Ram hla, Ṭial Tin Tlem sakmi cheu khat

Lai hla tampi lak ah ram hla hi album tampi an chuah theng lo. An chuahmi lak ah ka duh ngaimi Tlemtlem sak mi ram hla hi an si. Cu lak ah a cheu cu audio youtube ah chiah in ngaih khawh an si. Hla hlun an si caah a aw le music hi duh ning in a thiang kho ti lo. Sihmanhsehlaw a rak ngai balmi caah cun kha lio caan te kha ngaih a hun um ngai ṭhan tawn.

Album chung hla tampi lak ah cheukhat hna cu-
Ka ngai ee kan semnak

Dawtnak par dawh par seh

Khuadei deng cang

Kan ṭuan cio lai

Hmun seh kan biathli

Hi hna hi an si. Ngaih na duh ve ahcun hla min (link) kha rak hmet law ngaih khawh an si.

Norway ram biakinn muisam dawh lo bik

Norway cu Khrihfa ram an ti bantuk in biakinn hi khua cio nih an ngeih hna. Kum za in a rau cangmi biakinn zong an um bantuk in a thar an sak mi zong an um len ve.

Nikum 2019 ah biakinn thar Porsgrunn khua ah an sak. Chanthar mit in kan sak tiah biakinn satu hna nih cun an ti. Kum a dongh in Norway ram chung biakinn muisam a dawh lo bik timi an thim.

Kan hnu zarh ah khan thimnak an tuah. Thimfung thong sarih leng nih an thim i 972 in Østre Porsgrunn kirke cu muisam dawh lo bik a si tiah TA nih a ṭial.

Norway le Zuu

Voi khat cu muiṭawn suai thiam APK cartoonist ka rak ton. Minthang ti cu ca pakhat te in ka ṭial piak ve tiah ka cauk ka rak pek. A ka zoh i khoika mi dah na si a ka ti. Laimi ka si ka ti. Cu le cangka in a cafung cu zukzek zukzek tiah catlap cungah cun a hun rin thluahmah. Mitṭhep karte ah a lim i a ka pek. Ka lawm ka ti i a ka pekmi cu ka vun zoh. Ka hmuhmi cu mipa pakhat sawng ngai in zuu palang aa tlaih i «ka ri rih lo» a ti lio a si.

Norway ka phak ka kan umnak khua i a ummi Skien Baptistkirke kum 150 tlinnak puai caah hla kan rak cawng. Kan hnu ngai cang, mawṭaw ka mawngh lo caah taxi va hlan law rak ṭin chung an ka ti. Taxi hlannak ka va phak cu artlang in taxi cu mitampi nih an rak hngah ko. Taxi a phan chom in minung cu an kal duhnak ah a mawngh colh lengmang ko nain suimilam cheu tluk ka hngah hnu lawng ah taxi ka cit kho ve. Ziah mahtluk cun minung kan tam hnga tiah khua ka cuan, khua tampi a ka ruah ter. A ruang cu zarhte zan a si, rianṭuan dinh caan, thaizing rianṭuan awk um lo in hnupi tiang ih khawh a si caah a si. Ziah anmah le an mawṭaw an rak i mawngh ko hnga lo?

Vinmonopolet, Skien

Guitar hi Laiholh in zei kan ti?

Guitar hi “Tingtang” ma a si “Ṭingṭang” timi facebook ah thimnak ka tuah. Cucu 82% nih “Tingtang” an ti i 18% nih “Ṭingṭang” tiah an ti. Cu hnu ah zeidah kan hman deuh awk a si tiah thimnak ka tuah ṭhan i 64% nih “Tingtang” an ti i 36% nih “Ṭingṭang” tiah an ti.

Hi thimnak tuahmi hi a hman i hman ding tinak a si lo. “Tingtang” ti le “Ṭingṭang” tiah a hmangmi kan rak um ti tu kha i theih piak cio ding a si. Dotla in Lai ca cawnnak Australia ah khin pakhat thim ding va si sehlaw zeidah a hman hnga?

