-Landrut nih pakhatnak a hmuh. Pakhatnak a hmuhnak hla cu Satellite timi a si. Lena cu May 23, 1991 chuak (Kum 18) a si. A chuahnak cu Hanover khua Germany ram a si.

Lena hi Germany ram hlasa pakhat a si ve. Hi zuamnak i pakhatnak a hmuh hlan zong ah Europe ram chung pakhat hlasa zuar bik 100 chung ah 8nk a rak si. Atu ah cun Satellite a hla in pakhatnak ah a phan. Nikum 2009 i Eurovision Song Contest pakhatnak a hmumi hla Fairytale by Alexander Rybak cu pathumnak ah a si.

Lena hi a ngakchiat lio te zong ah laam lei hi a rak zuam ngaimi a si. Hmasabik ah Ballet in a rak i thawk i atu ah cun Jazz, Hip-hop tibantuk zong a lam ngai.

Eurovision Song Contest cu kan hnu lei 25, 27 le 29 May. 2010 ah khan tlamtling tein Norway ram Oslo khua Telenor Arena hmun ah an tuah. Ram 39 in hi hlasak zuamnak cu an i tel. First Semifinal May 25, Second Semifinal May 27 le Final cu May 29, 2010 ah an i zuam.

Mah le ram cio in hmak rak pek a si. Final ah cun ram 25 nih an i zuam. Pakhatnak a hmumi Germany in Lena nih hmak 246, pahnihnak Turkey in maNga nih 170 le pathumnak Romania in Paula Seling & Ovi nih hmak 162 hna an hmuh.

Eurovision Song Contest cu pakhatnak a hmumi ram ah tuah lengmang a si. Nikum 2009 cu Norway mi nih a hmuh caah 2010 cu Norway ram ah an tuah i hmaikum cu Germany ram ah an tuah te lai.

Eurovision Song Contest cu Lugano khua Switzerland ram 1956 ah an rak thawk. Atu hi a voi 55nk a si. (Ch: Eurovision)

2009-2010 Lairam Tanghra Awng

Kan hnulei June 13, 2010 ah khan Kawlram pumpi sianghleirun luhkhawhnak camipuai (tanghra camipuai) sungh awn cazin a chuak. Lairam zong in minung 8706 nih an phit ve i minung 1426 an awng. Zatuak in cun 16.38% a si.

Lairam cu district pahnih a um i chaklei Lairam le thlanglei Lairam tiah then a si. Thlanglei Lairam cu Mindat District tiah pennak pek a si i chaklei Lairam cu Falam District tiah pennak pek a si ve. Chaklei Lairam ah cun Tonzang, Cikha, Tiddim, Thantlang, Falam, Rihkhuadar, Hakha an i tel. Thlanglei Lairam cu Kanpatlat, Palatwa, Matupi, Razua, Mindat hna an si.

Tukum 2010 camipuai awng cazin zoh tikah thlanglei Lairam nakin chaklei Lairam awng an tam deuh. Falam hi sianginn fimcawnnak lei ahcun bochan ngaimi a si nain tukum distinction a hmumi ahcun Hakha an tam deuh. Nain 5D hi Falam in Pakhat nih a hmuh. Hakha in cun 4D tiang lawng an hmuh.

Atubantuk camipuai theipar zoh tikah Lairam cu kan thazang a der ngai rih ko ti a lang. Zakhat ah 16% lawng kan awn tikah hnarcheu cu chim lo cheuli cheukhat hmanh kan phan rih lo. Kan i zuam ngai a hau rih ti a lang ngai. Tulio Lairam fimcawnnak lutlai cu U Myint Soe a si. Lairam chung in sianghleirun luhkhawhnak camipuai phi zat le awng zat hna cu a tanglei bantuk in a si.

No. Khua, Phi, Awng, Zatuak, Distinction

01. Kanpatlat 368, 74, 20.11%, 1D 7, 2D 1

02. Palatwa 1326, 104, 7.84%, 1D 2

03. Matupi 1337, 135, 10.10%, 1D 1, 2D 1

04. Razua 221, 22, 9.95%

05. Mindat 778, 151, 19.41%, 1D 13

06. Tonzang 150, 36, 24.00%, 1D 3

07. Cikha 174, 22, 12.64%

08. Tiddim 1161, 258, 22.22%, 1D 20, 2D 1, 3D 1

09. Thantlang 591, 122, 20.64%, 1D 4

10. Falam 871, 207, 23.77%, 1D 10, 2D 1, 3D 4, 5D 1

11. Rihkhuadar 79, 12, 15.19%, 1D 1

12. Hakha 1650, 283, 17.15%, 1D 22, 2D 3, 3D 5, 4D 1

DIHLAK 8706, 1426, 16.38%, 1D 83, 2D 7, 3D 10, 4D 1, 5D 1

Atang hmanthlak ah hin tling tein hmuh khawh a si.

American Flag kong

America nih British sin in luatnak a hmuh cu July 4, 1776 ah a si. Ram pakhat a si bantuk in flag zong ngeih a herh. Cutikah an rak hmanmi flag cu Grand Union Flag timi a rak si. Cucu phungning (Official) a si lo. An flag cu an hun thlenchun lengmang. A hnu ah cun July 4 ah hin flag hi thlen siseh tiah bia an feh ter. American flag cu voi 40 thlen a si. Atu an hmanmi hi a voi 40nk an fehter mi a si.

American Flag zong nih sullam a ngei. A umtu ning cu tlang rinphei rong a sen le a rang 13, a dum rong chung ah arfi ki nga ngei 50 an um. Arfi 50 sullam cu state 50 a chimduh mi a si. Cun a dum mi chung ah arfi an umnak sullam cu pumkhat (union) kan si tinak a si. Rinphei 13 cu hmsabik colonies hleithum kha a chimduh mi a si. Colonies hleithum cu Britist monarchy a rak doh tu hmasabik state 13 hna kha an si. Flag zong hi mindin a ngei ve. Cucu Old Glory tiah an ti.

Alaska cu state 49nk 1959 ah a hung si arfi 49 benh a si nain i a rauh hlan ah Hawaii zong 1959 ah state pakhat ah cohlan a hung si ve. Cu caah 1960 ah a hnu bik flag an thlen i arfi 50 benh a si. Atu tiang cu flag cu an hman caah caan saubik hmanmi flag ti zong an ti.

Cuticun American Flag cu a thleng lengmang i a voi 51nk flag hi zeitin kan tuah lai timi zong an ruahchung mi a um. Atu tiang ah cun a hlan bang in arfi pakhat chap in benh mi le a pum in arfi tuahmi tiah phun hnih in an ruahnak an chuah chung. Zaidah an hman te lai ti cu 51nk state a hung um tikah biakhiah a si te lai.

A tawinak in an tuahmi video rak zoh ve u.

World Cup an thawk cang

Kan hnu lei June 11, 2010 cun vawleicung pumpululh chuah ah minthang bik a si mi World Cup cu an thawk cang. Kum 4 ah voikhat tuahmi a si. Atu hi a voi 19nk an tuah a si. Thlanglei Africa ah an tuah. Ram 32 an i zuam lai i a donghnak an chuih ni cu July 11, 2010 ah a si te lai. Hi kong he pehtlai in tling tein theih na duh ahcun "World Cup" hi hmet law an chuihnak hmun le caan, zei ram le zei ram dah an chuih, ahodah a tei timi tling tein a tial mi na hmuh lai.