Guitar hi Tingtang he aa khat ko ma ti ah cun Guitar hi Tingtang zong a si lo i Tingtang zong hi Guitar a si ve lo. Asinain ringawn tummi an sinak le mah le nunphung hoih in hmanmi an rak si caah a fawi nakin Guitar cu Tingtang tiah a min pek a si. Cubantuk cu dictionary ah Guitar cu Tingtang tiah a fawi nakin an hei leh ve mi hmuh khawh a si.

“Ṭingṭang” hi a dik. “Ṭing” tiah a ringmi aw ruangah “Ṭingṭang” tiah kan ti a timi zong an um. Aw ah hin a ring mi aw le thli aw tiah phun hnih a um ko i thli aw zong hi min ah cun hman khawh an si ko. Biadangpi, min kong ah “Sui” ti a si ahcun “Nu” a si lai ti awk a ṭha lo. “Pa” zong a rak si kho.

“Ṭ” tawdeh a rak har caah “Tingtang” tiah ṭial a rak tam i a si timi zong an um fawn. “Ṭ” tawdeh har ruangah cun si dawh tuk cu a si lo. “Ṭ” tawdeh ruangah kan ti ahcun a dang kan ngeih mi Ṭhingṭhang, Ṭhengṭhunh le Ṭolhṭeng te hna zong hi “T” aw in chuah ve dawh an si hna hnga.

“Ṭ” tawdeh a rak har lio kan Baibal, “Lai Baibal Thiang” zongah “Tingtang” tiah rak ṭial a si i a dang “Ṭ” aw hmannak zongah “Ṭ” tiah a tang an rak deh ko hna. Cun “Ṭ” a tang deh in ca ṭial khawh a si hnu Lai carel cawnnak cauk CACC chuahmi zongah “Tingtang” tiah “T” a tang deh lo in ṭial a si ṭhiamṭhiam ko.

Lai ca kong a si caah Lai ca ṭial tik le hla sak tikah pakhat hmanmi i hrawm ah a ṭha deuh hnga maw? Baibal ah an rak hman cangmi, Dictionary le Lai carel cawnnak zongah hman cuahmah mi “Tingtang” hi kan i hrawm cio kho hna lai maw?

Tulio kannih WC

Rawldawr ah rian a ṭuanmi mawfa hna hitin bia an i ruah.

Nu Sui: Ka maw, nai hrawng cu facebook ah WC kong lawngte an ṭial ko. WC hi zeidah a si?

Parku: WC cu zunput khi an chim duhnak a si ko hen cu.

Nu Sui: Si lai lo! France 4 - 2 Croatia ti te hna a um cuh!

Parku: Khi ma na fian lo. Ramdang ah cun zunput te hna khi an zoh tuk. Khuazei zunput dah a thiangbik ti an i zuammi si. France nih arfi 4 a hmuh i Croatia nih arfi 2 a hmuh ti an duhnak a si ko hen cu. 😉😜

Kawl tlawng bia le tipil bia

Tuchan cu Lairam in Kawl rawn tlawn nakin ram dang in Kawlrawn tlawn chan kan hun phan cang.

Voikhat cu ramdang in Kawlrawn a tlawng mi hna Pa Thang le Pa Thawng kha an hawi Pa Lian nih hitin bia a rak hal hna.

Pa Lian: Kawl pawl nih "Mingalaba" an timi khi zeidah a sullam a si? Dictionary zong ka zoh len ko nain ka hmu lo, ka fiang bak lo ee.

Pa Thang: Cu ma na theih lo! "Mingalaba" an ti caan khi na thei ko lo ma? An van i ton hmasa bik caan, mi an donnak tibantuk ah a si lai khih! An chim duhnak cu "Nang na ra kho", " Nang ra ve", "Na ra kho" tinak dakaw a si ko cu.

Pa Thawng: Ka dua le, tuanbia thiam Dr. Than Htun nih a chimmi kha nan thei lo ma? Hruh lonak ding ah tuanbia ka cawng a ti kha. A timi cu Kawlmi cu India in a ra mi kan si ti si. India miphun si kha Kawl pawl nih an huat tuk. Nain phunṭanh pawl nih anmah le anmah i philh lonak ah an chimmi khi dakaw a si ko cu. A sullam taktak cu "Nang cu Kala" ti khi dakaw a si cuh! 😂😂😂

Stephen Has A Drink For Trump... Or Tries To

Khua tampi a ka ruah ter. Kawlram ah hi bantuk hi siseh law an tlaih colh hna lai timi ruahnak khi a ra colh. An va tlai tak hnga ma dik. Hibantuk zong hi Kawlram ah a um ve hnga ma?

Soi, nawlcawn ti zong ah ning le cang te a um. Kawlram lei mi soi ning le nitlak lei soi ningcang zong. Zeibantuk a si hmanh ah upat hmaizah hi hmai a sa ṭhiamṭhiam.

Sung Tin Par album thar le Country hla

Sung Tin Par cu a luan cia October thla zarh dongh ah khan album thar a chuah ṭhan. Album min ah Lu-Ya-Suu ti a si. Amah bal a dih lakin copy hla lawngte an si. Hmai kum lei ah copy a si lomi hla zong chuah khawh dingin timh tuahnak ka ngei tiah a ti.

Album thar a chuahmi hi ka lung tling bak tiah a ti tiah Mi Mi Win Phay nih a chim. A hla ngaih tikah zeidang nakin a hla bia ah hin siseh law a dawh.

A tonmi kong kha hla phantu sinah chim in a duhmi hla pawl kha a bia bunh ter hna sehlaw cucu a lo. Thlanglamh namneh a ton mi kong, lungzur ngaihchia in a rak um ve ning te hna, zei a si hmah ah chim lo dai tein um lawlaw ning zeihmah hi na theih dih a herh theng lo tiin a luan ciami kong chim a duh ti lo nak te hna a tel.

Kawlram rock hla sa ah cun hrelh awk a ṭha lo timi Sung Tin Par zong cu Laimi ciammam country hla he cun a rak i ṭhen kho hrim ve lo. A tanglei ah a hla fungkhat ka rak thil chih, original he.

Mama, va sa du

Sungsung (Kum 5) le a nu cu Norway in Lairam ah chikhat an va tlawng ta. Sungsung nu a maw Chinchin nih rawl hrawn a kawh hna. Rawl an ei pah in hitin bia an i ruah.

Chinchin: Na fanu hi Laiholh a thiam ve ma?

Sungsung nu: Ei ka dua, a holh hrim a holh duh lo. Norway holh lawngte bak in a kan chawnh.

Sungsung: Mama, va sa du.

Chinchin: Va sa ma a duh? Ziah na fanu cu Laiholh a thiam tuk ko tung. A holh a pei lawng pei a si ko hi!

Theih awk: “Va sa du” ti cu Norway holh “Hva sa du” ti a si. A sullam cu “Zei dah na chim” tinak a si.

21st Panglong le Lairam Dawh hla

Nihin ni ah Kawlrampi cu kahdaihnak le ram daihnak caah biaruah cuahmah lio a si. A rauh hlan ah 21^st Panglong timi biaruahnak zong ngeih a si cang lai. 21^st Panglong ti duhnak cu 1947 i mirang sin in luatnak hmuhnak dingah Chin, Kachin le Shan kha General Aung San nih luatnak hmunkhat ah laṭi ding in a rak sawm hna. Luatnak cu hmunkhat ah laṭi ding in lungtlinnak Panglong ah minsen an rak thut mi a si.

Sihmanhsehlaw luatnak kan hmuh hnu ah tlangcungmi hna nih duhdim nunnak kan rak hmu ti lo. A rauh hlan ah ral a tho colh ṭhan. Cucu ralkap nih caan ṭha la in uknak an rak lak. 2010 hnu lawng in democracy timi uknak ah an hun thlen. Sinain tlangcungmi caah zeipipa a si hlei rih lo.

Forgiveness copy le original

Tu lio Kawlram ah a buai ngai mi thil pakhat!

Bia kaa khat nih vanni kuai

Salai Lian Biak Hu

Bia kaa khat nih vanni kuai ti cu bia ṭha kaa khat chimmi nih thluachuah vanni tampi a kuaih anti duhnak a si. Phungthluk, CACC, 2007.

Lai phungthluk CACC nih a khawmhsuat i an ṭialmi ah cun bia ṭha kaa khat nih thluachuah vanni hmuhnak a ṭhatnak lei lak in ṭialmi a si. Sihmanhsehlaw hi capar ah cun a ṭha he a chia he a va sawhkalh mi tu ṭial hnawh chan a si.

Nihin ah cun Laimi zong nih mah le sining tawk in ca ṭial cio a si cang. Thawngpang ca, Journal, makazin tibantuk chuah cio a si. Online ca ṭial ko a fawi i a tambik zong a si men lai. Cu tikah kan Laica le holh zong rel awk ṭha le ṭha lo, ngaih awk ṭha le ṭha lo ti in a lang thluahmah ve. Caṭial thiam deuh le cafang, holh rum deuh a ngeimi hna caṭial le holh cu rel le ngaih a nuam deuh suaumau. Sinain cheukhat sin ah cun ṭial duhmi le ṭialmi, chim duhmi le chimmi sullam aa dangmi tete zong an um. Cubantuk ṭhiamṭhiam in caṭial a thimmi hna nih cun a palh bantuk in ṭial hramhram a hmangmi zong an rak um ve. Sihmanhsehlaw atu lio Lai caṭial relmi ah cun cubantuk bal cu hmuh a har ngai, tam u cu ṭial palh bia tu an rak si deuh. Atang lei langhter mi pathum hi zohchun hmanh hna u sih.

Kan in dawn

A ram a chuahtaknak a sau cangmi pa Lian cu an khua tlun a tim. Khuami hna nih a tlung lai ti an theih cangka sunglawi ngai in don an timh. Cu kong cu pa Lian kha an theih ter lo.

Pa Lian cu  a rak tlung taktak. An khua phak lai ah cun a ke in a kal. Khuami hna nih cun khua luh lai hau ka in an rak hngah. A lang in khuami hna le puanzar in ca an ṭialmi a hmuh cangka a ṭhu i a ṭap colh. Khuami hna nih cun pa Lian cu ziah a phak cang lo tiah a ti len. Khuami hna nih rak lut cang seh an in ti tiah van chimh ding ah mi pakhat an hei thlah.

An thlahmi pa nih cun Pa Lian cu a va chimh. Pa Lian nih a rak leh mi cu ka ram le ka khua ka ngai tiah ka rak tlung nain khua mi hna nih hau ka in an ka kham cu ta, zeitin dah ka luh ngam hnga. Tu lio kan ram cu za a long ngai cang bang khuami hna zong an bu in puan zar he khua chung lut lo ding in an ka kham ko khi ta tiah an thlah mi pa cu a ti. Ziah khuami hna nih na tlun lai an i ngaih tuk i pei an rian zong kal tak in ni lin khua al lakah an in hngah lengmang cu a ti. An pa hnih in an khua ruah a har.

Aho khua mi nih dah an in kham an in ti tiah pa Lian cu a hal. Pa Lian nih cun khua mi hna nih an i tlaihmi puanzar khi zoh hmanh a ti i a hei zoh. Puanzar i an ṭialmi cu “KAN IN DAWN” ti a si ai.

Pu Henry Van Thio Laimi ca ka saduhthah

Pu Henry Van Thio Kawlrampi uknak ah vice president 2 ca an thim cu kan rak lawmh pi cio. Kan i lawmh tuk ah ṭhut zong ṭhu thiam lo, ih zong it thiam loin a kan tuah cio. Laimi tuanbia ah chim dai lo a si ko lai. A rianṭuannak zongah Pathian nih thluachuah ko seh. Pu Henry Van Thio cu vice president 2 rian khinh a si i Laimi ca zongah rian ka ṭuan ko lai a ti ahcun thil pakhat te hal ka duhmi a um.

Kawl uknak ah kum saupi kan um cang. Kan miphun, biaknak le ca zong hloh dih a kan timh kan rak ti. Sihmanhsehlaw nihin ah nawlngeihnak kan kut cungah zeimaw zat a um. Cutikah kan biaknak zalonnak kan hmuhnak ding, kan miphun biatak in ṭanpi i ṭhancho ter le kan ca zong sianginn ah tangli, tangriat in a chung lei tiang cawnnak tuah ding tibantuk hal ding ka tum lo.

Miphun caah kan tuahpiak seh ti ka duhmi cu hihi a si. Pu Henry Van Thio timi a min ah Pu Henry Van Ṭhio tiah “Ṭ” tang kan deh piak sehlaw ka va duh hringhran dah.

Salai Lian Biak Hu

Mipi thimmi dotla vice president Pu Henry Van Ṭhio

Kawlrampi president thimnak ah minung pathum an chuahpi hna. Cu lakah mipi nih thimmi vice president cu Pu Henry Van Ṭhio a si. Zeitin dah na chim khawh nan ti men lai, a talnglei ah zoh hmanh hna u sih.

Cozah thar ah president a ṭuan dingmi hna.
Hmanthlak: AP

Zeitin dah vice president an rak chuah cio ning a si timi zoh hmasa u sih.

Pa khatnak ah president ah thimmi pa U Htin Kyaw. U Htin Kyaw cu National League for Democracy (NLD) lutlai Daw Aung San Suu Kyi nih president ṭuan dingah kutdong sawh in thimmi a si. Cucu NLD pary nih an lung tlinpi. NLD pary lungtlin in thim i Daw Aung San Suu Kyi nih lungtlinpi mi a si lo.

Dr. Hmuh Thang + Dr. Lian H. Sakhong = Henry Van Ṭhio

Pu Henry Van Ṭhio cu Kawlram uknak ah vice president ca thimchung a si cang. Khuazei hmun a dir lai bal theih a si rih lo. Laimi tuanbia thar ṭialtu a si. Kan umnak in kan rak lawmhpi cio. Pathian nih a rianṭuannak ah thluachuah hram ko seh. 

Hmanthlak: gettyimages

A luancia 2010 thimnak ah Dr. Hmuh Thang nih, “President ṭuan ka duh caah party nganmi ah ka lut,” tiah a rak ti. Fianghlang tein bia a rak chim. Hibia nih tampi hmai a rak sa chung cia cang.

Nikum 2015 DVB Debate tuahnak ah Dr. Lian Hmung Sakhong nih kawlpawl cu fakngai in bia a chalh hna. Upa pakhat nih khatluk bia chimmi kha cu a fak hringhran ko. Laiholh in hei chim u sihlaw, “Nanmah Kawlchia, rimnam hna,” tiah hei ti sehlaw cubang cun an i fah sak lai dah.

Kawlpawl nih cun nan duhmi nan hmuh cang an ti khawh men. A ruang cu ṭangtiang naa timh lawng ah khup tiang na phan kho lai timi ruahnak an ngeih caah a si. Dr. Lian Hmung Sakhong bia leng a pet lo. Nawl ngeihnak a ngeimi president kan duh, a phungmen, covo cheuh chom in pekmi nawlngeihnak a ngei lomi vice president cu kan duh lo tiah a rak chimmi.

"Hei" a hei ka ti ve mu...

Norway ah Pa Lian cu a rak phan ve. A hawi pa Pa Biak nih viber in thawng a van hal. A ca cu hitin a ṭial.

Pa Biak: Hei, na phan cang tih, nangmah lawng zeidah na tuah tawn?

Pa Lian cu message a hmuh le cangka in a dak colh. A ruahmi cu, "Pa Biak hi Norway a phak hnu cu a hngal ngai cang hi ta. Mi nunnem te dara a si tiah "Hei" a hei ka ti ve mu," ti khi a si.

Theih awk: "Hei" timi cu mirang nih "Hi" an timi he aa khat.

YTP season 2 le strategy

Eain Mat Sone Yar Yat Tat Pan Season 2 cu tuzarh February 13 ah final an i zuam cang lai. Top 3 an i zuamnak ah vote in Thi Thi Soe cu hmakhat te ah final a kai. David Lai le Hazel bal anmah pahnih lawng an i zuam ṭhan.

David Lai le Hazel zuamnak ah cun Judge biakhiahnak lawng in final kai ding a si. David Lai cu Judge le a zohtu pawl nih an uar ngaingai mi a si. David Lai cu a hlasak a ṭha ngai ko nain hla a philh mi a um pah caah Final kai ding ah Hazel nih a tei ai. Sihmanhsehlaw David Lai zong final a kai ve ṭhiamṭhaim. Hihi a ruang tampi a um kho.

Hmanthlak: Channel 7 FB

Zeiruang ah dah David Lai hi Grand Final a kai ve timi hi hlasak a thiam ruang le judge te nih an duh ca lawng ah a rak si lai lo. Zeitih tiah cun David Lai hi aa zuam chung ah Top 1 a hmu tawn mi a si. Top 3 an i zuamnak zong ah khan David Lai cu an uar ngai ko nain Thi Thi Soe nih vote 49,000 leng a hmuh. David Lai nih 43,000 leng a hmuh ve nain Hazel cu 15,000 tluk lawng a hmuh.

Mah le rian cio

A luan ciami kum khat ah khan facebook ah kum li ngakchia nih 911 a chawnhnak kong youtube in ka rak hmuh. Ka lung a ka suk tuk i ka hin tlawmte ka rak ṭial ve.

Hi kong ah a phunphun in an chim cio. Ngakchia hi nu a si, si lo, hi thil hi a tak a si, si lo, tibantuk a phunphun an chim cio. Ka zong hin phundang in kan hun chim ve lai. Hi kong hi kum sarih leng a rau cang mi a si. An rak i chawnh ning tlawmte a tanglei ah ka van langhter.

Operator: 911 emergencies in a si.

Ngakchia: Aw, bawmh ka herh.

Operator: Zeidah cang?

Ngakchia: Ka kanaan.

Operator: Na kaa ma?

Ngakchia: Si lo, kanaan a si. Ka tuah hrim hau. Na ka bawm lai ma?

Operator: Siseh. Khoi ka dah na um?

Ngakchia: Si lo, fawn in ka chim ko.

Operator: Aa! A si kho lo. Mi bawmtu ka van thlah hna lai.

Ngakchia: Aw.

Operator: Bawmh na herhmi kanaan cu zeibantuk dah a si?

IC show tilian harmi bawmhnak sing 19588 an hmuh

Hmanthlak: Popular

Iron Cross nih tilian ruang i harnak a tongmi hna caah tiah show pakhat cu August 21, 2015 National theatre Hall ah an tuah. Show tuah dingin tlangtlatu cu KBZ Brighter Future Myanmar Foundation a si. Zohman zong voidang tawn an hauhmi nakin a let in a fak ngaingai. Sing leng a kai. A ruang cu bawmhnak caah a si lai ti a si. IC Show tuahnak i ticket man an hmuhmi dihlak cu sing 800 a si.

A zoh mi hna lawng in siloin a chung he a leng he bawmhnak an rak pek cio. Puai zawh zong an i nuam i puai tuahtu zong an i lawm. Bawmhnak zong tam lakte an hmuh. An hmuhmi dih lak hi sing 19588 tiah thawngthanhtu hna nih puai a dih lai te ah an thanh. Bawmhnak an pek nakding hmun hna cu Sagaing ram le Chin ram hna an si lai.

IC Show zoh a duh ve mi hna nih ka hin zoh khawh a si. IC SHOW